Continuidade, Solinas: «Discussiones informales? Sa Cummissione Europea pigat sas distàntzias»
Addurat a arribbare sa risposta de sa Cummissione Europea pro sa continuidade territoriale, s'Assessore Todde fiat isetendela intro oe.
«Totus sas tratativas incarreladas a pustis de su 13 de onniasantu 2019 de sa Regione Sardigna a pustis de sa trasmissione – pro mèdiu de su Ministru de sas Infrastruturas e de sos Trasportos – de su Progetu nou de OSP, predispostu pro su cumpartzimentu e s’inviu imbeniente a sa Cummissione europea pro manu de sa Rapresentàntzia italiana acanta s’Unione Europea – iscriet in unu comunicadu Solinas – ant semper tentu unu caràtere formale. E in custu modu amus gestidu totus sas rechertas de crarimentu limpida dae sa Cummissione cunformas a sas mudas o integratziones in su Progetu».
Seguru non fiant custos sos faeddos chi sa Giunta, s’opositzione e totu Sardigna s’isetaiant dae sa Cummissione Europea. Dae eris s’abetat sa risposta de Bruxelles a sas propostas de sa giunta pro sa Continuidade territoriale.
Martis in sa cunferèntzia vìdeu tra Guvernu, Cummissione Europea e Regione, a pustis de su refudu de Bruxelles de sa tarifa ùnica proposta dae sa Giunta Solinas, s’Assessore Todde aiat propostu unu “cumpromissu”.
Tarifa pro sos residentes a tot’annu, 20 èuros prus sas tassas pro Fiumicino e 30 èuros prus sas tassas pro Linate. Pro sos non residentes tarifa dòpia, durante s’ierru, e lìberu mercadu durante sos meses istiales, e pròroga finas a mese de ladàmine de sas cunditziones atuales, essende chi segundu sa lege europea serbint 6 meses pro sa presentada de su bandu e sos tempos non nch’ant a èssre intro s’iscadèntzia de s’atuale bandu fissadu pro su 17 abrile.
S’Ue, insistit e pedit su lìberu mercadu dae martzu a mese de ladàmine. Bia sas 13 sa rapresentàntzia italiana mutit a s’Assessore Todde pro li comunicare chi intro sa die si diat èssere cungiadu pretu, cun s’atzetatzione de sas propostas dae parte de sa Regione. Ma a sas 20 sa Cummissione càmbiat idea e rimandat sa risposta, e segundu su chi at decraradu s’Assessore Todde etotu in su Cussìgiu de eris, sena dare ulteriores acrarimentos: «Nos agiornamus» sa risposta de Bruxelles.
Oe Todde e sos rapresentantes de sos grupos de minoria sunt bolados a Roma, ma istagiados, pro pedire agiudu a su guvernu natzionale, non paret chi Todde siat chessidu in die de oe a otènnere un’atopu cun sa Ministra De Micheli. In su mentres però sas decraratzione, lassadas segundu calicunu dae sa Cummissione Europea, ant lassadu fritos a totus.
«Unu tema importante comente cussu de sos trasportos e de su deretu a sa mobilidade pro sos sardos non podet èssere derubricato a “discussione informale”, totu custu non est giustu e est fintzas ofensivu pro sa Sardigna – at concruidu su Guvernadore de sa Sardigna – como isetamus chi ddoe siat una dissotziatzione firma e autorèvole pro custos faeddos chi – in unu momentu gasi delicadu – podent dannificare in manera sena remèdiu su Progetu».
© RIPRODUZIONE RISERVATA