Unu sinnu de sos tempos. Su tzellulare, chi oramai est un’ogetu chi non si nde podet prus fàghere prus a mancu, immoe tenet peri unu mercadu de s’usadu fruturosu meda.

Unu fenòmenu chi podimus paragonare a cussu de is màchinas de sa segunda manu. Difatis, segundu is datos donados dae sa sotziedade de anàlisi Idc, in su 2019 sas cunsignas de telefoneddos intelligentes impreados ant aumentadu de su 17,6% rispetu a s’annu prima, pro unu totale de 206,7 milliones de petzos (175,8 milliones in su 2018).

Una crèschida de su mercadu a livellu planetàriu duncas, chi at a sighire a crèschere peri in is annos benentes. Est pretzisu a nàrrere chi sa categoria de is tzellulares torrados a bèndere cumprendet siat cussos impreados siat cussos ricunditzionados o rigenerados.

Si tratat de modellos usados chi, mancari cun carchi difeteddu, benit asseliados e torrados comente noos, brontos a sa bèndida. In prus podent èssere cumertzializados peri in canales segundàrios.

Sos espertos pendant ca su mercadu est andende bene siat pro ite chie los comporat bolet risparmiare, siat pro ite in medas bolent colare dae sas retzes 4G a cussas 5G.

Pro passare a sa retze 5G, difatis, in medas ant a comporare telèfoneddos cun su standard nou de cunnessione, ponende in su mercadu de s’usadu is dispositivos prus betzos.

A s’imbesse su mercadu de is tzellulares intelligentes noos non creschet, pro ite in urtimera non sunt istados presentados modellos noos cun novidades tecnològicas mannas.

Est una noa bona pro chie est in chirca un’aparatu a bonu prètziu, bida sa possibilidade manna de sèberu in su setore de s’usadu.

Comente si siat, su cunsìgiu est de acuistare s’usadu garantidu ebbia, evitende gasi de comporare aparitzos telefònicos chi una bia comporados bogant difetos o chi podent èssere peri furados. Sa pria règula est sa de non si fàghere cullunare dae telèfonos ofertos a istracu baratu chi, mancari de segunda manu, tenent unu valore mercadu meda prus artu. In custas ocasiones est semper mègius impreare su bonu sentidu.

Usa e Tzina arribbant a pònnere sas firmas in una trègua cumertziale.

Su presidente Donald Trump e su vitze primu ministru tzinesu Liu He ant incarreladu sa gasi mutida Fase 1 chi discinit carchi crititzidade de sa pelea cumertziale tra Washington e Pechinu.

A fundamentu de s’intesa ddoe est s’impinnu de Tzina a comporare àteros 200 milliardos de mertzes e servìtzios «fatos in Usa», a no isvalutare sa muneda sua e a respetare is deretos de sa propiedade intelletuale.

Is Istados Unidos imbetzes si sunt impinnados a nde bogare sos dàtzios noos a su 15% chi diant èssere dèpidos intrare in vigèntzia su 15 de mese de idas 2019 (firmados in bista de su patu) pro casi 160 milliardos de dollaros de produtos fatos in Tzina, a is cales Pechinu diat àere torradu sa presta cun su pròpiu provedimentu a pitzu de 3.300 prodùidos americanos.

Abarrant però galu is dàtzios a su 25% a pitzu de 250 milliardos de dollaros de importatziones tzinesas, ma ant a èssere abbassadas a su 7,5% is tarifas a pitzu categorias residuales de produtos fatos in Tzina, pro belle 120 milliardos de dollaros. A su chi at naradu Trump, in sa Fase 2, custos puru nd’ant a èssere bogados.

Su presidente americanu at allegadu ora meda sena pasu, torrende gràtzias a s’iscuadra sua e a su presidente tzinesu Xi Jinping, descriende·lu comente s’amigu mannu suo.

Trump at naradu chi in su benente at a andare de persona a Tzina. In prus, at agiuntu chi si tratat de un’acòrdiu istòricu, chi at favorèssere raportos prus istàbiles e echilibrados tra is duas potèntzias mundiales.

Bregiosu meda pro s’acòrdiu peri su primu ministru tzinesu Xi chi cun una lìtera at postu a notu comete s’intesa siat importante pro totu su mundu.

In su mentrestempus Wall Street at antitzipadu sa firma lompende a màssimos istòricos noos, chi però sunt istados moderados dae s’essida de is detàllios de s’intesa. Medas analistas ant descritu s’acòrdiu de pagu sustàntzia cunforma a sos annùntzios initziales. Calicunu espertu de su setore at afirmadu chi pro sa Tzina no at a èssere cosa de pagu contu a mantènnere sa promissa de achistu de is benes Usa.

A ogna contu su presidente americanu Trump, gràtzias a custa mòvia polìtica, podet torrare unu pagu de sùlidu, a pustis de sa protzedura de incriminamentu aviada dae su Senadu.