Su Casteddu si depet cuntzentrare e agatare sa fortza de torrare a bìnchere. Pro ite est perdende dae chimbe partidas, bator in campionadu e una in Copa Itàlia.

Seguru in custas garas at tentu aversàrios balentes che sa Juventus e s’Internazionale e in prus est galu manna sa delusione pro s’iscunfita contra sa Lazio.

Ma in sa partida foras de domo contra s’Udinese, e in cussa a Sant’Elia contra su Milan – chi fiat andende male meda – s’iscuadra no est arrenèschida a fàghere mancu unu puntu. In s’urtima de Copa Itàlia, su Casteddu est partu iscambadu e sena gana de gherrare. Tocat a nàrrere però ca s’Internazionale tenet giogadores de preju e s’atacante Romelu Lukaku est fàghende sa diferèntzia in Sèrie A.

Is tifosos casteddajos s’aiant fatu sa bucabona cun is resultados de s’iscuadra e teniat isperu bonu de sighire in cuss’àndala. Tocat però a si regordare ca sa punna de su Casteddu est a abarrare in Sèrie A, e pro s’ora is bintinoe puntos conchistados in su girone de andada, sunt una base bona meda.

Sa partida chi benit est dominigu, foras de domo, contra su Brescia. Non at a èssere fàtzile pro ite is rundineddas sunt in sa coa de sa classìfica. Annotamala su Casteddu depet tènnere a mente ca at pèrdidu sa prima partida de su campionadu pròpiu contra s’iscuadra de s’ex presidente ruju-blu Massimo Cellino. In prus in su Brescia ant a torrare giogadores importantes pro su giogu de Eugenio Corini, comente su defensore Andrea Cistana e su tzentrucampista Sandro Tonali.

Is òmines de Rolando Maran sunt mutidos a donare una proa manna in s’istàdiu Mario Rigamonti de Brescia pro superare custu momentu malu. Pro nche arréneschere a is giogadores ddis at a tocare a esserent unidos e a nde bogare a foras su caràtere issoro. Est pretzisu a traballare meda in sa difesa e chi is atacantes torrent a èssere de muta bona, pro ite in is ùrtimas partidas ant marcadu belle nudda.

Pro regalare una bella satisfatzione a is tifosos sardos emigrados a Brescia e de totu sa Lombardia.

At bìnchidu s’Udinese. Su Casteddu no est arrenèschidu a riscatare sa partida pèrdida contra sa Lazio.

In sa Dacia Arena de Ùdine est acabbada 2-1 pro is meres de domo cun is goal realizados dae Rodrigo De Paul e SekoFofana. Pro is casteddajos su goal de Joao Pedro.

Rolando Maran a pustis de sa partida at nàradu ca is giogadores ruju-blu ant giogadu una bona partida, ma est abarradu delusu pro su resultadu.

A is friulanos ddis serbiant puntos pro s’istesiare dae sa zona retrotzessione e ant meritadu de bìnchere pro sa gana dimustrada.

Su primu goal de s’Udinese est istadu realizadu dae De Paul, cun unu bellu tiru a s’acabbu de su primu tempus.

Su Casteddu est renèssidu a aderetare su resultadu cun Joao Pedro a sa coa de su segundu tempus.

Pròpiu su brasilianu est istadu su protagonista de s’ùrtima vitòria casteddaja in Friuli, cun su goal chi at permìtidu a s’iscuadra de s’impònnere in s’istajone 2017/2018.

Ma pustis pagu tempus Fofana at marcadu sa rete de sa vitòria de s’Udinese cun cuntentesa manna de is giogadores allenados dae Ivan Gotti.

Mancari is ùrtimas partidas pèrdidas, su Casteddu at cungiadu unu 2019 andadu bene meda, cun bonas proas, faghende sonnare is tifosos isulanos.

A s’incumentzada de s’annu nou, su Casteddu at giogare contra sa Juventus. Una partida difitzile meda a Torinu cun is biancu-nieddos, ca sunt primos in classìfica paris cun s’Internazionale de Milanu.

Sa possibilidade pro is ruju-blu de mustrare su valore issoro, e festare galu de prus is 50 annos de s’iscudetu de su 1969/1970 cun s’iscuadra de Gigi Riva.

At a mancare su difensore Pisacane ca in sa Dacia Arena de Ùdine est istadu bogadu a foras dae s’arbitru, cun su cartellinu ruju. At a torrare su portieri Olsen ausente pro iscualìfica in is ùrtimas 4 partidas, e s’isperat finas calicunu de is infortunados.