Su Casteddu depet bortare pàgina in presse e si depet cuntzentrare a pitzu de sa gara de campionadu contra s’Udinese.

Sa punna est sa de cungiare cun una bella vitòria unu 2019 andadu bene meda, acantu s’iscuadra at regaladu satisfatziones mannas a is tifosos.

Is ruju-blu sunt galu delùdidos pro sa derrota contra sa Lazio in sa partida de lunis coladu.

Sa rimonta biancu-asulu in is minutos de recùperu – in una partida giogada bene dae su Casteddu, a su cale est mancada s’acunnortu de cungiare sa partida – at fatu lissinare is sardos a su de chimbe postos in classìfica.

Is giogadores de Rolando Maran sunt mutidos a donare una proa manna in sa Dacia Arena de Ùdine, dimustrende torra su caràtere mannu dimustradu pro totu s’istajone.

No at a èssere fàtzile a bìnchere contra is friulanos, chi òcupant is positziones bàscias de sa classìfica de su campionadu e tenent bisòngiu de conchistare puntos.

Is biancu-nieddos ant fatu duos parègios ebbia in is ùrtimas chimbe partidas e s’agantant a duos puntos ebbia dae su tertz’ùrtimu postu chi balet sa retrotzessione.

At a èssere unu desafiu difìtzile pro su Casteddu, chi in Ùdine at bìnchidu tres bias ebbia in is bintoto garas tra Sèrie A e B, perdende 16 bortas.

Is sardos ant a afrontare is friulanos sena Nandez, iscualificadu, peri si at a torrare Rog, ausente contra is latziales. Ant a mancare peri is infortunados Ceppitelli, Pavoletti, Birsa, Castro e Cragno.

Sa porta at a èssere galu difeda dae su brasilianu Rafael, bidu ca a Olsen dd’abbarrat de iscontare una die de iscualìfica.

Pro su restu sa formatzione non diat dèpere cambiare meda respetu a cussa de lunis, cun Nainggolan

semper prus leader de su tzentrucampu e Simeone cun Joao Pedro prontos a corpire s’aversàriu.

Pròpiu su brasilianu est istadu su protagonista de s’ùrtima vitòria casteddaja in Friuli, cun su gol chi at permìtidu a s’iscuadra – ghiada dae Lopez – de s’impònnere in s’istajone 2017/2018.

S’Udinese allenada dae Ivan Gotti calat in campu cun sa formatzione tipu, cun su clàssicu 3/5/2. A s’argentinu De

Paul su còmpitu de iscasidare sa còpia de atacu formada dae Okaka e Lasagna.

In panchina, prontu a donare su càmbiu a su macedone, ddoe at a èssere Nestorovsky. A dirìgere sa partida s’àrbitru Piccinini de Forlì.

Su Presidente de sa Regione Christian Solinas at fatu a ischire de àere pedidu a su Guvernu, in una lìtera indiritzada a su presidente de su Cunsìgiu Giuseppe Conte, su 9 de mese e idas coladu:

«de pòdere inghitzare a sa lestra is protzeduras pro sa costitutzione de sa mesa tècnica-polìtica finalizada a sa cuantificatzione e cumpensatzione de is isvantàgios istruturales permanentes chi dipendent dae sa cunditzione de insularidade de sa Sardigna».

Su Guvernadore at agiuntu: «Bene bèngiat ogna initziativa ùtile a otènnere su reconnoschimentu pro sa Sardigna de is isvantàgios causados dae is cunditziones geogràficas suas, ma pro segudare cantu prima unu resurtadu positivu est netzessàriu unu cunfrontu tra Istadu e Unione europea».

Solinas at allegadu peri de sa collaboratzione profetosa cun su Ministru Giuseppe Provenzano, adobiadu su 26 de onniasantu coladu in Villa Devoto.

«Cun su ministru pro su Sud – at naradu su Presidente de sa Sardigna – amus giai cumentzadu unu diàlogu costrutivu, chi s’est contivigiadu in un’acòrdiu articuladu chi, in prus de definire una rimodulatzione de su Patu pro sa Sardigna pro atzelerare s’ispesa trasferinde risursas pro finantziare interventos chi si podent acumprire in deretura, previdet in manera crara s’istitutzione de una mesa Regione-Istadu pro s’insularidade».

Solinas at croncuidu: «A su Guvernu pedimus una risposta in tempos lestros chi permitat su reconnoschimentu de is deretos de is sardos, cumintzande dae su deretu a sa mobilidade cun sa continuidade territoriale noa».