S’Istatzione de s’Arte de Ulassa, in su mese de ladàmene, at a dedicare una rassigna antològica de grandu importu a Maria Lai, s’artista ogiastrina pro etzellèntzia. In sa rassigna ant a èssere presentes prus a mancu 70 òperas suas: disinnos, pinturas, isculturas e àteras creatziones chi ant a pònnere a notu totu su traballu  artìsticu de sa fèmina ulassesa prus famada de su mundu, dae is primos cumentzos finas a oe. Su museu cuncordadu in s’istatzione betza de su trenu, a una pariga de chiòmetros de Ulassa, est nàschidu gràtzias a sa lassa de Maria Lai de prus de chentu òperas, is mègius de su percursu artìsticu e umanu suo. Su museu est pro s’Ogiastra unu de is printzipales puntos de referèntzia pro s’arte contemporànea, connòschidu in Itàlia e foras de Itàlia. Difatis, s’Istatzione de s’Arte de Ulassa, in prus de costoire is òperas prus significativas de Maria Lai, aparitzat peri prèmios de iscritura, favorèsset iscàmbios culturales cun àteras istitutziones natzionales e internatzionales e promotzionat, cun unu muntone de initziativas, s’ispainamentu, sa difusione e sa connoschèntzia de s’arte, in totu is formas espressivas suas.

Sa mustra, ordingiada dae s’Onsul Fundatzione Istatzione de s’Arte, s’at a pòdere bisitare ogna die, a mangianu dae is 9.30 a is 11.00, e dae is 13.00 a is 14.30, a merie dae is oras 16.00 a is oras 18.00.

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22