Mancant galu tres chidas ma mancari gasi is seuesos sunt giai in avolotu pro sa festa de Su Prugadòriu, sa manifestatzione religiosa e pagana chi cada annu leat in tzentru istòricu de sa bidda unu muntone de bisitadores. Sa ricurrèntzia de sa festa de is ànimas, chi in Seui si narat pròpiu “Su Prugadòriu”, tenet una orìgine antiga meda: durante is tzelebratziones dedicadas a su cultu de is ànimas de su prugadòriu is seuesos tenet s’ocasione de fàghere connòschere a is istràngios totu is traditziones issoro. Pro custu ant a èssere abertos a su pùblicu is mangasìnos antigos in ue s’ant a pòdere tastare totu is produtos de sa coghina traditzionale de Seui. Ispetàculos musicales e manifestatziones culturales ant a acumpangiare is bisitadores pro totu sa durada de sa festa. Sa Cumpangia teatrale de Casteddu “Il Crogiuolo” at a presentare una rapresentatzione cosa sua intitulada “A duru duru” e unu tretu de importu at a èssere lassadu finas a su cunvegnu “Minas e minadores” e peri a unas mustras fotogràficas. In prus at a èssere presentada sa bessida noa de su film de su regista Daniele Atzeni intituladu “Is mortos de Ales”. Sa Comuna de Seui e s’Assòtziu de Promotzione Sotziale Agusliastra ant a torrare a propònnere sa manifestatzione Artes Antigas, chi at a donare a totus is amantiosos sa possibilidade de imparare is tècnicas de traballu antigas de s’artisanadu. Sa banda musicale  G. Rossini de Seui, su cuncordu polifònicu e is sonadores de organitu e de bìsonas ant a donare su ritmu giustu a sa festa chi dae su 31 de su mese de ladàmene a su 1 de onniasantu ant a regalare àrchidu e prestìgiu a sa bidda de Seui, prenende∙dda de mùsica, de nuscos de sa traditzione, de arte e de cultura. Cussigiamus a totus de non mancare a custu eventu de grandu importu pro s’Ogiasta! Bonu ispàssiu!

Su “Velorail” est unu veìculu a pedales cuntzepidu pro colare in sos binàrios ferruviàrios, oferende un’esperièntzia de turismu priu e sustenìbile pro esplorare paesàgios e òperas de arte fatu fatu de sas lìnias ferruviàrias betzas. Custa faina, presente in Europa e in  àteras partes de su mundu, s’est isvilupada mescamente in Frantza, acanta sunt ativas prus de 64 retes chi cada annu benint impreadas dae unu nùmeru sempre prus mannu de biagiadores.

Durante su Fèstival IT.A.CÀ de su turismu responsàbile in Ogiastra, b’est istada una cunferèntzia dedicada a su Velorail. S’atopu est serbidu pro pònnere a notu su ruolu suo comente atratore turìsticu pro sa zona, sende chi fintzas in Ogiastra  tenimus una rete ferroviaria betza chi non benit prus impreada pro su tràficu passegeris. In sa cunferèntzia s’est fintzas sutaliniada sa complementariedade cun su Treninu Birde e s’importu de su turismu priu in sas zonas internas de sa Sardigna. Sos relatore chi sunt interbènnidos ant discutidu progetos pro favorire s’isvilupu de su Velorail e ant bogadu a pìgiu sa netzessidade de collaborare cun istitutziones e aziendas pro mandare a in antis custu progetu chi permitit siat de avalorare e recuperare unu bene istruturale oramai abbandonadu comente sa rete ferroviària, ma fintzas de lu fàghere in modu lentu e rispetosu pro s’ambiente e sa naturalesa.

Jean Paul AUSTRUY, espertu frantzesu de su setore, at cumpartzidu s’esperièntzia positiva sua e su potentziale de su Velorail in Sardigna, augurende s’impreu suo pro rinnovare su Treninu Birde e creare unu percursu turìsticu ùnicu in Europa.

Però, nointames su suportu legislativu, s’atuatzione de su servìtziu de su Velorail in Itàlia abarrat un’obietivu chi no est realizadu de su totu. Sunt istados aviadas mesas de traballu pro definire regulamentos e aviare lìnias isperimentales, ma est pretzisu atzelerare su protzessu pro ativare su Velorail comenteunu sèberu de turismu sustenìbile.

Francesca Loi, Assessore a su turismu de Lanusè, at concruidu sa cunferèntzia cun s’invitu a s’imbeniente editzione de IT.A.CÀ in su 2024, acanta si previdet de organizare una proa pro permìtere a totus de isperimentare su Velorail comente  mèdiu de trasportu sustenìbile in Ogiastra.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”