Garibaldi in Caprera: su coro sardu de s’Eroe de sos Duos Mundos.

Zuseppe Garibaldi, connoschidu comente s’Eroe de so Duos Mundos, est bistadu un’omine chi at rugadu paeses e terras firmas in d’una sumana in sa cale biazare fuit un’impresa tosta, fatta de naves a bela, caminos longos e iscroccas a s’ispissu inimigas.

At cumbattadu battallas sumanales in Sud America e in Europa, at ghiadu revolussiones, e su nomene suo at intronadu in tottu su mundu comente cona de libertade e corazu. Eppuru, pustis de una vida  bivida semper in assione, at seperadu de si ritirare in d’unu logu attesu e mudu, s’isula de Caprera, in Sardigna.

Unu seperu chi diat podere apparrere aggiocante, po un’omine abesadu a sos cramores de s’istoria. E imbetzes, cussa terra abria e agreste fuit po Garibaldi unu furriadorzu de s’anima, un’angulu de su Mediterraneu inube podere bivere in armudiu cun sa nadura, tribagliare sa terra e accattare sa paghe. Ma pro itte propriu in Caprera? Itte aiat corpadu in manera gai funguda un’omine comente a issu e l’ispinghere a bi ponnere raighinas?

Pustis de sas suas abbenturas americanas e unu pagu de tempus passadu in Nizza, tzittade in sa cale fit naschidu, Garibaldi si fuit imbarcadu supra unu bastimentu pitticcu giammadu “Iscumbattadore”, navigande in su Mediterraneu. E d’est bistadu propriu in su mentres de unu de custos biazos chi, po more de sas currentes e de sos bentos, fuit arribadu po casu in sas Buccas de Bonifacio. Inoghe aiat acciappidu amparu in su ballumene de isulas de sa Madalena, e d’est bistadu in cuss’occasione chi aiat bidu po sa prima borta Caprera. Un’addobiu fortzis abbennidu po casu, ma chi si fuit revertidu in amore a prima bista.

Fuit su 1856 cando, cun sos acchittos accuccurados e un’eredidade pitticca, aiat comporadu una parte de s’isula. Carchi amigu li aiat indittadu logos pius de grandesa, comente Cabu Testa o su Gulfu de Arzachena, ma Garibaldi no aiat tentu dudas: cheriat Caprera. Fuit incumintzadu gai su fraigu de sa domo coloniale sua, oe revertida in su Museu Naztionale Zuseppe Garibaldi, e aiat apporridu una vida fatta de laurantza, pesadura, iscrittura e reflessione.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

A 111 annos, Luisetta Mercalli est sa femina prus betza de sa Sardigna e sa quinta in Italia. Naschida su 17 de frearzu 1915 in Carloforte, in s’isula de Santu Pedru, in su sud-ovest de sa Sardigna, at arrugadu duas gherras mondiales. Oe tenet unu istile de vida attivu e impittat donzi die su telefoneddu po addurare in cuntattu cun familiares e amigos.

In su mentres de sa secunda gherra mondiale si est annodditada po ispiritu de azzudu, currinde pro azzuare pustis de sos bumbardamentos supra su portu de Carloforte de su 4 Aprile 1943 chi aiant fattu medas mortos e fertos. Sa carriera sua comente mastra est bistada de casi 50 annos, in d’unu tempus in su cale sos chi podiant istudiare fuint pagos, mescamente sas feminas. Si fuit diplomada in privadu in d’una iscola de Padova, istudiande a sa sola de notte e tribagliande intro de die, mustrande determina e impignu.

Dae cando fuit zovana teniat sa passione pro sa musica e su cantu. Accumpanzada a su pianu, si mustraiat siat in domo chi in sos teatros cun sa boghe sua de tipli. Custa passione l’at accumpanzada po totta sa vida sua e che l’at giutta a sighire sas operas de su Teatru Liricu de Casteddu fintzas a sos chentu annos. Oe, gratzias a sos ballumenes ordiminzados dae s’istruttura inube bivet, sa RSA de Su Planu in Selargius, sighit a assistire a sos ispettaculos.

Luisetta mantennet una vida in salude pappande cosa sana e faghinde unu pagu de movimentu. Su 17 de ffearzu, sa chida passada, at festadu sos 111 annos in su logu in su cale bivet, bestida in manera elegante meda. S ‘annu de Luisetta est diventadu una cona de vitalidade, memoria e amore pro sa vida, tzelebrande una femina chi sighit a ispirare cun s’esempru suo de fortza, passione e vida longa. Su nuntzu ha fattu su giru de su Web.

S’istoria sua si inferchit in d’unu cuntestu prus mannu: sa Sardigna est difattis famada po su numeru mannu de pessones betzas, cun zente de chent’annos chi bivet cun bona salude. Luisetta est s’esempru prus rechente e bivente de custu connottu, mustrande chi un’istile de vida attivu, sa passione pro sa cultura e sa cura de sé podent accumpanzare sa betzesa, revertindela in d’unu percursu riccu de esperientzias e de gioa de bivere.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22