Sa regione de su nord Sardigna est accomettande un’apprettu po s’abba pesante meda, chi ponet a arriscu tottu s’istagione de su 2025. Commo,
po sa laurantza bi sunt solu 5 miliones de metros cubos de abba, mancari nde bisonzent 30 miliones po abbare 5.000 ettaros de terrinos contividados.

In d’unu addobiu fattu dae pagu, ordiminzadu dae s’Assotziu Natzionale de sos cunsortzios de Sanamentu, a su cale ant partetzipadu massajos e sos assessores regionales a sos Tribaglios Pubbricos,Antonio Piu, e a sa Laurantza, Gianfranco Satta, est bessidu a pizu chi sa Regione at nadu chi nono a sa pregunta de su Consortziu de Sanamentu de sa Nurra de impittare 5 miliones de metros cubos de abba dae sas digas Temo e Cuga. Sa pioridade po s’impittu de s’abba est bistada apporrida a sa frunidura po s’abba de buffare, dassande sa laurantza in d’una situassione critiga.

Francesco Vincenzi, presidente Anbi, at espressadu affuscu po sa gherra intre campos chi sunt importantes meda po s’accolomia de s’iscrocca, nande chi:” In su rispettu de sas prioridades de sa leze, dassat chentza paraulas s’atzocchiu intre interessos primarzos cunsiderande chi unu fattore de ricchesa, comente su turismu, diventet unu problema po unu campu chi est atterettantu importante po s’accolomia locale comente sa laurantza chi produit mandicu e tutoria de s’ambiente”.

Po accomettare s’emergentzia, si prenettat s’accabbu de sos tribaglios supra sa cundotta de su cadinu Coghinas intre su mese de martzu 2026. In su mentres, sos massajos corpados dae sa crisi de s’abba preguntant de tennere un’intrada a sos azzudos accolomicos po cumpensare su reddidu chi lis mancat po su reduimentu de sas contipizas. Sa situassione de oe evidentziat s’apprettu de acciappare solutziones chi potant sustennere su controllu de s’abba, po garantire s’approvistamentu de s’aba de buffare e s’iscampu de sa laurantza in su nord Sardigna.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22