Sanremo archiviadu cun suddisfassione, sa Sardigna bragosa de Mahmood e Geppi Cucciari chi ant fattu sa differentzia supra su cataffale.

Cust’annu, su cataffale de s’Ariston at bidu lughere duos talentos sardos chi ant accostadu Carlo Conti in sa conduizione: Geppi Cucciari e Mahmood. Sa presentzia de Geppi Cucciari at azzuntu unu toccu de dillezu e intelligentzia chi non si podent frimmare, calidades chi l’ant semper distinguida. In su mentres de sas chimbe dies de su Festival, Geppi at ischidu tennere arta meda s’attentzione de su pubbricu, bogandeche scraccaglios cun sas tirada suas chi punghent ma non sunt mai fora de logu. Sa capatzidade sua de improvvisare e sa grandesa naturale sua ant creadu unu momentu lezeru e alligru, faghinde divennere donzi interventu suo un’ispettaculu intro s’ispettaculu.

Accanta a issa, Mahmood, po sa prima borta commente co-conduidore, at ispantadu tottus po s’elegantzia sua e fintzas po sa presentzia iscenica. Giai binchidore de duas edissiones de su Festival commente cantante, Mahmood at mustradu un’attera parte de su talentu suo, resessinde a sbaghillai cun disgaggiu intre sos momentos de conduissione e sa musica. Sa boghe sua carda e chi imboligat at acciappidu logu fintzas in carchi bessida chi at emossionadu meda, donande a su pubbricu momentos de maghia pura.

Sa sintonia de sos tres conduidores si est bida fintzas dae su primu sero, creande un’ecchilibriu perfettu intre sa professionalidade de Carlo Conti, sas brullas prenas de delicadesa de Cucciari e s’ammaju de su tempus de oe de Mahmood. Imparis, ant dadu vida a unu Festival attivu, modernu e a su mattessi tempus rispettosu de su connottu sanremesu.

In pius de sa gara de cantones, chi commente semper at bidu sa partetzipassione de sos numenes pius mannos de sa cantone italiana, s’abbenimentu est bistadu arricchidu dae istranzos de grandesa e momentos de ispettaculu chi non si ant a podere ismentigare.

In manera particulare affriscionosu est bistadu s’interventu de Roberto Benigni, chi at abbertu sa serana finale cun d’unu discursu dedicadu a sa bellesa de sa musica e a sa fortza de s’arte po assortire sas pessonas. Su culiminzu de su Festival est arrivadu sapadu sero, cando, pustis de una chida de emossiones, su cantante Olly est bistadu nomenadu binchidore de Sanremo 2025. Cun sa cantone cadria e chi appassionat sua, at ischidu conchistare su coro de su pubbricu e de sa critiga.

Sa binchida de Olly, sa performance de Geppi Cucciari e Mahmood e s’elegantzia chentza tempus de Carlo Conti, ant rendidu custa edissione una cosa chi non si podet ismentigare.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22

Sa crisi de sos Prontu Succursos in Sardigna: sa Regione refformat su sistema.

Sa Regione Sardigna faghet partire una refforma funduda de sos prontu succursos po accomettare in manera importante sa mancantzia de personale sanidariu e binchere su ricursu a solutziones de emergentzia adottadas in sos urtimos annos.

Po s’iscadentzia de frearzu de sos cuntrattos de sos duttores “gettonistas” impittados supra coditzes minores, s’amministratzione regionale at deffinidu unu pianu padriu chi puntat a garantire sa continuidade de sos servitzios, affortigare su personale e mezzorare sas cunditziones de tribagliu de su mattessi personale.

Incumintzande dae su mese de martu, s’assistentzia de sos “coditzes minores”, sos casos prus pagu graes chi arribant a sos prontu succursos, no at essere prus affidada a duttores de fora. Sa cobertura de sos turnos at essere assigurada dae duttores giai cun su cuntrattu po sos coditzes prus artos, sos cuntrattos de sos cales ant a balere fintzas a su 30 de lampadas.

Sa conduida de s’inari at essere abbentaditta e modulada supra sas esigentzias reales de sas ASL, cun s’intentu de iscansare serradas a tempus, minimadas de s’orariu de servitziu o discumbenias po sos malaidos. Fintzas a oe bi sunt bistadas protestas meda.

In manera parallela, sa Regione puntat a affortigare in manera firma su personale mo mesu de assuntziones novas. S’Agentzia regionale de sa salude at a faghere partire unu cuncursu pubbricu po 44 arreggentes meigos ispecialitzados in emergentzia-urgentzia. Sas protzeduras si ant a congruire in casi duos meses, permittinde s’intrada in servitziu de sos duttores novos intro de su mese de maju e apparande gai unu primu sulenu a chie est prus in difficultade.

Su pianu regionale no est solu assuntziones. Un’attentzione particulare bi est fintzas po su personale chi tribagliat giai in sos prontu succursos, chi a s’ispissu tribagliat meda de prus de su chi depet cun cundissiones cumplessas. Intro de su mese de frearzu s’Assessoradu regionale de sa Sanidade at a dividire intre sas ASL s’indennidade de prontu succursu chi bi est in su cuntrattu natzionale po su personale sanidariu, sos infermieris, tennicos, de su recuberu e po sos chi sunt
impignados in sos servitzios de emergentzia.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22