Cussa lepiesa chi naschet dae su coro e si traduidi in donzi movimentu de su corpus, est sa fortza chi at ispintu duas zovanas atletas, Rebecca Pitzianti e Greta Teng, assa parte de unu risurtadu istravanadu. Seighi annos, ambasduas campionas de Pole Dance, sunt partidas dae sa palestra insoro de Sestu, un’angulu pitticcu de su mundu, po arrivare fintzas a Uppsala n Svezia, inube ant conchistadu sa medalla de arghentu in sa categoria Artistic Pole Junior Double, a sos campionados de su Mundu de Pole Dance.

Unu sutzessu chi at premiadu su tribagliu tostu, sa passione e su talentu, e chi at bidu puru Rebecca conchistare su quartu postu in sa categoria Artistic Pole Junior Mixed, unu risurtadu desampladu.

Su percursu chi che at giuttu sas duas zovanas atletas a che pigare supra su cataffale est bistadu sinzadu dae meses de allenamentos cadrios,sacrifitzios e una passione chi las at unidas comente una fortza chi non si biede ma chi est poderosa. Su segretu insoro? Sa lepiesa chi ponent in donzi movimentu, comente cussa de una fozza chi ballat in su bentu.

Cussa mattessi lepiesa, chi prima de tottu naschet in su coro, e at rendidu donzi movimentu insoro naturale, cadriu e delicadu. Rebecca e Greta ant ischidu trasformare sa fadiga in d’una arte chi at faeddadu deretta a su coro de su pubbricu.

S’allegria po su risurtadu segudadu est evidente in sas paraulas de sas duas atletas. Rebecca chi est emossionada, ammentat s’intensidade de s’esperientzia bivida in Uppsala: sa felicidade de pigare supra su cataffale, ma puru sa bellesa de biere medas ballarinas postas impare po unu accadessimentu chi at fattu divennere su mundu de sa Pole Dance un’ispettaculu mannu e internatzionale. Greta, dae parte sua, evidentziat cantu siat bistadu istravanadu de ballare impare a sa cumpantza sua de isquadra, cun d’unu armudiu chi at fattu divennere sa mustrada insoro meda pius potente.

S’ispettaculu che che las at giuttasa a su sutzessu est bistadu un’ammisturu de impignu, creatividade e tennica. Unu contu de fortza e grassia, in su cale Rebecca fit una tigre e Greta sa domadora sua, una mataffara chi reflettit s’intesa de sas duas atletas e s’ecchilibriu perfettu de sa potentzia e sa dilighesa. Custu intritzu de fortza e armudiu at conchistadu sos zuighes, ma fintzas su pubbricu chi at sighidu cun s’alenu suspesu donzi movimentu. Bellecchi sa timidesa chi annoditat sa manera de faeddare de su sutzessu, supra su cataffale Rebecca e Greta ant mustradu corazzu, determina e un’intesa funguda chi at dadu vida a una proa unica.

Sa preparatzione est bistada longa e letrancosa: oras passadas a mezorare donzi movimentu, donzi filera, donzi particulare, po creare una proa chi esseret pius de una simple mustrada. Greta, difattis, evidentziat cantu esseret importante po issas chi s’ispettaculu no esseret solu una mustrada de abilidade fisica, ma un’opera de arte chi tepiat resessere a comunicare s’essentzia de sa Pole Dance: unu ballu chi non si allindat a essere fisicu, ma chi est unu beru e propriu viazzu emotzionale. E bi sunt resessidas, trasmittinde a su pubbricu e a sos zuighes sa bellesa de s’arte
insoro, fatta de lepiesa e fortza.

Su biazzu a Uppsala no est solu s’istoria de unu sutzessu isportivu. Est unu esempiu de comente sa passione, sa determina e su corazzu si potant trasformare in arte,ispirande chie tenet su corazzu de sighire sos sonnios suos, fintzas cando su percursu paret diffitzile e incertu. Rebecca e Greta, cun sa passione insoro po sa Pole Dance, ant mustradu chi donzi zestu, si benit fattu cun su coro, podet divennere unu bolu in derettura de sa bittoria, unu bolu chi non si frimat a sa gara, ma chi abbratzat sa bellesa e sa potentzia de su ballu.

Su sutzessu insoro in Uppsala no est solu unu puntu de arrivu, ma una testimonia de comente su ballu, in pius de essere una forma de espressione fisica, est puru unu viazzu de su coro, inube donzi movimentu contat un’istoria e inube s’intesa de duas animas podet revertire donzi movimentu in d’unu bolu in derettura de sa bellesa e sa bittoria.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Caputa 2025: tottu sos incontros musicales in Sardigna.

Sa Sardigna si preparat a saludare su 2025 cun d’una notte longa de musica dae su bivu chi at a impignare tottu s’isula, revertinde pratas, portos e tzentros istoricos in cataffales mannos a chelu abbertu. Po Caputa si prevedint casi degheotto cuntzertos e abbenimentos mannos in sos cales non si pagat, fruttu de unu programma mannu regionale po attirare sa zente chi istat inoche e sos turistas fintzas in sos meses de jerru.

In Casteddu su cuntzertu mannu de Caputa at animare su tzentru de sa tzittade cun Giusy Ferreri commente istranza printzipale e sos dee jay set e live ispartidos intre campolicu Carlo Felice e Pratta Yenne fintzas a su contu a su revessu. Terranoa puntat supra unu de sos incontros pius
isettados de s’isula cun Marco Mengoni commente interprete printzipale de sa prima parte de sa serana e Lazza giammadu a accumpanzare su
pubbricu a sa mesanotte supra su cataffale in sa zura portuale de s’Isula Bianca.

Aristanis at accollire s’annu novu in Pratta Roma cun su cuncertu de Fedez, mentres in Arzachena, in s’istadiu Biagio Pirina, si isettat Achille
Lauro po un’ishow chi at essere unu de sos prus ispettaculares de sa notte. Casteddu Sardu at a festare cun J-Ax commente headliner,accostadu dae atteros istranzos de s’iscena pop e urban, mentres Sa Madalena seperat su connottu affidande su cuncertu de

Caputa a sos Nomadi in sa tzentrale Pratta Umberto I°. Fintzas sa parte de intro de sa Sardigna at essere dragomannu: in Bitzi, po sas cortes
de Nadale, ant a pigare supra su cataffale Dolcenera e sos Istentales.

Sos abbenimentos non si cuntzentrant solu in sa notte de su 31 de Nadale, ma fintzas sas dies prima cun cuncertos e ispettaculos dae su 27 de Nadale in daenanti, in paritzos comunes, intre sos cales Assemini, Santu Antiogu, Carbonia, BiddaMassarza e Desule, cun artistas natzionales, musica dae su bivu e dee jay set, pensados po creare un’aera de festa isparta. Su Caputa 2025 in Sardigna si cunfirmat gai commente unu de sos pius riccos de Italia.

Attività realizzata con il contributo della Regione Sardegna – IMPRENTAS 2024-2025. L.R. 22/2018, art.22