Pula at fattu partire una initziativa de signifficu cun sa fundatzione de su Cunsizzu de sos Bedustos, un’organismu pensadu po dare boghe e balore a sos tzittadinos de sa terza edade. S’initziativa, chi est bistada cherfida meda dae s’amministrassione comunale, est bistada accollida cun galabera dae sa comunidade, riconnoschinde s’importantzia de iscurtare sas esigentzias e sos disizos de sos pius bedustos.

In su mentres de s’incontru de s’assemidamentu, ant eleggidu sas carrigas de su Cunsizzu: Laura Pisu, una mastra in pesone cun d’una longa carriera educativa in palas, est bistada seperada comente presidente, mentres Gino Rosa, connoschidu po s’attividade poetica e s’impignu culturale in bidda sua,at essere su vice presidente. Custos duos membros, gratzias a s’esperientzia insoro e a su ligonzu cun sa comunidade, sunt prontos a ghiare su Cunsizzu derettu a risurtados pretzisos e de signifficu.

S’assessora a sas politicas sotziales, Manuela Serra, at evidentzidu s’importantzia de custa initziativa, deffinindela unu passu de fundamentu po garantire chi sas esigentzias e sos disizos de sos bedustos pottant essere iscurtadas e cussideradas. Serra, at declaradu s’intentu de faghere initziativas chi serbant po mezzorare sa calidade de sa vida de custa zente, creande unu faeddu attivu de sas ingendras. Custu incluidit addobios cun su Cunsizzu de sos Zovanos e s’azzudu de sos istudiantes de sas iscolas, in manera de favoressere unu cambiappare de sas ingendras chi potat arricchire tottu sos chi partetzipant.

Su sindicu de Pula, Walter Cabasino, at espressadu suddisfassione po sa naschida de su Cunsizzu, evidentziande s’importantzia chi custu organu at a tennere po divennere unu canale de comunicatzione derettu intre sos bedustos e s’amministratzione comunale. Cabasino at affirmadu chi su Cunsizzu at a permittere a sos membros de sa terza edade de faghere intendere sas esigentzias insoro e dare indittos, contribbuinde gai a unu protzessu de dezisione chi siat pius incluisivu e partetzipativu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22