In sa disgratzia sa fortza de resistire e andare a daenanti. Proande a fraigare carchi cosa chi potat essere de azzudu po sos zovanos. Si giamat “Sas alas de Mattia odv”, un’assotziu chi in Carbonia tenet s’iscopu de azzuare sos piccioccos a no si intendere solos in sos momentos pius diffitziles de sa vida insoro po mesu de attividades de aggregatzione e privatzione.

In daesegus bi sunt su coro e su corazzu de Christian Marotta e muzzere sua Emanuela. In su 2022 sa digratzia manna chi at abbulottadu sa vida insoro. Su fizzu de 15 annos, Mattia si est mortu in su parcu de sa tzittade. E dae su dolore de unu babbu e de una mama est bessida a pizzu s’idea de creare un’assotziu chi indissiet s’arrancu de sos piccioccos in disignos e attividades ispecificas. “Sas alas de Mattia odv”, est como chircande una domo in sa tzittade de Carbonia. “Bi sunt medas pessonas chi dimandant un’azzudu po sa mente” narat Marotta, “ma oe s’assotziu tenet bisonzu de una domo”. A cussu puntu at essere unu tzentru de assortimentu po piccioccos, e intro de custa domo bi sunt medas disignos chi movent dae sas ideas de sos piccioccos”.

Unu tzentru siguru, po s’assortimentu de sos zovanos. Intro de sala musica, sala film, sala giogos e fubalinu. Ma finttzas street- art e interessos de giughere a daenanti. “Inoghe sos piccioccos ant a faghere assortimentu propriu commente si faghiat in su tempus passadu”.Cheret narrere usande in manera intelligente e cun s’azzudu de sos mannos sos tzellulares e sos istrumentos tecnologicos. “Sotzial e internet potent essere unu perigulu po sos piccioccos”, narat Christian, “e in mesu de sos chi nos azzuant, chi sunt casi baranta, tenimos puru un’informaticu chi at a tennere unu cursu educativu. Sas amiganzas virtuales? Sos amigos teppent essere beros, propriu commente una borta”.

In su 2022 sa disgratzia de Mattia, chi istudiaiat in sas iscolas superiores cun s’indiritziu informaticu. Cun su coro a picculos, mama Emanuela at iscrittu unu post supra sos sotzial chi at acciappidu meda iscurtu fintzas fora de sa Sardigna. “Nos ant chircadu dae tottu s’Italia. Bi sunt medas piccioccos in situassiones diffitziles commente cussa de fizzu nostru”. Dae incue s’idea de un’assotziu commente un’atteru chi bi est giai in Roma, chi azzuet tottu sos piccioccheddos chi sunt in mesu de una vida diffitzile, po faghere in manera chi resessant a lu binchere. “Ma devent essre sos mattessi piccioccos, leande cussentzia de sos problemas, a si accostare a nois”.

Meda ideas po s’assotziu “Sas alas de Mattia”. E tottu cundivisas e partetzipadas cun sos piccioccos de oe. “ Cando bi est bistada sa manifestassione Sulcis esponnet, in Carbonia” contat Marotta, “ammos dimandadu a sos zovanos. S’arresposta? Tottus dimandant unu tzentru de assortimentu siguru in su cale si acciappare e faghere medas attividades”. E azzunghet, “ A pagu a pagu sos piccioccheddos si sunt accostados. Semmus gai arrivados a casi 60 zovanos chi ant dadu bolantinos, presentande sas ideas nostras. Est importante meda chi sos piccioccos tenzant responsabilidades. Paritzas sas iniziativas, in cust’istiu chi at fattu in Carbonia s’assotziu. Carchi die faghet, in occasione de sos 18 annos de Mattia. Est bistadu unu momentu de cummossione forte po Christian e Emanuela. Cun s’azzudu mannu de unu amigu, sunt arrivados a sos manager de sos artistas Petit, Arisa e Daniele Silvestri, chi fint in Sardigna po cantare. E custos cun disponibilidade manna, in carchi manera ant cojuadu custa causa.

“Arisa, una picciocca fantasiosa, in Gonnesa at cantadu cun sa maglia de s’assotziu nostru, dedicandenos sa cantone Sa notte. Unu cuntzertu cun sas manos in su coro chi nos at emossionadu meda”. A sa mattessi manera Silvestri, “at iscrittu una cantone, Arghentu bivu, chi paret essere iscritta propriu po Mattia, indiritzande s’attentzione supra su discumbeniu de su ADHD e supra sos problemas chi si podent tennere in su percursu iscolasticu”. Como si tribagliat po su tempus benidore, e cun s’abbertura de sas iscolas pustis de sas vacantzias de s’istiu. “Semus prontos po accomettare sos problemas de sas materia divressas e non ammos a ponnere a disposta. Ma devent essere sos piccioccos a cumprendere e nos dimandare una manu. E medas sunt giai rispondinde”.

Ma serbit una domo. “Bisonzat a biere sos bandos e sos contribbudos chi nos podent dare. Su columene de Carbonia e sas istitutzione bi sunt, emmo. Sunt baludande cale podet essere sa solussione. Bi sunt domos meda, ma sa dimanda est arta da parte de assotzios commente su nostru. Nois po su momentu, partimos. Ammos a biere in su tempus benidore.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22