In mesu de sas medas paristorias supra sa naschida de sa Sardigna, bi nde est una chi est meda galanosa: est sa paristoria de Ichnusa, su contu fattu arrivare dae sos gregos de commente est naschida s’isula de Sardigna. Custa istoria est incumintzada in d’unu tempus chi non si connoschet, de sicuru attesu meda, prima chi in Sardigna nascherat sa tziviltade nuragica.

In cussu tempus, commente in donzi edade antiga chi si rispettet, sa situassione, supra de sa Terra fit galanosa, tottus andaiant de amore e de accordu, donzi tantu in mesu de sas divinidades naschiat carchi iscaramussa, ma nudda chi su latte e su mele non poderent sanare.

Unu die peroe cussu femineri mannu de Zeus, si fit inchiettadu no pagu po curpa de unu maridu chi li aiat tiradu un’iscarpa in su mentres chi, sutta forma de omine, si che fuiat dae su braccone de s’istantzia de sa muzzere. Gai, zudigande s’affrontu commente grave meda, aiat detzisu de si vindicare supra sos poberos chi istaiant in sa Terra, commente semper. Essende Zeus unu testerrudu meda, no aiat bollidu intendere nissuna de sas resones de cussos chi si rebellaint a su disignu suo de represare: inundare tottu sa Terra e affogare tottu s’umanidade.

S’incras, semper prenu de arrennegu, Zeus aiat giammadu a regorta tottu sas nues de su chelu e aiat fattu proere gai meda chi s’abba fit arrivada fintzas a sa gianna de domo sua in S’Olimpu, costringhinde Hera a serrare sas illascaduras cun saccos prenos de rena. Ma a unu certu momentu, in mesu de s’abba, tronos e lampos e undas artas meda, sa situassione li che fit casi fuida dae sas manos, e, po evitare de che finire issu puru in mesu de sos garroppos, Zeus aiat teppidu accirrare sa peana manna sua supra sa Terra.

A sa fine de su dilluviu, Zeus fit torradu cuntentu a s’Olimpu, ma pesande su pe, si fit abbizzadu de aere dassadu in mesu de sas abbas un’imprenta manna meda. Tando aiat detzisu chi, in onore de su pe divinu suo, cuss’isula in mesu de su mare tiada aere leadu su nomene de Ichnusa, dae Ichnos chi in gregu cheret narrere imprenta. Accollu ispiegadu pro itte, in s’antichidade, sos gregos e sos romanos e sos populos de su mare giammaiant Ichnusa cussa chi oe est sa Sardigna.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Su logu de s’iscultura: s’istravanadu museu chentza barras ‘e muru de sa Sardigna.

Partinde dae sa metade de sos annos Noranta, Tortulè e Arbatax sunt divennidas s’iscenariu de un’esperientzia artistica uniga in sa casta sua: unu museu de iscultura a s’abbertu connoschidu comente “Su logu de s’iscultura”,”il luogo della scultura” in sardu. Su disignu naschet in su 1994 po initziativa de unu fundadore culturale e s’abberat s’annu imbeniente cun d’una prima istallatzione antologica. S’idea est cussa de intregare s’arte de su tempus de oe in sa tessidura de sa tzittade e nadurale, revertinde s’iscrocca in d’unu beru e propriu cataffale de creatividade.

Su museu s’isfroscat supra duas deretturas printzipales: una parte de intro accasazzada in s’ex mercadu tzivicu de s’ottighentos, chi unu tempus fuit una presone, e unu percursu in fora chi est longu casi otto kilometros rugande sas carrelas de Tortulè, sa fratzione de Arbatax, Monte Attu e sa costa de Porto Frailis. Accanta a custu caminu si addobbiant operas fattas cun materiales divressos comente attariu,ferru, granitu, bidruresina, cimentu e ramene, in d’unu faveddu chi sighit cun sa bista, sos elementos nadurales e s’architettura de sas biddas. Carchi istallatzione est divennida una cona: comente “Nagjima”, un’istella a battoro puntas de attariu ismaltadu chi est posta accanta a Porto Frailis e “Grande Sipario”, chi giogat cun su logu de sa bidda comente chi esseret unu drappu teatrale.

Su museu accasazat puru tribaglios de nomenes importantes de s’arte de su tempus de oe, in mesu de sos cales Mauro Staccioli, Maria Lai,Umberto Mariani,Antonio Ievolella, Alessandra Bonoli, Pietro Coletta e Hidetoshi Nagasawa. Sas operas non sunt simples elementos de decoradura, ma divennint parte de sa fittiania de s’iscrocca, apprettande cunsideros e abberinde trettos de cunfrontu intre arte, comunidade e ambiente. In sos annos su disignu at incluididu fintzas sas iscolas, assotzios e tzittadinos in attividades de formassione e buttegas, affortigande gai su ligonzu intre sa populatzione locale e s’arte.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22