Sa Regione Sardigna at ghettadu unu provvedimentu importante meda po agguantare s’occubassione de operadores de sa sanidade e OSS chi non sunt tribagliande.

Cun d’unu istantziamentu de 18 miliones de euros, su cunsizzu regionale at fattu partire cantieris occubassionales isperimentales, chi serbint po casi 800 proffessioneris de sa sanidade chi, mancari eppant tribagliadu bene meda cando bi fit sa pandemia, oe non sunt tribagliande.

Su provvidimentu, approadu in s’accabidu de su bilanciu, prevedid un’ispesa po tres annos: 9 miliones po su 2024 e 4,5 po donzi annu 2025 e 2026. Custu finantziamentu at a permittere de faghere partire cantieris po s’occubassione in sas ASL de sa Regione, dande un’occasione de tribagliu a casi 800 proffessioneris qualificados, e fintzas un’azzudu a sas contesturas de sa sanidade chi in custu momentu patint una mancantzia de personale grave meda.

S’initziativa est unu primu passu de unu caminu pius largu chi at a biere fintzas s’interessamentu de sos sindacados po deffinire sas maneras operativas. Sa progettazione noa de s’inari chi non est bistadu usadu e chi est in sas cassas de s’assessoradu a su tribagliu at permittidu de destinare una parte importante de sos fundos a sos disoccupados de sa sanidade, chi fintaz a commo fint bistados escluididos dae caminos po torrare a tribagliare.

S’ordinzu sanitariu sardu est in crisi dae annos, cun ispidales chi tenent difficultades a mantennere in funtzione sos servitzios insoro ca lis mancat su personale. Custu provvedimentu cheret dare una risposta reale a sas difficultades, chircande de resorvere assu mancu in parte su problema de sa mancantzia de personale, mezzorande sas cunditziones de tribagliu de sos operadores de sa sanidade e affiantzande unu menzus servitziu a sos tzittadinos de sa Sardigna.

Sa mesura si proponnit de accomettare unu de sos apprettos pius graves de su sistema de sa sanidade regionale, apparande unu accottu in pagu tempus a sos ispidales e contribbuinde a che faghere calare su tassu de disoccupatzione de sos professioneris cualifficados de sa sanidade.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22