Sas scruccullas supra su mortoriu de Frantzisca Deidda, sa femina de 42 annos disparida dae Santu Sparau su 10 de maju e sos restos de sa cale sunt bistados acciappidos intro de una bussa manna in sas campagnas de Sinnai e Santu Idu, sighint a essere a su centru de s’attentzione.

S’Arma de sos Carabinneris, pro mesu de su RIS, est impignada puru in custas dies in su cumpidu de sos restos regortos siat in sa domo de sa morta siat in sa zura de Santu Priamu e in s’ex istatale 125. Su maridu de Frantzisca, Igor Sollai, 43 annos, est incurpadu de mortoriu volontariu e de aere cuadu su corpus,e fintzas a commo si acciappat inserradu in presone.

A s’accorrada de oe po sos accertamentos ant partetzipadu sos avvocados Carlo Demurtas e Laura Pirarba, chi difendent Sollai, e s’avvocadu Gianfranco Piscitelli, po contu de su frade de sa morta, Andrea Deidda. Piscitelli fit accumpanzadu dae s’esperta de custos casos Roberta Bruzzone, chi at leadu su rolu de esperta, po sa familla Deidda.

Roberta Bruzzone at espressadu su cumbinchimentu chi sas proas chi sunt bistadas regortas cunfirment sa responsabilidade de Igor Sollai. Sa criminologa at evidentziadu chi s’iscena de su crimene mustrat sinnos de essere bistada imberrida apposta, indittande una organissasione e una frittesa chi preoccupant meda. Bruzzone at galu abbertu a sa possibilidade chi Sollai non eppat fattu tottu a sa sola,indittande sa presentzia de unu compare po l’azzuare a cuare su corpus.

Sa chistione de sa possibile abbortzada est diventada pius sigura, pustis chi s’avvocadu Piscitelli at presentadu una denuntzia po sa macchissia de sos sigillos in sa domo de Sollai, chi est accadessida pustis de s’arrestu suo. Segundu cantu est bessidu a pizu, su babbu de Sollai at faltzadu sos sigillos po pigare bistires de che leare a su fizzu in presone, una cosa custa chi commo est sutta esamene.

Sos accertamentos de oe tiant podere essere importantes meda po assebertare cun pretzisione s’arma de su crimene. Intames, fintzas a custu momentu non bi sunt datos tzertos supra sas andalas chi sunt bistadas acciappidas e mancu elementos siguros chi permittant de narrere cale potat essere s’arma chi est bistada usada.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Tribulìa in sa plaja in Casteddu: piccioccu de seighi annos agattadu mortu pustis de una festa a denotte.

Un festa in atta ‘e mare est finida in sa manera pius drammatiga. Est ancora imboddicada in su misteru sa morte de Mariano Olla, 16 annos, naschidu in Casteddu, ma chi dae carchi annu bistaiat in Sestu, su corpus de su cale est bistadu acciappidu a s’arbeschida de dominiga 15 de lampadas in sa plaja intre su portu de Su Siccu e sa passizzada scalu de Sant’Elia.

A iscoperrere su corpus, a deghe metros dae sa riva, sunt bistados piscadores e zente chi faghiat su bagnu in cussu logu. In presse meda sunt arrivados sos Viglies de su Fogu po su recuberu de su corpus, sighidu dae s’arribu de sa politzia e de su 118, chi ant potidu solu cunfirmare chi su zovanu fit mortu. Su piccioccu teniat ancora sas iscarpas e sos pantalones curtzos, ma non teniat sa maglia. No presentaiat sinzos de violentzia.

Secundu sos primos pensamentos, intre su notte bi diat essere bistada una festa propriu in cussa plaja pitticca e franta, pagu attesu dae su coro de sa “movida” de sos zovanos de su portu turisticu de Su Siccu. Addurat peroe de accrarare si Mariano esserat deabberu intre sos partetzipantes a sa festa e, si custu est beru, itte potat essere capitadu in sas oras imbenientes.

Sa plaja in sa cale est bistadu agattadu su corpus, una limba de rena pitticca in daesegus de su molu de su portu, si podet segudare dae una caminera de terra chi partit dae su parchizu Coro, su mattessi impittadu dae sos tiffosos po sas partidas a sa Unipol Domus, s’Istadiu de su Casteddu. A curtzu si agattant puru s’istadiu bezzu e su Lazzaretto. Sa Politzia at fattu partire sas scruccullas po accrarare sos motivos de sa morte. Sunt gia bistados iscurtados sos familiares de su piccioccu e si est chircande de torrare a fraigare sas urtimas oras de sa vida sua.

Unu puntu de fundamentu de s’iscrucculla at essere de cumprendere si su piccioccu si siat istesiadu a sa sola, si si siat intesu male, o si bi siant bistados elementos de arriscu in sa serana. At essere importante sa resessia de lotomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22