Sa Sardigna at dae pagu attiradu s’attentzione de sa gasettera Laura Rysman, chi at dedicadu un’articulu longu a sa terra nostra po un’archida testera americana. Dae sos contos particulares, bessit a pizu in manera clara cantu siat bistada accisada e corpida dae sa bellesa e ricchesa culturale de s’isula, iscopertas in su mentres de su tribagliu de chirca po su petzu suo.

“ Fimmos imbitzados a nos cunsiderare rusticos, isolados in cust’isula arretrada” at nadu Venturino Vargiu, un’istoricu laicu locale, in su mentres de s’originale ispettaculu de donz’annu de costumenes populares de sa tzittade de sant’Efis. Ma sos sardos sunt incumintzande a cumprendere chi sa cultura nostra tenet unu valore reale po nois e po sos istranzos.

In Casteddu, custu rennovadu sensu de identidade si bogat a pizu cun d’unu isviluppu urbanu derettu a su turismu. Su cuarteri Marina, unu tempus de sos piscadores, oe est unu pipirudu mix de zente chi benit dae fora e zente chi b’istat dae meda tempus. Inoghe, s’architetto Boeri at disignadu una passizzada chi at a divennere unu parcu abborboradu accanta a su mare.

In pius, sunt fraigande sa linia de sa metropolitana lizera chi a gameddare sa Marina cun sa parte interna de Casteddu, e unu portu nou, chi si prevedid po su 2026, che at a istesiare sas naves de crociera pius attesu, permittinde puru a sos Yacht de arribare a su tzentru de sa tzittade, battinde opportunidades novas po s’accolomia.
Custu isviluppu de su turismu, bell’e gai, pesat dimandas supra su tempus benidore de sa regione. Po Casteddu e su mesudie, un’aundada de turismu podet essere una distrussione oppuru un’acchittu po una regione chi tenet pagas opportunidades. S’istoria de sa Costa Ismeralda, in su nord de sa Sardigna, chi est divennida unu logu po riccos, est unu ammunimentu e simbulu de commente su turismu potat cambiare s’iscrocca.

S’articulu de Rysman non si firmat in Casteddu, sa gasettera no che leat a iscoperrere atteros logos accisantes de s’isula commente Gergei,Barumini, su giardinu de sas pedras chi sonant de Sciola, Molentargius e Piscinas. Custos logos, riccos de istoria, arte e natura, sunt su coro chi toccheddat de una Sardigna si cheret mustrare a su mundu
chentza perdere sa berterera sua.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

S’ istòria e su signifficu de sa Bandela de sos Bator Moros

Sa bandela de sos Bator Moros est oe unu de sas  friguras prus reconnoschìbiles e caraterìsticas de sa Sardigna, espressione de una identidade istòrica, culturale e de s’iscrocca abbarbada in su tempus. Sa bandela si distinghet pro unu fundu biancu traessadu dae una rughe ruja e pro sas battor concas de moru cun sa benda, postos in sos bator cuartos, elementos chi nde faghent una frigura ùnica e  reconnoschìbile a sa lestra. Sas bessidas de sa bandera torrant a su Medievu, cando sa Sardigna faghiat parte de sa Corona de Aragona.

Segundu su connottu prus difùndidu, sas bator concas mustrant àteros soberanos musulmanos binchidos in su mentres de sa Batalla de Alcoraz, una binchida chi si narat siat istada possìbile gràtzias a s’interventu de Santu Zorzi. Su sìgnu cumparit pro sa prima borta in documentos uffitziales  de su XIII sèculu e fiat a pustis insertu in istemmàrios medievales, ispainende·si fintzas a foras de sas lacanas de sa penìsula ibèrica. In su cursu de sos sèculos, sa bandela at tentu medas mudaduras siat in su cuntestu gràficu siat in su signifficcu suo. In su mentres de su poderiu ispagnolu e a pustis in s’època de sa Domo de Savoia, sas bator concas ant sighidu a cumparire in monedas, documentos uffitziales e istemmas, cunservande su rolu issoro caraterìsticu de s’identidade isolana.

Sa posissione gràfica est cambiada in su tempus, cun variatziones in sas posissiones de sas concas, in sas espressiones de sas caras e in s’orientamentu de sas bendas, chi in calicuna versione fiant postas in sos ogros, in àteras in sa fronte.

Cun su afirmare·si de una  cussèntzia identitària noa, sa bandela de sos Bator Moros fiat torrada a iscoberrere comente sìgnu de sa Sardigna e de s’ istòria sua, passende su cuntestu aràldicu semplize e pigande unu signifficu prus fungudu ligadu a s’identidade regionale. In su 1952 sa bandela fiat adotada in manera uffitziale comente sìgnu de sa Regione Autònoma de sa Sardigna e a pustis, in su 1999, fiat deffinida sa versione de oe cun sas concas bendadas in sa fronte e bortadas cara a s’asta.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”