“S’impignu meu est totale:chertzo torrare a sinzare in doppia tzifra e bivere una cumpetissione commente interprete printzipale. Cando si creet abberu in d’unu intentu, prima o poi arribat. Mi intendo pius bivu che mai”.

Custas sunt sas paraulas de Leonardo Pavoletti. Oe, in su mentres de una cunferenzia istampa, s’attaccante de su Casteddu, friscu de cuntrattu nou po atteros duos annos, at affirmadu: “Chi gioghe oppuru no, appo semper dare su massimu po su Casteddu. Sa binchida faghet diventare tottu cantos pius galaverosos. Puru si su contribbudu meu at essere limitadu a sos urtimos deghe minutos de giogu, appo essere cuntentu su mattessi.”

Faghinde riferimentu a sa truppa noa, Pavoletti at mustradu cunfiantza:”Bio un’allenadore prenu de galabera. Mi so cumbinchidu chi nos at a ghiare in sa derettura de sos intentos nostros, commente at fattu Ranieri. Semus abberinde unu capitulu nou, cun giogadores chi sunt cuntentos de essere in Casteddu e capos novos chi sunt bessinde a pizzu.
Nicola,commente Ranieri, dat importantzia meda a sa truma: at a tribagliare po bogare a fora su menzus dae donzunu de nois.”

Pavoletti pustis at faeddadu de sa condissione sua fisiga e mentale:”Pustis de dos dannos chi mi ant dassadu attesu dae su campu, como m’intendo in forma e so prontu a dare tottu- Donzi allenamentu est un’occasione po mezzorare e mustrare su balore meu. Cherzo acchidare sa cunfiantza chi su club a postu in sa pessona mea, torrande a mi faghere su cuntrattu. Su determinu meu est a sos livellos pius artos.”

S’attaccante at puru bantadu s’ambiente e sos tiffosos. “S’azzudu de sos tiffosos nostros, non si podet creere. Intendere su calore insoro e s’incorazzamentu insoro est un’ispinta in pius po dare semper su massimu in su campu. Casteddu est una plata particulare, cun d’una passione unica. Cherimmos donare a issos allegria meda e puru suddisfassiones.”

Po finire, Pavoletti at cundivisu su pensieru suo supra su tempus benidore de s’isquadra. “Tenzo cunfiantza meda chi, cun su tribagliu de tottus e s’unidade de sa truma, ammos a podere accattare risurtados mannos. Tenimos giogadores de talentu meda e semus unidos. Donzi partida at essere una battalla, ma so cunbintu chi ammos a podere faghere bene.”

Cun custas dichiaras, Leonardo Pavoletti at mustradu non solu s’ambitzione personale sua, ma fintzas unu sentidu forte de appartennentzia e de responsabilidade po su club e sos tiffosos suos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sardigna in daesegus in sa classifica supra su clima e calidade de sa vida.

Su clima podet fittare supra sa calidade de sa vida in sas tzittades e sos datos prus reghentes lu cunfirmant fintzas pro sa Sardigna. In sa classifica de sas tzittades printzipales pubbricada dae su Sole 24 Ore, chi controllat sas cundissiones climaticas e su corpu supra sa vida de donzi die, carchi tzittade de s’isula si agattat in sa parte prus bassa de sa classifica natzionale.

In manera particulare est Carbonia a serrare sa classifica cun su 107° postu, s’urtimu intre sas tzittades printzipales esaminadas. S’istudiu leat in cussiderassione paritzos trattos de su clima pro cumprendere cantu sas cundissiones meteo potant influentzare su benessere de sas pessonas e sa vivibilidade de sos tzentros de sas tzittades. S’analisi si accottat supra 15 motivos ligados a su clima. Intre custos bi sunt s’intensidade de s’abba, su numeru de sas nottes in sas cales sa temperadura minima non calat sutta sos 20 grados, sas dies de cardu urtimu, sa presentzia de bentu in su mentres de s’istiu e s’umidesa de s’aria.

In su casu de Carbonia, secundu sos datos regortos, pesant mescamente sas temperaduras artas meda registradas in s’annu e su numeru minimadu de dies frittas o cun abba allongada. Custas cundissiones climaticas fittant supra su risurtadu finale de sa tzittade de su Sulcis chi si acciappat duncas a s’urtimu postu de sa classifica.

Est importante evidentziare chi s’istudiu si relatat a sos datos de su 2025 e non tenet contu de cantu accadessidu in sos primos meses de su 2026, cando totta sa Sardigna est bistada interessada dae una simana de abba prus bundante in cunfrontu a sa media de sos urtimos annos.Una cosa fora de norma de su clima chi at distintu s’incumintzu de s’annu ma chi non recuit in s’analisi impittada po faghere sa classifica.

Abbaidande su restu de sa classifica si nodat chi a sos primos postos si agattant mescamente tzittades supra su mare Adriaticu. A su primu postu de sa classifica bi est Bari. Sa classifica evidentziat comente su clima siat divenninde un’elementu semper prus importante cando si faeddat de calidade de sa vida in sas tzittades. Sas temperaduras artas meda, sos periodos de assuttura o a su contrariu de abba meda sunt cosas chi fittant supra sa salude, s’ambiente e supra sa vida de donzi die de sas pessonas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22