Lunis, 6 de maju est bistada una die istorica po Lanusei, pro itte at bidu s’avviu de sa prima andala “atzessibile” de su tottu in Sardigna, un’opera chi sinzat unu passu in daenanti importante meda a sa parte de s’incluisione.

Custu disignu istravanadu est bistadu imbentadu e fattu dae su Comune de Lanusei, paris cun s’Agenzia Forestas e su’accottu de sos fundos PSR(GAL Ozzastra) e POR FESR(Regione Autonoma de sa Sardigna, assessoradu a s’ambiente, Forestas). Est bistadu unu protzessu chia at dimandadu tempus, impignu e dinari, ma chi at battidu a sa creassione de un’andala tzertificada e posta in manera uffitziale in su catastu de sas andalas regionales RES.

S’Andala Segura est meda pius de unu caminu simple; est un’esperientzia incluisiva chi abbratzat sa diversidade de sos omines, favoressende s’incluisividade sotziale e chircat de garantire s’agualidade de intrada po tottus.Cun d’una longaria de 1,6 km, custu percursu a forma de aneddu si innoigat in d’unu pianu graniticu artu de su monte Seleni, a milli metros supra su mare.

Su chi arrendit s’Andala Segura unicu, est sa grande accessibilidade, disignada po azzuare sas pessonas chi sunt marturas e non si podent movere, o de sos sensos e chi non cumprendent meda. Donzi afficcu est
bistadu curatu cun attentzione meda po garantire un’usu a sa sola, o cun assistentzia.

Su caminu est postu po su 90% in mesu de palos inue iscudere sos fustes, garantinde sa sicuresa po sos chi no bient o bient pagu. In pius, bi sunt puru accottos chi si podent toccare.

Po rendere su caminu meda pius atzessibile, bi at essere puru una carrotzedda chi andata a elettritzidade puru fora de su caminu, permittinde a meda pessonas de godire de su tottu de custa esperientzia in mesu de sa natura.

Su nomene” Andala Segura” muttit torra unu sensu de siguresa e cunfiantza, trasmittinde s’idea de unu caminu chi accollit e diffendet. Su trassadu de Andala Segura apparat non solu un’esperientzia de natura e bellesa de sa bista, ma puru sa possibilidade de iscumbattare chirros de interessiu po s’archeologia commente su nuraghe Gennacili e sas duas tumbas de gigantes. In pius, sos visitadores ant a tennere s’occasione de iscoperrere operas de arte de s’ambiente commente “Sa poesia abbaidat attesu” de Stefania Lai.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Ozzastra terra de istoria: sos printzipales sitos archeologicos de bisitare intre nuraghes,biddas antigas e monumentos de sa tzivilidade nuragica.

S’Ozzastra est una de sas zuras de sa Sardigna prus riccas de istoria antiga. In cust’iscrocca si agattant sitos archeologicos meda chi contant sa vida de sas populassiones chi istaiant in s’isula mizza e mizza de annos faghet.

Intre montes, campedas e campagnas si podent biere nuraghes, tumbas de tzigantes, tumbas antigas irfossadas in sa rocca e restos de biddas. Bisitare custos logos est commente faghere unu biazu in su passadu e connoschere menzus s’istoria de sa Sardigna e de sas tzivilidades chi ant bividu s’isula prima de s’arrivu de sos romanos.

Unu de sos sitos prus connoschidos est su Nuraghe Ruinas, chi si agattat in s’iscrocca de Arzana. Custu nuraghe est unu de sos prus artos de sa Sardigna e si agattat in d’una posissione crara dae sa cale si podent biere sos montes de su Gennargentu. In s’iscrocca de Triei si agattat sa Tumba de sos Tzigantes de Osono, unu de sos monumentos de interru prus importantes de s’Ozzastra. Un’atteru situ interessante meda si agattat in s’iscrocca de Bari Sardo, inube bi est su Nuraghe Sellersu. In s’iscrocca de Cardedu si agattat invetzes sa Necropoli de Monte Arista, una zura in sa cale sunt bistadas agattadas tumbas meda irfossadas in sa rocca.

Intre sos sitos prus importantes de s’Ozzastra bi est fintzas su cumplessu archeologicu de s’Ortali’e su Monti, in s’iscrocca de Tortolì. Si trattat de unu de sos sitos prus bisitados de sa zura e accansat monumentos divressos intre sos cales unu nuraghe mannu, una tumba de sos tzigantes e restos de biddas antigas. Importante meda est fintzas su situ archeologicu de s’Arcu ‘ e is Forros, in s’iscrocca de Villagrande Strisaili. Custu logu fuit una bidda nuragica manna chi in passadu teniat fintzas unu rolu religiosu e de negossiu. Sos archeologos ant agattadu restos de cresias, magasinos e buttegas po tribagliare sos metallos.

S’Ozzastra est duncas un terra ricca de testimonzas archeologicas chi permittint de iscoperrere s’istoria prus antiga de sa Sardigna. Sos nuraghes, sas tumbas e sas biddas antigas sunt unu patrimoniu pretziosu meda chi contat s’issida de s’isula. Bisitare custos logos cheret narrere connoschere menzus su tempus passadu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22