Matteu Gregorio, aggiudadore in su mare de sa Guardia Costiera Italiana, e bragosu delegadu de sa lughente regione de s’Ozzastra, si est preparande a incumintzare una noa mannosa isfida, poninde a sa proa su coraggiu e su determinu sou, partetzipande a unu Ironman.

S’Ironman, una de sas cumpetissiones pius colossales in su mundu de s’isporto, dimandat una caraffale fortza de su fisicu e de sa mente. Bisonzat nadare po 4 kilometros, sighidos dae 180 kilometros in bicicretta e po finire cun d’una maratona de 42 kilometros a pe, custa gara no est solu una porfia contra sos atteros, ma puru una battalla cuntra a tie ettottu, un’opportutinade de binchere sos limites de onzunu, e de conchistare atteros iscopos e de iscumbattare logos fintzas a commo non connoschidos.

Po Matteu, custa abbentura a s’urtimu non est noa. Pustis de aere affrontadu s’Everest Challenge,pedalande po 270 kilometros e binchinde unu iscartu de 9.000 metros in 20 oras, e pustis de aere ghiradu sa Sardigna a sa sola in 4 dies, si est preparande commo a faghere un’attera impresa chena cabudiana, cun s’Ironman de Cervia, chi si deppet faghere in su mese de Capidanni de cust’annu.

Bell’e gai, Gregorio ischit bene chi non podet affrontare custas porfias a sa sola. Sa preparassione po unu Ironman, dimandat unu impignu mannu meda, non solu po su fisicu, ma puru po ordiminzare, po addestramentu e po s’assentu. Est po custu,chi tenet bisonzu de collaboradores e sponsor chi li pottant dare s’accottu chi serbit in s’organissasione e in s’assentu, po garantire chi tottu siat fattu in manera zusta.

Ma Matteu no est solu unu isportivu carraffale; est puru unu ambasciadore de sa resistentzia e de su determinu. S’istoria sua est un’ispirassione po tottu cussos chi si cherent ispinghere addìa a sos limites insoro, cumproande chi cun dedissione, impignu e s’ accottu zustu, est possibile de binchere sas isfidas pius mannas e accattare sos risurtados chi non si podent creere.

Gai, in su mentres chi si est preparande a faghere custa noa mannosa isfida, Matteu Gregorio, non solu si est allenande po una porfia isportiva, ma est puru preparande su terrinu po ispirare sos atteros e cumproare chi nudda est privadu cando si tenet sa determina zusta e su coraggiu de si ponnere a sa proa.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa Grutta de sa Pipera de Casteddu, intre istoria e paristoria.

A pagos passos dae su tzentru de Casteddu, accanta a sa carrela chi che leat a su campusantu de Tuvixeddu, si agattat unu de sos monumentos pius ammaghiantes e prenos de misteru de sa tzittade:sa Grutta de sa Pipera. Est unu sepurcu romanu iscavadu in sa rocca, de su I° seculu d.C., divennidu tzelebre no solu po sa bellesa architettonica sua ma fintzas po sa paristoria chi lu inghiriat.

Sa tumba fuit bistada fatta fraigare dae Lucio Cassio Filippo, nobile romanu chi arribaiat dae Cartagine, po sa muzzere Atilia Pomptilla, morta in Casteddu in su mentres de su disterru de su maridu. Sas iscrissiones intro de su sepurcu contant un’istoria de amore e devossione: secundu su connottu, Pomptilla diat aere donadu sa vida sua a sos deus po sarbare cussa de su maridu, chi si fuit ismalaidadu in su mentres chi fuit in Sardigna. Ma su chi rendet sa Grutta ancora pius enimmatica est sa presentzia, isculpida in sa fatzada, de duos terpentes imboligados.

Dae inoghe naschet su nomene “Grutta de sa Pipera”. In su tempus, a inghiriu de cussas friguras sun bennidos a pizu paritzos contos populares. Bi est chie at interpretadu sos terpentes comente conas de eternidade e protessione de s’anima de sos mortos, atteros bi ant bidu unu zubilu a sos cultos de s’antiga Roma o unu signu magicu capatze de che istesiare sos ispiritos malos.

Oe sa Grutta de sa Pipera est unu de sos logos archeologicos pius bisitados de Casteddu e sighit a esercitare un’ammaju forte supra sos bisitadores. S’aera sua suspesa intre contu e istoria, s’amore eternu chi ligat Pomptilla e Lucio Cassio Filippo e s’aria de misteru de duos terpentes isculpidos in sa pedra faghent de custu logu una cona de sa tzittade, capatze de contare no solu unu picculu de s’istoria romana sua ma fintzas sa fortza chi non morit de sas paristorias chi resistint a su tempus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22