Sa presidente de sa Regione, Alessandra Todde, at incumintzadu sas proceduras po sa cunvocatzione de su Cunsizzu Regionale de sa Sardigna, determinande sa die po su prossimu martis 9 Aprile a sas 10.30. Custu incontru importante meda, sinzat su cumminzu uffitziale de sa XVII legisladura, unu momentu detzisivu in su cale si ant a diliniare sas regulas e sos disignos po su guvernu de sa Regione in sos annos chi ant a sighire.

In mesu de sos primos puntos a s’ordine de su die, su Cunsizzu at essere giammadu a fraigare s’Uffitziu de Presidentzia de s’additzu, unu coladorzu fundamentale po faghere partire s’attividade legisladiva. Ant a sighire sas
comunicatziones de su Presidente de su momentu de su Cunsizzu Regionale e su giuramentu de sos Cunsizzeris, chi at a sinzare s’accrarimentu de sos incarrigos insoro.

Pius a tardu, ant a dare logu puru a sas comunicatziones de sa Presidente de sa Regione e a su giuramentu de sos assessores, faghinde partire su processu de formassione de su guvernu regionale.

Aspettande custu momentu mattanosu, sa Presidente Todde, at evidentziadu s’importantzia de arrivare a s’assemidamentu, cun d’una iscuadra cumprida e chi siat pronta a accommettare sas porfias chi ispettant sa Regione.”Semmus tambene deffininde sos urtimos elementos”, at nadu a sos gasetteris, a pustis de unu addobiu cun sos

Progressistas, evidentziande s’impignu po garantire unu guvernu forte e chi siat prontu a fachere. Su processu de cumposissione de s’iscuadra de guvernu, dimandat una baludassione abbizzosa meda, po sas divressas traccujosas, dae sas cumpetentzias propias a sos bisonzos de s’iscrocca e de zenia. Bell’e gai, s’azzudu de sas fortzas politicas est bistadu affiguradu commente leale e limpidu dae sa Presidente Todde, chi at ringratziadu po s’accottu retzidu in sas chidas passadas.

In mesu de sas fortzas politicas interessadas, sos Progressistas portant unu rolu importante meda e si prenettat chi ant a tennere una posissione importante meda in su cunsizzu chi si at a faghere. Luciano Uras, at cunfirmadu chi sos Progressistas ant essere bistos in manera naturale, evidentziande su contribbudu detzisivu de s’alliantza.

“Semus prontos a deffinire in manera chi non si potat cumprendere male, su fraicu de s’iscuadra de guvernu, a sa cale intzidimmos cun tottu sos titulos” at aggiuntu, evidentziande puru sa rechesta de una intzidida larga e cundivisa de tottu s’alliantza a su guvernu de totta sa Regione.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa bela manna torrat in Sardigna, s’isula at accasazzare una tappa prima de s’Americas Cup n°38.

Sa bela manna internatzionale est pronta a torrare in Sardigna. S’isula at accasazzare difattis sa prima gara de ammaniada de sa 38° Americas Cup, abbenimentu chi at a finire cun s’assignadura de su premiu in Napoli in su mese de Triulas 2027. Sa Regione at accraradu s’accordu chi at a permittere a sa Sardigna de bintrare pro sa prima borta in s’istoria de sa cumpetissione de sa bela prus de archida a su mundu.

Mancari sos particulares organissativos non siant bistados ancora deffinidos de su tottu, su logu prus probabbile de sa gara est Casteddu. Sa tzittade printzipale sarda est dae annos sa base de sas operassiones de Luna Rossa e est cussideradu unu de sos campos de gara ideales pro sas cundissiones de su bentu, calidade de sas abbas e logos de appozzu, elementos de fundamentu po accasazzare abbenimentos de custu livellu.

Pro sa Sardigna si trattat de una ghirada ispettata po meda tempus. Sas World Series de s’Americas Cup aiant giai iffrisadu s’isula in su tempus passadu, ma chentza mai esecutare. Una prima tentada est de su 2020, cando s’abbenimentu fuit bistadu iscancelladu pro su Covid. Una secunda occasione fuit prevedida po su mese de Santuaini 2023, cun garas in disignu dae su 12 a su 15 de su mese, ma fintzas in cussu casu tottu est bistadu annuddadu  meda tempus prima, intre condierros e tesones intre sa Regione e sos ordiminzadores neozelandesos, chi aiant battidu a sa
tramuda de sas garas in Jedda, in Arabia Saudita.

Sa delusione fuit pustis accreschida cun s’assignadura de sa 38° Americas Cup a Napoli, unu seperu chi aiat addescadu fintzas una dibatta importante de sa politica. Sa preparassione  chi si depet faghere in Sardigna est ora una ispecie de riscattu po s’isula, chi at a podere accasazzare sas primas garas uffitziales de su ciclu novu de sa cumpetissione e torrare a su tzentru de su giru belicu internatzionale.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22