Su 2024 sighit a essere un’annu de triunfos e acclamadas po s’Accademia Olearia, una ditta chi est in s’Alighera, e si est annodditande in su mundu de sa laurantza siat a livellu natzionale e puru internatzionale. Sas urtimas notissias chi sunt arrivadas dae su Friuli Venezia Giulia, ghiriana sa premiassione de s’Ozzu Extravergine Dop Sardigna Biologicu a su cuncursu Ozzu Capitale, unu accadessimentu de grandesa, ordimizadu dae sa Camera de Cummerciu de cussu zassu.

S’ozzu sardu, de s’Alighera, est bessidu primu in sa classe Fruttato Medio, cunfirmande s’estremadia de sa produssione de s’Accademia Olearia. Ma sos bantos non finint inoghe. In su mentres de s’Italia Capitale Expo, unu de sos addobios pius importantes dedicados a sos extravergines de calidade, chi est commo in Trieste, atteros duos produttos des’Accademia Olearia, ant rezzidu unu mentovu de onore dae s’organissasione Nazionale Assaggiatori Olio di Oliva.

Si trattat de sa “Riserva del Produttore” Sardigna Dop e de su Biologicu, chi sunt atteras testimoniantzas de s’abilidade e de sa dedissione chi annodditant custa ditta.

Custos reconnoschimentos arrivados dae pagu tempus, si aggiunghent a una filera de premios de importu conchistados in sos primos meses de s’annu, chi battint orgogliu a tottu s’isula nostra. Accademia Olearia at rezzidu sas disizadas 5 istiddas dae sa Guida Bibenda, chi est cunsiderada un’autoridade in sa setzione de s’enogastronomia, po tres de sos produttos suos: su Gran Riserva Giuseppe Fois, su Dop Sardigna Biologicu Fruttadu Birde e su Monocultivar Bosana.

Tottas tres sunt bistados incluidos in sa ghia de grandesa a sas de estremadia de su Made in Italy, cunfirmande sa calidade arta de sos produttos de sa ditta. Galu sos Italy Food Awards, cunsiderados s’Oscar de su campu agroalimentare de s’Italia, ant collogadu s’Accademia Olearia a su primu postu de sos produttores de ozzu.

Su cuncursu Monocultivareoliveoil, bideadu dae s’espertu de custu campu, Gino Celletti, at dadu punteggios de importu mannu a su Dop Sardigna Biologicu in sa classe “Bio 2024”, cun d’unu perfettu 10, e a su Monocultivar Bosana in sa classe “Expo 2024”, cun d’unu atteru 9,8 chi at impressionadu meda. Pustis de unu 2023 prenu de sutzessos e rajas noas, puru s’annu nou promittit duncas de essere un’annu de triunfos po s’Accademia Olearia,cunfirmande non solu sa calidade de sos produttos suos, ma puru s’impignu e sa passione de tottu s’iscuadra chi tribagliat in manera inscansabbile po segudare s’eccellentzia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”