S’urtima puntada de su programma televisivu “Alessandro Borghese 4 ristorantes”, registradu carchi mese faghede e trasmittidu po sa prima orta supra de Sky e cun su streaming in su canale Now, dominica 14 de ennarzu 2024, nos ada fattu iere s’Ozzastra incantada, in sa costa orientale de sa Sardigna.

In s’urtima puntada su coghineri Alessandro Borghese, ada conduidu sos ispettadores in d’una bera ispegulizada de sos mandigos, bintrande intro de sa traditzione de sa gastronomia de sa regione nostra. Custu viaggiu c’ada leadu Borghese a assazzare tottu sas cosas bonas de sos battoro ristorantes ozzastrinos, onzunu cun sa proposta sua unica e sa caratteristica chi lu faghet connoschere.

Sos chi ana intzidadu a su disaffiu, fini battoro prendas de sa cosa de mandigare: “Sa cadrea” de propriedade de Emanuela in Santa Maria Navarrese, chi ada delissiadu cun prattoso de su connottu presentados in manera moderna e cun d’unu panorama chi che ogada s’alenu, supra su mare; su ristorante Abba E’Murta”, dirigidu dae Carla, affundadu in sa natura, chi ada preparadu una coghina simple e sinchera in d’unu ambiente mangone; Al Porticciolo de Frantzisca, ispecilizzadu in coghina mediterranea de pische, assentadu in su portu pitticcu de Arbatax, cun d’una suttea chi si accarada supra de su mare; e “Incontro di Vino”, de Teresa, accosta a su purtu de Tortolì, chi ada preparadu una coghina de sa tradissione chenza arrepiccoso.

Sas regulasa de custa cumpetissione sunu adduradasa sas mattessi: sos battoro ristoradorese si sunu disaffiados po conchistare su titulu de su menzus in d’una categoria dillindada. Sa valutazione de su famadu coghineri Borghese, alcansaiana sa limpidoria de sa coghina, e su servitziu in su pastu, e in su mentres sos atteros ana dadu sos votos a sos pratos, a sos ristorantes, a su menu, a su servissiu e a cantu toccaiat de pagare. Un’atteru disaffiu ada postu in pare tottas battoro sos cuncorrentes, po si cunfrontare supra unu prattu chi aida fattu connoschere s’iscrocca, cun sos culurgiones chi sunu bistados sos prus importantes chenza nisciuna
duda.

A sa fine de tottu, su ristorante “Sa cadrea” ada binchidu, arrivande primu. Segundu est arrivadu S’Abba E’ Sa Murta”, sighidu dae “Incontro di Vino” e “Il porticciolo” urtimu.

In tottu sa puntada bi sunu bistados meda momentos chi no si podene malograre, ma nois prefferimmos non bos bogare a campu troppu, pro non bos arruinare s’ispantu, si mancari cheridese recuberare sa puntada. Bos augurammos una visione bona e de bos godire s’emossione de su mundu de sa coghina de s’Ozzastra.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22

Sa torrada de s’ora legale intre vantazos praticos e discumbenios pitticcos a s’incumintzu.

Cun s’arrivu de su beranu torrat fintzas una de sas mudas prus nodidas de s’annu. In sa notte intre sapadu 28 e dominica 29 martu sas lantzittas de sos relozos ant devere essere movidas a daenantis de un’ora. Custu determinat una notte prus curza e duncas un’ora de sonnu in mancus, mancari pro chie impittat telefoneddos e computer su coladorzu at essere in automaticu chenza deppere intervennere.

S’ora legale bi est in Italia dae su 1966. Est bistada fatta po irfruttare menzus sa lughe de su sole in sos meses de beranu e istiu, cando sas dies si allonghiant. Poninde a daenantis s’orariu si tenet prus lughe in sas oras de su sero, minimande gai sa netzessidade de impittare sa lughe artifitziale. Custa cosa battit beneffissios importantes.

Su primu est pro su risparmiu de energia, pro itte si azzendent prus pagu sas lughes in sas domos e sas tzittades, minimande gai sa netzessidade. Ma no est s’unica cosa positiva. Sas dies parent prus longas e custu cambiat fintzas sos imbitzos de sas pessonas. Si tenet prus tempus po istare in fora, po faghere attividade fisica oppuru pro si abbambiai pustis de su tribagliu o s’iscola. Fintzas sa vida sotziale nde tenet unu vantazu.

Non bisonzat peroe de s’ismentigare sas cosa prus pagu positivas. Sa muda de s’orariu podet creare carchi difficultade in sas primas dies. Carchi pessona s’intendet prus istracca,faghet fadiga a s’indischidare su manzanu o tenet problemas a si drommire su sero. Podent apparessire fintzas alteriosidade e difficultade a si cuncentrare. Sas pessonas prus sensibiles sunt a s’ispissu sos pitzinnos, sas pessones giai istraccas e chie tenet problemas de sonnu.

Pro issos, s’abesare dimandat carchi die in prus. Mancari custos problemas a s’incumintzu, s’ora legale sighit a essere impittada pro itte sos benefissios totales sunt cussiderados prus mannos. Pustis de pagas dies su numeru prus mannu de pessones si abbituat a s’orariu novu e torrat a incumintzare sas attividades chena problemas particulares.

Pro congruire, su coladorzu a s’ora legale est unu cambiu pitticcu chi dimandat unu tempus curtzu pro si adattare, ma chi apparat acchittos beros in sa vida de donzi die. Seros prus longos,impittu prus mannu de sa lughe naturale e sas opportunidades de bistare in fora faghent de custu tempus unu de sos prus appretziados de s’annu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22