S’Arbutzu, connotu fintzas comente  Cadrilloi, Cadrillòni, Cadilloni, Cadrigione, Irbutu, Ischiria, Iscraria, est una mata connota meda in sas traditziones de sa Sardigna. Cun su  frore suo, custu fundu ispontàneu de sa mantza mediterrànea tenet unu ruolu màgicu e cun meda impreos in sa cultura isolana.

Cumintzat a frorire in maju. Unu tempus, in sas domos sardas, non mancaiant mai sas cranistas cun s’arbutzu in sos cabidales de sas isposas. Custas cranistas, cun formas e mannària diferentes, fiant essentziales pro sas fainas fitianas in coghina e pro sa traballadura de su pane e de àteros alimentos preparados in domo. Sos frustigos de arbutzu, robustos e mujaditos, costituiant sa matèria prima pro sa realizatzione de custas cranistas, ma non pro custu ebbia: su frore istilizadu fiat impreadu a s’ispissu in traballos de recramu e tessidura, arrichende su patrimòniu artìsticu e artesanale de s’ìsula.

S’Arbutzu s’impreaiat fintzas pro abrontare su màndigu. Sa patata cora suta de sa chisina, rapresentaiat una risursa pro sas classes prus pòberitas,  cumpletende pastos modestos. Sos rebuddos friscos de su cambu, ammaniados in vàrias maneras, deveniant parte de su màndigu de onga die, unidos a àteros vegetales e ortalìtzias. Sas fògias friscas, imbetzes, fiant impreadas pro imboligare formas piticas de casu, lis donede a sos nidolos unu sabire e unu nuscu partcuculae, chi istesiaiat fintzas sos babbois.

In prus de sas calidades alimentares suas, s’arbutzu possedit propiedades benèficas pro sa pedde. Sas fògias suas sunt impreadas pro infriscare sa pedde e pro curare sas brusiaduras causadas dae su sole. In su Medioevu, s’arbutzu fiat devènnidu un’alleadu pretziosu pro sa bellesa de sas fèminas, pro ite s’impitaiat pro nde peare sas mantzas de sa pedde, comente sas lentìgias.

Ancora oe, s’Arbutzu est assotziadu a creìngios antigos: si creiat chi custu fundu poderet agire comente rimèdiu pro abenenamentos o ispìtzulos de babbois velenosos, una traditzione chi tenet raighinas in sas influèntzias de sos Gregos e de sos Romanos, lòmpidos a Sardigna. In sa mitologia grega, s’arbutzu beniat postu a inghìriu de sas tumbas, pro more chi si creiat chi agiudaret sos mortos pro su biàgiu in s’aldilà.

In su cuntestu cristianu, su cambu de s’arbutzu leat su nùmene de “Bàculu de Santu Giosepe”. Sa paristòria  contat chi Santu Giosepe, a sa chirca de unu maridu pro Maria, giughiat unu bàculu de arbutzu chi aiat froridu in modu meraculosu, inditende in custa manera s’isposu adatu pro Maria.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Iscoperta una necropoli in su Nord Sardignain su mentres de sos tribaglios po un’approntu solare.

Un’iscoperta archeologica importante meda est bistada fatta in su Nord Sardigna in su mentres de tribaglios ligados a sa produssione de energia pulida. In sa zura industriale de truncu Reale-Sant’Agostino, accanta a Tattari,sos iscavos de ammaniada pro fraigare un’approntu solare ant fattu bessire a pizu una necropoli chi fintzas a oe non fuit bistada mai iscoperta.

S’accattu est sutzessu in sa zura curada dae su Consorziu Industriale de Tattari. Sos iscavos sunt incumintzados in su mese de martu de su 2024, cando sunt bistados cunviados sos controllos de su terrinu prima de fraigare s’impiantu. In su mentres de custos controllos sos archeologos ant acciappidu istrutturas sutta de terra e, sighinde cun sos iscavos, ant cumpresu chi si trattaiat de unu logu antigu de tumba.

Secundu su chi pensant sos espertos, su logu est importante meda po s’istoria e s’iscentzia. In sa zura sunt bistadas agattadas tres tumbas mannas iscavadas in sa rocca, istrutturas mannas chi faghent pensare a tumbas de balore mannu po sas populatziones chi biviant in custa zura in s’antichidade. S’iscoperta est fintzas prus interessante pro sa presentzia de decorassiones fittadas supra sas barras’e muru de sas tumbas. Si trattat de signos e pintas fittados in sa rocca in sos seculos passados. Custa fittadas faghiant parte de su connottu de sos interros de sas populatziones antigas de sa Sardigna e a s’ispissu teniant unu signifficu simbolicu o religiosu.

Po sos istudiosos custos elementos sunt importantes meda pro itte podent azzuare a cumprendere menzus comente biviant sas comunidades de su tempus passadu e cale esserant sas credentzias insoro. Sas tumbas e sas decorassiones diant podere dare novas supra su connottu, sa cultura e sa vida de sas pessonas chi biviant in s’iscrocca tattaresa mizza e mizza de annos faghet.

Sos archeologos ant a sighire a istudiare sa zura e analizzare tottu su chi est bistadu acciappidu in su mentres de sos iscavos. Donzi particulare novu diat podere accreschere sas informatziones chi serbint pro fraigare s’istoria de su logu. Custa iscoperta mustrat un’attera borta cantu sa Sardigna siat ricca de testimonzas de su passadu. Fintzas in su mentres de tribaglios modernos, comente cussos ligados a sa produssione de energia, podet capitare de acciappare andalas de tziviltades antigas meda chi contant s’istoria longa de s’isula.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22