Una die de festa durante da sagra de sa Cantzofa in su Campidanu de Casteddu est istada treulada dae s’iscoberta de unu produt agrìculu particulare. Unu bendidore casteddàiu, titulare de un’azienda agrìcula locale, est istadu denuntziadu dae sos Carabineris pro àere postu in bèndida marijuana, fortzis de sa casta “light”, in una bancarella dedicada a sas ortalìtzias e a sa gastronomia locale.

Durante sas dies de sa sagra sos Carabineris de s’Istatzione de Bidda de Sorris ant agatadu dughentos gramos de marijuana chi fiant espostos in unu boto de bidru, acuados intre sos produtos agrìculos. A s’agabbu de sas indàgines, su titulare de sa parada est istadu denuntziadu pro produtzione e detentzione de droga, violende sos disponimentos pro su coltivu e sa filera agro-industriale de sa marijuana legale.

Su pitzocu de 35 annos gestit un’azienda agrìcula in su Campidanu de Mesu, ma s’ausèntzia de autorizatziones pro sa bèndida de canapa sativa ligera est istupada a foras durante su controllu de sos Carabineris. Nointames aeret presentadu unas cantas faturas chi pertocaiant s’achistu de su sèmene de cannabis legale, cun unu THC prus bàsciu de  su 0,6% segundu sos paràmetros europeos, non possediat s’autorizatzione netzessària.

Sa chirca s’est ammanniada cun sa collaboratzione de sos Carabineris de Samassi, Nuràminis e Gùspini, chi ant fatu inghesta in s’azienda de s’òmine. Resurtadu: s’ausèntzia de su còdighe “ATECO” netzessàriu pro sa produtzione legale de cannabis.

Su fatu como at a èssere ogetu de àteros  esàmenes de laboratòriu, pro disponimentu de sa Procura de sa Repùblica de su Tribunale de Casteddu, pro averguare sa natura e sa tossitzidade de sa sustàntzia secuestrada. S’in casu si rivelaret una sustàntzia vietada, s’indagadu diat pòdere afrontare una cundenna penale pro produtzione e detentzione de droga. Difatis, fintzas pro sa marijuana legale, comente si siat, sa collida e sa bèndida durante sas sagras sunt proibidas.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa proposta de leze Pratobello 24 arribat in Cunsizzu regionale:partit s’iter istitutzionale.

Sa proposta de leze de initziativa populare Pratobello 24 bintrat in finis in su caminu istitutzionale de su Cunsizzu regionale de sa Sardigna. Su presidente de su Cunsizzu, Piero Comandini, at accraradu s’imbiada de su testu a sas cummissiones cumpetentes, faghinde partire s’iter de s’esamene chi prevedit su regulamentu de su Cunsizzu e marcande unu coladorzu isettadu dae meses dae sos chi ant poderadu s’initziativa.

Est unu risurtadu importante no solu supra su pianu de sas protzeduras, ma puru politicu e de signifficu. Pratobello 24 naschet, difattis, dae unu appellu populare mannu e partetzipadu: in s’istiu de su 2024 sos obreris fundadores ant regortu 211.000 frimas in tottu s’isula, unu numeru istravanadu chi testimonzat s’interessiu e sa partetzipassione deretta de una parte manna de sa cittadinantzia supra sos temas a su tzentru de sa proposta.

Cun s’assignadura a sas Cummissiones, si aberit como unu mamentu de cunfrontu e devuccamentu. In su mentres de sos tribaglios istruttorios ant essere iscurtados sos delegados de sos comitados chi ant fattu partire s’initziativa, chi ant podere faghere intendere sas resones insoro, e sos intentos de sa proposta de leze, naschida dae s’imbassu e fraigada po mesu de unu percursu de partetzipassione isparta. Sos ascurtos ant essere unu mamentu crae po garantire unu faeddu derettu
intre istitutziones regionales e tzittadinos, in su signu de trasparentzia e cundivisione.

Sas Cummissiones ant aere sa faina de controllare su testu, baludare sas osservatziones o probostas de modifica e faghere sa relatzione po la faghere arribare in Aula. Solu a s’accabbu de custu coladorzu sa proposta at podere essere chistionada e votada dae su Cunsizzu regionale, giammadu a narrere su parrere suo supra de un’initziativa chi at giai mustradu una lezittimassione populare manna meda.

S’intrada formale de Pratobello 24 in Cunsizzu regionale est duncas unu coladorzu importante in su caminu legislativu sou e unu bancu de proa po sos istrumentos de democratzia de intzidida chi prevedint sas lezes regionales. Unu signale importante fintzas supra su rolu de sos tzittadinos in sas detzisiones, giamados no solu a espressare cunsensu, ma fintzas a dare unu contribbudu in manera attiva a su fraigu de sas politicas pubbricas chi appartennent a su tempus benidore de sa Sardigna.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22