Tortolì est acanta de assistire a sa renàschida de su cumplessu isportivu suo, su de Zinnias Totu custu gràtzias a unu investimentu mannu de 250 mìgia èuros donados dae sa Regione Autònoma de Sardigna.

Custu finantziamentu marcat su cumintzu de una trasformatzione ambitziosa chi punnat a trasformare s’atuale impiantu in una moderna istrutura multifuntzionale, destinada a devènnere su coro de sa faina isportiva tzitadina e su tzentru vitale de sas atividades pro sas giòvanas e sos giòvanos tortoliesos e ogiastrinos.

Sa novidade prus significativa est s’introdutzione de s’atlètica ligera, in totus sas disciplinas suas, chi at a acostagiare su fùbbalu. S’istrutura s’avanguàrdia, non s’at a limitare a su campu de fùbbalu, ma s’at a allargare finas a nde boddire totu s’àrea a ingìriu, cun s’obietivu de interessare pessones de totu sas edades in sa pràtica de sa faina fìsica, promovende salude e disaogu.

Su progeto, chi est istadu bòlidu meda dae su sìndigu de Tortolì, Marcello Ladu, andat prus addae meda de su fùbbalu, abbratzende disciplinas comente su basket e sa botza a bolu trasformende su cumplessu isportivu in una biddighedda isportiva cumpleta. Ladu sutalìniat sa bisione a 360 grados de custa initziativa, chi rapresentat petzi sa prima fase de unu pranu de finantziamentu chi punnat a cròmpere unu totale de 2,5 milliones de èuros. Custu investimentu ambitziosu promitet de signare un’era noa pro sos apassionados de isport e pro totu comunidade de Tortuelie.

Sa trasformatzione de su cumplessu isportivu de Zinnias no at a pertocare petzi s’aspetu fìsicu de s’impiantu, ma at a rapresentare unu càmbiu de prospetiva pro sa comunidade, animende s’unione, sa passione e sa vida a traessu de sa pràtica isportiva. Cun custu progetu, Tortolì s’abrontat a devènnere unu puntu de riferimentu pro sos amantiosos de s’isport, oferende infrastruturas modernas e bene atretzadas pro satisfàghere sos bisòngios diversos de sa comunidade locale e fintzas de sas biddas a inghìriu.

 “Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Nugoro,un’ambulatoriu novu po s’iscoperta de sa maladia de su tunnel carpale.

Sa setzione de Neurochirurgia de Nugoro at attivadu un’ambulatoriu novu dedicadu a s’iscoperta de sa maladia de su tunnel carpale, una de sas neuropatias pius presentes e chi inbalidant. Su disignu est bistadu possibile gratzias a s’arrivu de unu elettromiografu de urtima ingendra, comporadu cun fundos regionales, chi permittit de faghere esamenes de pretzisione manna supra sa velocidade de condussione motoria e de attibiscione.

S’istrumentu permittit de ottennere datos fidantziosos e lestros, mezzorande sa calidade de s’iscoperta de sa maladia e sa lestresa de s’interventu po la curare.

Donzi mercuris benint fattos otto esamenes cumpletos , cun su mattessi numeru de malaidos. In su mattessi mamentu de sa balutazione de cunfirma,su duttore ispecialista aberguadat si serbit un’operassione. In casu de risposta affirmadiva, su malaidu benit postu derettu in sa lista de sas operassiones, minimande sos tempos de isettu e faghinde divennere pius simple su caminu sanidariu.

Sinitziativa, naschet cun s’intentu de minimare sas listas de isettu non solu po s’iscrocca nugoresa, ma fintzas po tottu su cadinu de su tzentru-nord Sardigna.Su servitziu novu offerrit a sos malaidos una resposta lestra e cualifficada a una maladia isparta, chi si no benit curada, podet cumpromittire in manera importante sa calidade de sa vida.

Intro de s’ambuladoriu est fintzas possibile de iscoperrere atteras maladias chi appisturant su sistema de sos nerbios foranu,comente sas maladias de ingorramentu de su nerbiu ulnare, accreschinde sa possibilidade de l’iscoperrere a sa lestra e de essere controlladu dae s’ispecialista. Sos malaidos si podent accostare a su servitziu prenotande po mesu de su Cup, presentande s’impegnativa de su duttore insoro. Cun custa attvidade nova,sa Neurochirurgia de Nugoro si cunfirmat unu logu de relata po s’assistentzia ispecialistica e su mezzoramentu sanidariu,auninde tennologia avantzada e attentzione bera a sos bisonzos de sos tzittadinos.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”