S’istilista sarda, Elena Pes, est acanta printzipiare unu passu de importu mannu in sa carriera sua, giughende sa creatividade sua a s’importante cuncursu Miss Europe. A 35 annos ebbia, custa giòvana fèmina de Cuartu at fatu unu percursu istraordinàriu, trasformende sa passione sua pro sa moda in una carriera famada.

A su cumintzu laureada in giurisprudèntzia, Elena Pes at postu mente a su coro suo e at detzìdidu de si dedicare a su mundu de sa moda. A pustis de àere traballadu in diversos setores sena agatare sa cuntentesa disigiada, at investidu in sa formatzione sua, achirende su mètodu sartoriale “Rosa Sblano” in Bari e aberende s’acadèmia sua de moda, sa Nina Rey Acadèmia di Moda, in Cuartu. Cun determinatzione,  traballu e talentu, at conchistadu unu postu de importu in su mundu de sa moda.

S’atentzione reghente pro Elena Pes est nàschida dae sa partetzipatzione sua a su Fèstival de su Tzìnema de Venètzia, ue sos bestires suos ant ammajadu totus.

Como, unu traguardu nou s’agiunghet a sa lista sua de resessidas: Elena Pes at a èssere s’istilista ufitziale in su cuncursu Miss Europe. Unu disafiu chi issa at retzidu cun brègiu e cun orgòlliu. Sa partetzipatzione sua a custu eventu importante at a èssere assentada in unu documentàriu chi at a èssere trasmìtidu in Amazon Primas in su mese de ghennàrgiu de su 2024. Custu at a rapresentare un’istraordinària oportunidade pro s’istilista sarda e at a dare fintzas galu prus visibilidade a s’Acadèmia de Moda chi issa dirighet.

S’istòria de Elena Pes est un’esèmpiu de comente su determinu, s’impinnu, sa passione e su coràgiu potzant trasformare sos bisos in realidade. Sa partetzipatzione sua a su cuncursu Miss Europe est unu àteru passu a in antis in sa carriera de sutzessu sua, e sa Sardigna est pronta a bìdere lùghere de prus su talentu de custa istilista istraordinària in s’iscena internatzionale.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sas isulas de sa Sardigna pius famadas , cantas e cales sunt.

Sas “isulas de s’isula” Carloforte, sant’Antiogu, Sa Madalena, Caprera, Sant’Istevene, Spargi, Budelli e Razzoli, costoini donzuna un’identidade distinta, intritzande nadura e connottu chi faghent divennere unica tottu s’iscrocca de sa Sardigna.

Carloforte e santAntiogu, attesu dae sa costa sud occidentale,frommant s’arcipelago de su Sulcis. Sant’Antiogu est s’isula sarda pius manna, collegada a sa terra dae unu terrinu artifiziale. Inoghe bivent impare mare e istoria: colonia antiga de sos Fenicios, pustis de Cartagine e romana,cunservat testimonzas archeologicas de valore mannu, in mesu de sas calet bi sunt sas necropolis e su thopet.Pagu pius attesu bi est Carloforte, s’unica tzittade de s’isula de santu Predu, fundada in su seculu VXIII dae familias de sa Liguria chi arribaiant dae Tabarca, in Tunisia. Sa limba tabarchina, faeddada a dies de oe est una de sas cosas pius faschinosas de s’isula,imparis a sa coghina, dominada dae su tonnu e dae sas retzettas de mare.

Ispostandesi in su nord de s’isula, a cara de sa costa gadduresa, si abberit s’arcipelago de sa Madalena, unu beru paradisu naturale reconnoschidu comente Parcu Natzionale. S’isula printzipale, sa Madalena, accasazzat sa bidda chi giughet su mattessi numene, cun d’unu portu istoricu e unu tzentru de carreleddas chi contant su passadu ligadu a sos marineris.

A pagos minutos de navigassione si agatat Caprera, ligada a sa memoria de Zuseppe Garibaldi, chi inoghe at passadu sos urtimos annos de sa vida sua. Caprera est puru una zura de valore mannu po s’ambiente, cun andalas chi che leant a sas plajas pitticcas e logos in sos cales sa bista che bogat s’alenu. Intre sas atteras isulas de s’arcipelago si distinghent Sant’Istevene, Santa Maria, Spargi e Razzoli, donzuna cun su carattere sou. Budelli, connoschida in tottu su mundu po sa plaja Rosa est frigura de sa dilighesa e rispettu de s’ambiente: s’intrada a dies de oe est regulada po diffendere s’ambiente.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”