Su 19 santugaine coladu, sa tragèdia at corfidu in manera sa comunidade e su mundu penitentziàriu a càusa de unu grave intzidente istradale averguadu in s’istatale 389. In cuddu intzidente, Patrizia Incollu, sa diretora de su càrtzere de Badu ‘e Carros, e s’assistente capu de sa Politzia Penitentziària, Peppino Fois, originàriu de Illorai, ant subidu graves cunsighèntzias.

Fois s’est mortu, mentras Patrizia Incollu de 57 annos, est istada ricoverada in cunditziones malas in su repartu de Rianimatzione de s’ospidale Santu Frantziscu, ue un’iscuadra mèdica  cualificada at lutadu sena pasu pro sa vida sua. Nointames, sas fertas subidas in cuddu intzidente non l’ant dadu isperàntzia.

Oe,  cun un’atu de grandu dificultade ma fintzas de umanidade, sas sorres de Patrizia Incollu ant acunsentidu a s’interventu netzessàriu pro pònnere fine a s’istadu vegetativu suo. Custu atu balentiosu at aviadu in manera ufitziale sa protzedura de atzertamentu de sa morte tzerebrale de Patrizia Incollu.

S’intzidente est capitadu mentras Patrizia Incollu e Peppino Fois fiant faghende sa torrada a Nùgoro a pustis de una die longa de traballu colada in su càrtzere de Santu Daniele de Lanusè. Sos duos fiant in unu veìculu Skoda cando, a presu de su distribudore de Ghenna de Ferru, a probe de Mamujada, ant tumbadu cun unu autocarru. A dolu mannu, Peppino Fois est mortu a corfu, lassende unu bòidu dolorosu intre sos collegas suos e sos caros suos.

Patrizia Incollu, una diretora de gabale chi aiat dedicadu bona parte de sa carriera sua a dirìgere diversas istruturas cartzeràrias, comente sa colònia penale de Mamone, est istada deretu carrada a s’ospidale de Nùgoro in coma irreversìbile.

Su personale mèigu de sa Rianimatzione, cun dedizione e professionalidade, at chircadu cun totu sos mèdios de sarbare a Patrizia Incollu, ma sas tzircustàntzias cuntròrias ant bìnchidu s’isperàntzia de la torrare a bìdere curada e sanada. Oe, mentras prangamus sa pèrdida de duos professionistas de primore, Patrizia Incollu e Peppino Fois, devimus reconnòschere su bòidu manu chi ant lassadu. Sa comunidade penitentziària e sa tzitade de Nùgoro sunt unidas in su dolore, ammentende duas figuras respetadas e ammiradas pro s’aficu issoro e sa seriedade in su traballu chi faghiant.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Dae su 30 de lampadas a su 4 de triulas, sos creadores de moda Domenico Dolce e Stefano Gabbana, ant a seperare s’iscrocca casteddaia po presentare sas propostas insoro de couture de Moda Arta, de Atelier e de Oreria Arta.

Pustis de aere seperadu sa Puglia s’istiu passadu, po presentare sas creassiones insoro, sa cropa Dolce e Gabbana, arribat cust’annu in Sardigna. Dae su 30 de lampadas a su 4 de triulas, su sinnu famosu de moda at a presentare sas collessiones novas de Moda Arta, de Oreria Arta e de Atelier.

Sas traditziones, sos colores e sos nuscos de sa Sardigna, ant essere su filu ruju de su “Gran Tour d’Italia”, su disignu firmadu Dolce &Gabbana chi, dae su 2012, tzelebrat sas regiones de s’Italia po mesu de s’artigianadu e sos produttos fattos a manu.

A faghere de guarnissa a sas isfartzosas isfiladas chi donzi istiu animant s’iscena de sa Moda Arta, at essere s’iscrocca casteddaia. Su geniu creativu chi non si podet chistionare de Dolce e Gabbana at duncas a donare po sa prima borta, a sa Sardigna, unu viaggiu istravanadu in su cale arte e abilidade si ant addobbiare, dande vida a cuadros de moda chi che bogant s’alenu, bortados a pesare in artu s’incantu de sa tradissione populare sarda. Donzi isfilada de sas collessiones haute couture firmadas Dolce e Gabbana non est unu simple defilé, ma unu beru e propriu ispettacolu, capatze de toccare emossiones unicas chi binchent s’immazinariu cumone.

Su seperu de sa Sardigna commente logu po custu abbenimentu de grandesa, no est occasionale. S’isula,apparat un’iscenariu perfettu po tzelebrare sa bellesa e s’originalidade de sas creassiones de Dolce e Gabbana. Sas isfiladas ant a bennere in logos de cona de s’iscrocca casteddaia, isseperados po su valore istoricu e culturale insoro, creande
un’unione perfetta de moda e patrimoniu locale.

E commente donzi appuntamentu D&G chi si rispettat, non ant a mancare de certu sos personaggios mannos de su Star system globale. Tzelebridades, influencer e figuras importantes de su mundu de sa moda, ant a arrivare in Sardigna po assistire a custu abbenimentu unicu, cuntribbuinde a rendere meda pius ischintiddosu su clima de sas isfiladas.

Po s’occasione, intro de su nomenadu Forte Village, at essere abbertu unu ispeciale pop-up store. Custa buttega chi abberit po pagu tempus at a presentare unu seperu unicu de sas creassiones pius de cona de Dolce e Gabbana, permittinde a sos istranzos pius fortunados de comporare cantos unicos e pretziosos, fruttu de s’ abilidade de sos artigianos e de sa creatividade chentza laccanas de sa cropa de istilistas.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22