Sa cassa a su sirbone otenet s’autorizatzione de sa ASL
Una borta otentu su pàrrere positivu de su Corpus Forestale, amus emìtidu sas autorizatziones pro sa cassa a su sirbone, in su prenu respetu de sas normas igiènicu-sanitàrias
Su 26 santugaine coladu, s’ASL Ogiastra at dadu sas autorizatziones pro s’esertzìtziu de s’atividade venatòria in su territòriu territòriu. Cuntentos mannos sos cassadores pro s’aberidura de sa cassa manna.
A cumentzare dae su 26 de santugaine 2013, s’ASL Ogiastra at cuntzèdidu su permissu pro su cumintzu de sa cassa a su sirbone pro s’istajone venatòria 2023-2024. Custa detzisione est lòmpida pagu a pustis de su providimentu de s’UdP Psa (Unidade de Progetu Regionale pro s’irraighinadura de sa pesta suina africana) de su 25 de santugaine, chi at afidadu a sas sìngulas ASL sardas su còmpitu de autorizare s’inghitzu de sa faina venatòria de su sirbone. Sa setzione de Sanidade animale de s’ASL Ogiastra s’est ativada in deretura pro rispòndere in manera pronta a sas rechestas de sos apassionados locales chi fiant isetende custa detzisione de s’Azienda ogiastrina.
“A pustis de àere pigadu bisione de sa determina de s’UdP de su 25 santugaine”, at naradu Dino Garau, diretore de sa setzione de Sanidade animale de s’ASL de bia de Piscinas, “amus valutadu a sa lestra sas rechertas presentadas dae sos cassadores. Una borta otentu su pàrrere positivu de su Corpus Forestale, amus emìtidu sas autorizatziones pro sa cassa a su sirbone, in su prenu respetu de sas normas igiènicu-sanitàrias. Semus alligros de annuntziare chi totu sas cumpangias interessadas sunt istadas retentas idòneas e ant otentu s’autorizatzione in manera regulare “.
In Ogiastra, sa cassa est una faina difùndida meda, cun in prus de 100 cumpangias de cassadores distribuides in belle totu sos comunos de su territòriu. Custu movimentu interessat belle 5000 apassionados chi benint dae totu sa Sardigna. Difatis, a banda sas cumpangias locales, sunt medas sos cassadores chi pràticant su turismu venatòriu in Ogiastra, pro more de su logu bellu e de su territòriu adatu a custa pràtica.
In prus s’aberidura de sa cassa manna fiat isetada meda fintzas dae sos massajos de su logu, chi in custos meses ant tentu medas dannos a sas cortivatziones po more de sa presèntzia de tàgios mannos de sirbones totu s’istade e in sos primos meses de atòngiu. S’aberidura de sa cassa a sirbone seguru at a limpitare su nùmerus de sos pegos agrestes e at a permìtere de sarbare sos ortos e sos erriàrgios chi sunt sufrende meda peri pro more de su sicore chi est durende oramai dae 5 mese.
“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”
© RIPRODUZIONE RISERVATA