In su coro de sa Capitale, su Fèstival de su Tzìnema de Roma s’abrontat a tzelebrare su talentu tzinematogràficu sardu, acollende tres òperas de cabale. Sa Sardigna at a èssere protagonista in su Mercadu Internatzionale de s’Audiovisivu (MEA), ue sa Sardegna Film Commission de sa Regione Sardigna at a acumprire unu ruolu crae.

Peter Marcias presentat “Uomni in Marcia”

Su regista sardu Peter Marcias at a fàghere s’esòrdiu mundiale suo a su 18° Fèstival de su Tzìnema de Roma cun su documentàriu “Uomini in Marcia”. Custa òpera contat unu sèculu de chertos pro su traballu in Itàlia, evidentziende sa negatzione creschente e isvalutatzione de su significadu èticu de su traballu e de sa dignidade assotziada a issu. A traessu de boghes de lota, intervistas e riflessiones, su film collit s’istòria de chie at gherradu pro custu deretu fundamentale. Intre sas testimonias bi sunt sas de Ken Loach e Laurent Cantet, autores nòdidos pro s’aficu issoro in sa rapresentatzione de sos disafios sotziales e generatzionales.

 Ivana Gloria e su mitu de Dafne in “Clorofilla”

S’òpera prima de Ivana Gloria, “Clorofilla,” at a èssere presentada in cumpetitzione in sa Seletzione Ufitziale de Alice in sa Tzitade. Su film si basat subra su mitu ovidianu de Dafne e sighit sa metamòrfosi de Maia, una giòvana de tzitade, in sintonia cun sa natura. S’istòria s’acumprit intre unu giòvanu assoladu, Teo, e Maia, cun unu forte ligàmine cun sa natura. Su film esplorat sa trasformatzione de Maia in Natura a traessu de addòbios ùnicos e nuscos ammajadores, mentras sa “linfa sonora” e sas pedras sonoras de Pinuccio Sciola agiunghent elementos de ispantu a s’òpera. Custa editzione de Alice in sa Tzitade est atzentrada subra de sas òperas chi ponent sas fèminas a su tzentru de sas narratziones, e “Clorofilla” non est de mancu, oferende un’ograda feminile subra de Maia, una pitzoca chi chircat a issa etotu cun fortza e consièntzia.

Carolina Melis e sa cuntierra intre natura e umanidade in “S’Ozzastru – The Millennial Tree”

“S’Ozzastru – The Millennial Tree” de Carolina Melis, unu filmadu de animatzione, est istadu seletzionadu pro Alice in sa Tzitade. Custa narratzione èpica esplorat sa cuntierra intre natura e umanidade e sutalìniat s’importu de sa sostenibilidade ambientale. Su filmadu ammentat chi sa natura podet prosperare sena s’interferèntzia umana, ma est dovere de s’umanidade a la preservare. S’istòria interessat fintzas sos composidores Sebastiano Dessanay e Claudia Aru, arrichende galu de prus s’esperièntzia visiva e sonora.

Cun custos tres film, su Fèstival de su Tzìnema de Roma s’arrichit de narratziones ùnicas e profundas, oferende a su pùblicu sa possibilidade de s’imbèrghere in istòrias de traballu, natura e identidade feminina.

 At a èssere un’editzione chi non s’at a iscarèschere, chi tzèlebrat su tzìnema sardu e su contributu suo a sa de sete artes.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Benito Urgu, unu de sos comigos prus connoschidos e appretziados de sa Sardigna.

Attore, cabarettista e tzelebridade televisiva, in sos annos est divennidu populare meda gratzias a sos ispettaculos ispassiosos suos e a sas friguras chi contant cun iscrombu sa vida de donzi die in s’isula. Naschidu in Aristanis, Urgu at incuminzadu sa carriera sua in su mundu de s’ispettaculu medas annos faghet. Fintzas dae s’incumintzu at leadu supra de su cataffale una comicidade simple e ispontanea, a s’ispissu ispirada a sa manera de faeddare,costumenes e situassiones tipicas de sa Sardigna.

In sos sketch suos contat cun lepiesa sa vida in sas biddas, su connottu e sas iscenas pitticcas de donzi die, iscenas in sas cales medas pessonas resessint a si reconnoschere in manera fatzile. In su mentres de sa carriera longa sua at partetzipadu a medas ispettaculos teatrales, programmas televisivos e in sa radio.

Cun sa manera sua de faghere nadurale e s’humor derettu est resessidu a conchistare su pubbricu de tottu s’isula. Meda de sas friguras suas sunt divennidas connoschidas pro itte presentant in manera chi divertit su meledu e sos comportamentos de sa zente sarda.

Sa comicidade de Benito urgu si fundat supra trempas simples e istorias chi naschent dae sa vida de donzi die. In sos ispettaculos suos faeddat a s’ispissu de sa vida in sas biddas, de su connottu e de su cambiu de sa sotziedade. In medas occasiones impittat fintzas paraulas e maneras de narrere de sa limba sarda, faghinde divennere sas mustradas suas fintzas prus accurtzas a sa cultura e realidade de s’isula.

Cun su colare de sos anno est divennidu unu puntu de relata po sa comicidade in Sardigna. Sos ispettaculos suos sighint a essere sighidos dae medas pessonas e sunt unu mamentu de divertimentu ma fintzas una manera po contare cun iscrombu sa vida e sos cambios de s’iscrocca. In prus de sa comicidade, Benito Urgu at semper mustradu attentzione meda pro sa cultura e su connottu de sa Sardigna.

Pro mesu de su tribagliu suo ad dadu unu contribbudu pro faghere connoschere e balorizzare mamentos importantes de s’identidade de s’isula, battinde supra de su cataffale istorias e situassiones chi faghent parte de sa vida e de sa memoria de sas comunidades locales.

Cun sa forma simple sua, deretta e ispontanea, Benito Urgu at fraigadu una carriera longa in su mundu de s’ispettaculu. Fintzas oe est cussideradu una de sas caras prus connoschidas de sa comicidade sarda e sighit a essere appretziadu dae pessonas de ingendras divressas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22