Su “Velorail” est unu veìculu a pedales cuntzepidu pro colare in sos binàrios ferruviàrios, oferende un’esperièntzia de turismu priu e sustenìbile pro esplorare paesàgios e òperas de arte fatu fatu de sas lìnias ferruviàrias betzas. Custa faina, presente in Europa e in  àteras partes de su mundu, s’est isvilupada mescamente in Frantza, acanta sunt ativas prus de 64 retes chi cada annu benint impreadas dae unu nùmeru sempre prus mannu de biagiadores.

Durante su Fèstival IT.A.CÀ de su turismu responsàbile in Ogiastra, b’est istada una cunferèntzia dedicada a su Velorail. S’atopu est serbidu pro pònnere a notu su ruolu suo comente atratore turìsticu pro sa zona, sende chi fintzas in Ogiastra  tenimus una rete ferroviaria betza chi non benit prus impreada pro su tràficu passegeris. In sa cunferèntzia s’est fintzas sutaliniada sa complementariedade cun su Treninu Birde e s’importu de su turismu priu in sas zonas internas de sa Sardigna. Sos relatore chi sunt interbènnidos ant discutidu progetos pro favorire s’isvilupu de su Velorail e ant bogadu a pìgiu sa netzessidade de collaborare cun istitutziones e aziendas pro mandare a in antis custu progetu chi permitit siat de avalorare e recuperare unu bene istruturale oramai abbandonadu comente sa rete ferroviària, ma fintzas de lu fàghere in modu lentu e rispetosu pro s’ambiente e sa naturalesa.

Jean Paul AUSTRUY, espertu frantzesu de su setore, at cumpartzidu s’esperièntzia positiva sua e su potentziale de su Velorail in Sardigna, augurende s’impreu suo pro rinnovare su Treninu Birde e creare unu percursu turìsticu ùnicu in Europa.

Però, nointames su suportu legislativu, s’atuatzione de su servìtziu de su Velorail in Itàlia abarrat un’obietivu chi no est realizadu de su totu. Sunt istados aviadas mesas de traballu pro definire regulamentos e aviare lìnias isperimentales, ma est pretzisu atzelerare su protzessu pro ativare su Velorail comenteunu sèberu de turismu sustenìbile.

Francesca Loi, Assessore a su turismu de Lanusè, at concruidu sa cunferèntzia cun s’invitu a s’imbeniente editzione de IT.A.CÀ in su 2024, acanta si previdet de organizare una proa pro permìtere a totus de isperimentare su Velorail comente  mèdiu de trasportu sustenìbile in Ogiastra.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Tribulìa in sa plaja in Casteddu: piccioccu de seighi annos agattadu mortu pustis de una festa a denotte.

Un festa in atta ‘e mare est finida in sa manera pius drammatiga. Est ancora imboddicada in su misteru sa morte de Mariano Olla, 16 annos, naschidu in Casteddu, ma chi dae carchi annu bistaiat in Sestu, su corpus de su cale est bistadu acciappidu a s’arbeschida de dominiga 15 de lampadas in sa plaja intre su portu de Su Siccu e sa passizzada scalu de Sant’Elia.

A iscoperrere su corpus, a deghe metros dae sa riva, sunt bistados piscadores e zente chi faghiat su bagnu in cussu logu. In presse meda sunt arrivados sos Viglies de su Fogu po su recuberu de su corpus, sighidu dae s’arribu de sa politzia e de su 118, chi ant potidu solu cunfirmare chi su zovanu fit mortu. Su piccioccu teniat ancora sas iscarpas e sos pantalones curtzos, ma non teniat sa maglia. No presentaiat sinzos de violentzia.

Secundu sos primos pensamentos, intre su notte bi diat essere bistada una festa propriu in cussa plaja pitticca e franta, pagu attesu dae su coro de sa “movida” de sos zovanos de su portu turisticu de Su Siccu. Addurat peroe de accrarare si Mariano esserat deabberu intre sos partetzipantes a sa festa e, si custu est beru, itte potat essere capitadu in sas oras imbenientes.

Sa plaja in sa cale est bistadu agattadu su corpus, una limba de rena pitticca in daesegus de su molu de su portu, si podet segudare dae una caminera de terra chi partit dae su parchizu Coro, su mattessi impittadu dae sos tiffosos po sas partidas a sa Unipol Domus, s’Istadiu de su Casteddu. A curtzu si agattant puru s’istadiu bezzu e su Lazzaretto. Sa Politzia at fattu partire sas scruccullas po accrarare sos motivos de sa morte. Sunt gia bistados iscurtados sos familiares de su piccioccu e si est chircande de torrare a fraigare sas urtimas oras de sa vida sua.

Unu puntu de fundamentu de s’iscrucculla at essere de cumprendere si su piccioccu si siat istesiadu a sa sola, si si siat intesu male, o si bi siant bistados elementos de arriscu in sa serana. At essere importante sa resessia de lotomia.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22