In su Mundiale de Paracanoa de Duisburg, in Germània, su 25 de austu coladu, s’atleta casteddaja Viktoryia Shablova at conchistadu sa medàllia dae oro in sa categoria VL1 200 metros. Custa resessida istraordinària arribbat a coronamentu de un’annu ispantosu, acanta Shablova at dimustradu sa capatzidade sua in diversas cumpetitziones importantes.

No est coladu meda tempus dae cando Viktoryia s’est agiudicada su tìtulu de Campionessa Europea de paracanoa in su mese de trìulas coladu, in sas abbas portughesas. Prima de custu, in maju, aiat triunfadu fintzas in sa Copa de su Mundu in Ungheria, dimustrende una costàntzia e unu talentu chi l’ant giuta como a collire su màssimu reconnoschimentu mundiale.

In su Mundiale de Duisburg, s’atleta de sa Setzione LNI de Casteddu at impressionadu cun una prestatzione manniosa, cumpletende sa gara cun unu tempus de 1.10.952. A palas suas, s’indiana Pooja Ojha at balangiadu sa medalla de prata cun unu tempus de 1.18.736, sighida dae sa tzilena Jocelyn Munoz, chi at conchistadu su brunzu cun unu tempus de 1.19.618.

S’ammiratzione pro sas resessidas isportivas de Viktoryia Shablova est istada decretada dae sa Presidèntzia Natzionale de sa Lega Navale Italiana, chi l’at cunferidu s’àncora de prata a su mèritu isportivu 2023. Unu reconnoschimentu chi ponet a notu s’impinnu e su balore de Shablova comente  atleta de cabbale.

Non petzi Shablova, ma fintzas s’allenadore suo Marco Frau e su diretivu de sa Setzione de Casteddu mèritant un’aplàusu sintzeru dae banda de sa Lega Navale Italiana pro àere contribuidu a custu trìunfu.

Lu trìunfo de Viktoryia Shablova no est petzi una resessida personale, ma rapresentat fintzas unu puntu firmu in s’àmbitu de sos isport nàuticos pro sos atletas olìmpicos e paralìmpicos de sa LNI. Custu resurtadu est su frutu de isfortzos colletivos, de s’instancabile traballu de sos presidentes e de sos tècnicos a s’aficu de sos atletas e de sas famìlias issoro, ultres a sos investimentos ponderados fatos dae sa Presidèntzia Natzionale in su setore isportivu.

Sa vitòria sua in sos 200 metros classe Vl1 at rèndidu onore non petzi a sa tzitade nadale sua, Casteddu, ma a totu ìsula.

Sas paràulas de Edoardo Tocco, presidente de su Cussìgiu comunale e membru de sa Lega Navale de Casteddu, rifletent s’altivesa e su brègiu chi custa bella vitòriaat dadu a sa Sardigna. Tocco at bantadu su modu chi Shablova at donadu onore a sa Sardigna e a sa Lega Navale de Casteddu, rapresentende unu faru de primore e ispiratzione pro totus.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Continuidade de s’iscrocca, billettos a pagu preziu fintzas po sos familiares de sos chi bistant in Sardigna.

Si podent comporare da oe sos billettos in continuidade de s’iscrocca riservados a sos familiares de sos chi bistant in Sardigna. Sa novidade est po su sistema de pesos de servitziu pubbricu chi regulat sos collegamentos aereos da e pro s’isula e accreschit su numeru de pessonas chi podent godire de sos pretzios aggevolados.

Sos billettos si podent comporare po sos bolos dae su 29 de martu, die in sa cale at a bintrare in fortilesa su sitema novu de sa continuidade de s’iscrocca. Cun custu seperu sa Sardigna reconnoschet su dirittu de biazzare a pretziu bassu, non solu a chie bistat in s’isula, ma puru a chie, mancari bivat in d’unu atteru logu, tenet unu ligonzu istrintu cun chie bistat in Sardigna.

S’assessora regionale a sas Carraduras Barbara Manca at nadu chi si trattat de unu passu in daenantis importante meda pro itte affortigat su cuntzettu de continuidade de s’iscrocca e tenet contu de su balore de sas famiglias in d’una iscrocca de isula comente sa Sardigna. Su risurtadu est fruttu de su tribagliu leadu a daenantis dae sa Regione Autonoma de sa Sardigna impare cun su Ministeru de sas Infrastrutturas e de sas Carraduras e sa Cummissione Europea, rispettande sas regulas europeas po sos collegamentos garantidos dae s’Istadu.

Ant a podere godire de sos pretzios aggiudados, cun d’unu accreschimentu minimu in cunfrontu a cussos istabilidos po sos chi bistant inoghe, ma cun d’unu pretziu massimu giai istabilidu, sos parentes fintzas a su terzu gradu. At a serbire a fizzos, babbos e mamas, frades e sorres, giagios e nepodes,tios e atteros nepodes. S’azzudu balet fintzas po maridos e muzzeres e po sos fizzos de sos famigliares chi tenent dirittu a s’iscontu.

Sa misura punnat a alcansare chie at dassadu sa Sardigna po motivos de tribagliu o de istudiu ma sighit a mantennere unu ligonzu forte cun s’isula, gai comente sas famiglias chi bivent partidas intre regiones divressas. S’intentu est de faghere divennere prus simple e prus pagu caru su viazu po chie depet torrare a domo pro motivos famigliares.

Sa cabuda de sos billettos a pretziu bassu affortigat duncas su dirittu a si podere movere in d’una regione chi po sa posissione geografica sua depet faghere sos contos cun collegamentos prus cumplicados e caros in cunfrontu a atteras zuras de s’Italia, azzuande non solu sos chi b’istant ma fintzas sas famiglias insoro.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22