In su coro de Casteddu, longu de s’arburada de Monastir s’est averguadu un’episòdiu de violèntzia chi at interessadu un’autista de s’Arst e unu passigeri, iscasidende indignatzione e pessamentu in contu de sa seguridade in sos mèdios pùblicos. Domìniga colada, un’autista de Santu Sperau est istadu vìtima de un’agressione guidende su postale. Unu passigeri, unu giòvanu senegalesu de 23 annos, est istadu identificadu.

S’agressione est acontèssida cando s’autista at pedidu a su passigeri de pagare s’integratzione de su billete. A custa rechesta su giòvanu at reagidu cun violèntzia, corfende s’autista cun unu pùinu a conca. Un’iscena grae meda chi at rechertu s’interventu de sas fortzas de s’òrdine.

Sos carabineris ant identificadu a sa lestra e denuntziadu su giòvanu senegalesu a sa Procura de sa Repùblica pro su reatu de violèntzia. Nointames, custu episòdiu no est unu casu isoladu. Difatis, sos atacos a sos autistas de sos mèdios pùblicos in Casteddu sunt devènnidos semper prus fitianos in sos ùrtimos tempos, e sa presèntzia de telecàmeras de bardiamentu  non paret èssere sufitziente a prevènnere custas violèntzias.

Giai de su 2017, sos sindacados Cisl Retes e Faisa Cisal aiant sollitzitadu chi esseret installada una barriera in plexiglas in su postu de ghia de sos autistas, pro more de los amparare dae sas agressiones. Sa recherta est istada motivada pro more de sos episòdios de violèntzia chi acontessent mescamente in sos oràrios serales e in sos fine chida.

Unos àteros sindacados, comente a su Fsp de sa Politzia de Istadu, aiant propostu s’organizatzione de cursos de autodifesa pro autistas controllores de sos postales, pro lis dare sos trastos netzessàrios pro reagire e pro s’amparare in casu de situatziones perigulosas.

In custu momentu sa seguridade subra de sos mèdios pùblicos est unu tema tzentrale, duncas est fundamentale chi sas istitutziones e sas aziendas interessadas collàborent pro garantire s’amparu de sos autistas e de sos impitadores. S’installatzione de barrieras de amparu e s’organizatzione de cursos de autodifesa diant pòdere rapresentare passos cuncretos cara a una majore seguridade subra de sos mèdios pùblicos, rendende gasi su biàgiu in postale un’esperièntzia prus trancuilla e sena  perìgulos pro totu sos tzitadinos.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Su Ris torrat a sa propiedade de Ragnedda: si chircant tràcias e ogetos isparidos

A pustis de su ricòveru de Emanuele Ragnedda in s’ispidale Santissima Annunziata de Tàtari, a pustis chi paret chi epat tentadu de si ochìere, sos ispetzialistas de su Ris de sos Carabineris de Casteddu sunt torrados a sa propiedade de Conca Entosa. Est in cue chi ant mortu a Cinzia Pinna, sa pitzoca de 33 annos de Casteddu-sardu morta in sa domo de campagna de s’imprendidore de su binu de 41 annos.

Sos militares sunt imbàtidos cun unu fuoristrada, agiuados dae duos mezos de s’agentzia regionale Forestas chi portaiant tosaerba e atretzos agrìculos. Sas atividades de rilievu, fatas a sa presèntzia de sos avocados de sas partes, sighint cun sa punna de recuperare carchi tràcia chi podet serbire e, mescamente, sas cosas personales de sa morta, isparidas paris cun su telefoneddu suo luego a pustis chi aiant agatadu su corpus suta un’àrbore de sa propiedade.

Est prevididu fintzas unu sopralluogu in su yacht de famìllia, ancoradu in Cannigione. Est sa matessi imbarcatzione dae sa cale Ragnedda aiat impreadu su tender pro imbàtere a Baja Sardìnia, a faca a Porto Cervo, in ue b’est sa domo de famìllia. Cussu tentativu de si nche fuire est sutzessu in su mentres chi sos carabineris lu fiant giai chirchende, andende a sa propiedade sua.

Segundu su chi est bessende a pìgiu dae sas indàgines, s’imprendidore aiat giai pensadu de si liberare de su corpus de Cinzia ghetende·nche·lu in mare, forsis dae sa roca de Capo Ferro. Però non sunt ancora craras sas cosas chi sunt sutzessas a pustis de sa morte e mescamente si s’òmine teniat calicunu chi l’epat agiudadu. Pro como duas persones sunt iscritas in su registru de sos indagados pro favoressimentu.

Segundu sos investigadores, ambas duas ant agiudadu a innetare sa domo dae sas tràcias de sàmbene e a nche fàghere isparire sa roba e àteros ogetos personales de sa morta. Podet èssere chi s’elenco de sos indagados si potzat sighire a illonghiare.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”