A pustis de tres annos dae regnu de Giovanni Carboni cun Rubacuori Baio, su sartu a ostàculos saludat sa torrada in tronu isolanu de Gianleonardo Murruzzu. Su cadderi aristanesu binchet su campionadu sardu de brincu ostàculos in s’Ippopark de Figari. Lu faghet a oto annos dae  su de sete tìtulos. “Cun Taissa Sarda apo bintu in totue, mancaiat petzi su tìtulu regionale”, at cummentadu satisfatu Murruzzu.

Gara difìtzile e tècnica meda sa de su percursu disegnadu dae Giovanni Bussu in s’impiantu gestidu dae Piera Monti e Angelo Pala, in sa manifestatzione organizada in collaboratzione cun sa Fise Sardegna. Bella meda sa fòrmula noa in de tres dies de garas cun proas diferentes. Su binòmiu Gianleonardo Murruzzu-Taissa Sarda at dadu unu signale pretzisu, binchende cun percursu netu sa proa de chenàbura, a tempus subra de ostàculos de 135 tzentìmetros. Sàbadu, in sos 140 tzentìmetros, imbetzes, a s’impònnere est istadu Luigi Angius cun Rarità.

In sa de tres proas, a duos manches cun ostàculos de 140 tzentìmetros, su cadderi aristanesu at piatzadu unu dòpiu netu pro tènnere resone subra de Luigi Angius, chi at pagadu caru s’errore in sa prima manche, resessende però cun una segunda manche perfeta a conchistare sa prata a in antis de s’òtimu Giovanni Onnis subra de Tiberio, chi imbetzes at furriadu un’ostàculu in su barrage.

Su de bator postos pro Antonio Meloni, 19 annos, cun Vadir (s’annu coladu at bintu su I gradu), mentras su campione essidore Giovanni Carboni at serradu a su de chimbe postos cun Its G, sedda olandesa de calidade ma de su caràtere non simple meda.

Sos àteros binchidores. Su campionadu de I gradu at bidu sa resessida de Gabriele Visca cun Courtney a pustis de sas duas medàllias de prata de sas editziones coladas. At pretzèdidu Giorgio Laconi cun Alys Jvh Z e sa mègius amàtzone de sos campionados sardos, balet a nàrrere Beatrice Schirru cun Della Spock.

Vitòria in domo (Tzìrculu Sos Olivastri) pro Francesca Dessena cun Conan Mc Murphy in sos Brevetos pony. Pòdiu cumpletadu dae Alice Agnese Granella cun Tehiya Sundance e Anita Putzu cun Ma Belle Fleur Vh Bruulhof.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Tassa de alloggiu 2024: boom de incascios po sos comunes sardos, tres bortas de pius in battoro annos.

In su 2024, sa tassa de alloggiu in Sardigna est arrivada a numeros record, sinzande una creschida chi assuprit in cunfruntu a su passadu. In solu battoro annos, sos incascios chi arrivant dae custa tassa sunt  divennidos tres bortas de pius, fruttu non solu de s’accreschimentu de sos turistas, ma fintzas po s’adesione chi est creschinde de sos comunes chi faghent pagare sa tassa. Si in su 2020 funt pagu pius de trinta sos comunes chi la faghiant pagare, oe sunt divennidos casi chimbanta, mescamente in cussas localidades inube su turismu est una boghe accolomica de fundamentu.

Sos printzipales logos turisticos de s’isula- dae Terranoa a s’Alighera, dae Arzachena a Villasiumius- ghiant sa classifica po incascios, cunfirmande sa fortza attirante de carchi zura de sa costa. Puru comunes comente Casteddu e Santa Teresa de Gaddura ant registradu accreschimentos de signifficu, mentres atteros, comente Budone, ant bidu unu calu lezzeru, dimustrande una bista trighina.

Ma si da un’ala s’accreschimentu de s’importu podet essere leggidu comente unu sinzale positivu,dae s’atteru si abberit una meledada importante: comente benint impittados custos fundos? Sa tassa de alloggiu naschet cun s’idea de mezzorare sos servitzios turisticos, poderare sa promossione de s’iscrocca,finantziare s’ammantennere sos logos pubbricos e arricchire s’offerta culturale e ambientale. Intames, no est sempre craru comente sos comunes impittent custu dinari.

In d’unu momentu in su cale su turismu est torradu a essere unu de sos motores printzipales de s’accolomia sarda, sa trasparentzia supra s’impittu de sa tassa de alloggiu diventat importante meda. Non si trattta solu de faghere cassa, ma de torrare balore a s’iscrocca, apparande servitzios menzus a chie la bisitat e a chi bisitat. Sos numeros record de su 2024 ponent una porfia pretzisa a sas amministratziones: revertire sos incascios istraordinarios in benefitzios chi si podent toccare, chi si biant e pottant durare po tottus.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22