Sa comunidade de Tortolì at rispòndidu a su disìgiu chi aiat in su coro Pierpaolo Loddo, su pitzocu de 41 annos de sa bidda chi at lutadu  annos e annos contra s’isclerosi mùltipla. Durante sa vida sua, nointames sa maladia, Pierpaolo at dimustradu unu coràgiu, una fortza e una positividade ispantosas.

Sas letziones importantes de vida chi at lassadu sunt galu bias, gasi comente s’ammentu de Peo, unu grandu gherradore. Est naschida in manera reghente in Ogliastra un’organizatzione de voluntariadu mutida “La Soffitta di Peo”, presidida dae Antonella Deiana, sa mama de Pierpaolo. Custa organizatzione s’impinnat a agiuare cale si siat s’agatet a afrontare de repente problemas de salude, in manera indipendente dae sa patologia, oferende assistèntzia burocràtica pro otènnere sos deretos chi ispetant a sas famìlias e a sos malàidos a livellu sotziale e sanitàriu.

Custa fiat un’idea de Pierpaolo chi est istada portada a in antis dae sa sa mama Antonella, sa tzia Anna Rita, amigos e parentes, e oe est devènnida una realidade. S’obietivu primàriu de s’assòtziu, chi fiat caru meda a Peo, est su de illebiare su càrrigu emotivu de sas famìlias de sos malàidos in sos momentos de prus dificultade.

Su progetu est como ghiadu dae Antonella Deiana paris cun Alessandra Loi, Basilia Canzilla, Anna Rita Deiana, Maria Rosa Puncioni, Pietro Muceli, Francesca Corriga, Simona Tascedda e Giulia Muceli.

“Semus cuntentos de àere agatadu un’ispàtziu in ue podimus pònnere a disponimentu s’esperièntzia nostra pro agiuare sos àteros”, ispiegat sa mama Antonella. “Non podimus ismentigare de ringratziare su sìndigu de Gelisuli pro s’èssere rèndidu disponìbile in deretura a nos agatare unu logu adatu. Pierpaolo diat èssere cuntentu de ischire chi semus resèssidos a realizare unu de sos bisos suos”.

S’assòtziu est abertu a totu sos chi tèngiat bisòngiu de agiudu. Sos voluntàrios sunt disponìbiles ogni lunis a mangianu dae sas 9:30 a sas 12:30 e ogni giòbia dae sas 15:30 a sas 18:30 in sa biblioteca comunale de Gelisuli.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Tzinema sardu, arribat su film”Bandidos e Balentes de Fabio Manuel Mulas

Si sunt faghinde sas represas de su film “Bandidos e Balentes”, su disignu tzinematografficu novu de su regista sardu Fabio Manuel Mulas, chi at a bessire intre pagu tempus. Su film contat un’istoria ambientada in sa Sardigna de su passadu e s’ispirat a sos contos e mudas ligadas a su fenomenu de sos bandidos in s’isula.

Mulas est unu regista e autore sardu chi dae annos tribagliat in su mundu de su tzinema indipendente. In sos tribaglios suos dat attentzione particulare a s’istoria, a sa cultura e su connottu de sa Sardigna. Sa tiza battit supra s’ischermu unu mundu fattu de connottu, gherras e vida in sas zuras internas de sa Sardigna.

Sas mudas sunt ambientadas in sos annos Chimbanta e mustrant comente sa vida de sas pessonas esseret signada dae vindittas e cunfrontos diffitziles intre familias e bandidos. A su tzentru de s’istoria bi sunt pessonas divressas sas vidas de sas cales cambiant propriu pro more de custu clima de tesone e violentzia.

Su film cheret contare non solu su bandizadu ma fintzas sa cultura e sas bistas de s’isula. Sos montes de intro, sas biddas e sas campagnas de sa Sardigna faghent de irfundu a sas mudas de sos attores e mustrant una terra antiga e forte, ligada in manera funguda a su connottu suo.

In su “cast” medas piccioccos sardos, calicunu a sa prima esperientzia, ma fintzas s’attora sarda Caterina Murino, nodida a livellu internatzionale pro sos rolos suos in su tzinema e sa televisione. Sa partetzipassione sua est unu balore in prus po su disignu e at a dare unu contribbudu e faghere biere de prus su film. Sar represas sunt appassionande paritzos logos de s’isula e sunt attirande s’attentzione de appassionados de tzinema e curiosos.

S’intentu de su regista est de contare una pagina de s’istoria sarda pro mesu de unu limbazu tzinematografficu capatze de aunire assione, dramma e connottu. Cun s’essida chi si prevedit in sos meses imbenientes,”Bandidos e balentes” puntat a che leare supra de s’ischermu mannu un’istoria ligada a sa Sardigna in manera funguda, balorizzande s’iscrocca e sas raighinas culturales suas. Su film est fintzas un’occasione pro faghere connoschere a su pubbricu una parte importante de sa memoria istorica de s’isula pro mesu de su tzinema.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22