Chenàbura su 19 de  maju a sas 21.00, in piatza Santa Gruche de Orane, at a andare in iscena “Mannos e minores, una bidda pro sa pitzinnia“, sàgiu finale de su laboratòriu teatrale in limba sarda chi at interessadu sos pipios de 4 e 5 annos. Sa faina faghet parte de sa programmatzione de s’isportellu linguìsticu intercomunale de Fonne, Orgòsolo e Orane, finantziadu cun sa L. 482/99 e LR 22/2018 e gestidu dae sa Sotziedade Suìa.

Sos pitzinnos chi gioghende ant a leare s’iscena chenàbura 19 de maju, dae su mese de freàrgiu ant sighidu in s’ex asilu de “Sa ‘e Mastio” su laboratòriu “Teatru in limba sarda. Sos pitzinnos connoschent sas pessones famadas de Orane“, ghiadu e pensadu dae Valentina Loche.

S’atoressa e educadora oranesa, chi s’est ocupada fintzas de s’iscenegiadura, in tres meses de faina laboratoriale, impreende sa limba sarda, intre giogu, narratziones e esertzìtzios, at fatu bìvere sa prima esperièntzia teatrale a unu grustu geniosu e abbistu de  atoreddos de s’iscola de s’infàntzia interessende•los cun sas istòrias de sos pessonàgios de cabbale de sa bidda de Orane: Costantino Nivola (artista), Mario Delitala (pintore), Marianna Bussalai (iscritora e poetissa), Piero Borrotzu (partigianu).

“In  su sàgiu ispassiosu chi amus cuncordadu cun sos pipios – ispiegat Valentina Loche – b’at a àere un’addòbiu intre sos atores minoreddos de Orane e sos pessonàgios prus famados de sa bidda chi ant a fàghere unu biàgiu temporale finas a sas dies nostras. Gasi sos pessonàgios nòdidos de Orane e sos piticos tzitadinos s’ant a aunire pro ammaniare una bidda a mesura de pipiu, in intro de una sotziedade ue totu andat de presse e non nos restat su tempus de osservare e gosare de sa bellesa chi tenimus a ingìriu”.

“In sos addòbios de cada chida – agiunghet Ivan Marongiu de sa Sotziedade Suìa – sos dischentes ant fatu esperièntzia de recitatzione pro mèdiu de su giogu, impersonende sos pessonàgios famados de Orane e faghende•los interagire tra issos cun isceneddas de vida de ogni die. A cussu puntu su contu de sa vida issoro est devènnidu un’ispetàculu colletivu“.

Como est arribbadu su momentu finale de contare s’istòria issoro a su pùblicu! E tando, abarrat ebbia de si fàghere agatare prontos in pratza Santa Gruche, su 19 de maju a sas 21.00 in Orane.

“Attività realizzata col contributo della Regione Sardegna — IMPRENTAS 2022-2023. LR 22/2018, art. 22”

Sa Maniffattura de su Tabaccu de Casteddu est pronta a accasazzare dae su 16 a su 18 de Aprile, un’abbenimentu dedicadu a tzelebrare sa zura blue de sa Sardigna. Po mesu de unu disignu riccu de dibattidos, musica e attividades de coghina, s’abbenimentu chircat de iscumbattare e balorizzare sa vida longa, commente un’ istrumentu chi serbit po faghere arrivare turistas, poninde s’attentzione supra sa ricchesa de sa coghina locale, commente elementu chi siat sa crae de un’esperientzia turistica bera e chi non si potat ismentigare.

Martis 16 Aprile, sos espertos de su marketing de su turismu, de sa salude, de sa tradissione de sa coghina e de s’accolomia pubbrica, ant a discutire de commente sa vida longa si potat trasformare in d’unu beru jubilu po visitadores dae tottu su mundu, chi disizzant de iscoperrere sos segretos po una vida pius longa e sana. S’addobiu at accommettare chistiones divressas de interessiu particulare, in mesu de sas cales, s’istoria de su pane de sos chi tenent chent’annos “Kentos” de Orroli, s’esperientzia de sa cooperativa Allevatrici de Sardigna e sa pubblicidade de sos prodottos sardos in sos paisos de s’Iscandinavia.

Merculis 17 bi at essere unu laboratoriu de buttega; bi ant a partetzipare espertos de custu campu, commente Raimondo Mandis e Luigi Mundula. At a sighire una mustra de coghina cun s’azzudu de su Casteddu Calcio, inue carchi giogadore ruju e blu si at a chimentare cun sas retzettas de sa tradissione sarda, ghiados dae sos coghineris William Pitzalis e Marco Abis.

Su colominzu de s’abbenimentu at essere gioggia 18 Aprile, cun d’unu laboratoriu de buttega, dedicadu a su mandicu de s’identidade de sa Sardigna, sighidu dae unu laboratoriu de coghina, dedicatu a sa preparassione de sas minestras e de sas suppas de sa tradissione, de sas cales sos chi ant a partetzipare ant a tennere s’occasione de las assazzare paris cun sos coghineris. Sa serana, si at a congruire cun d’unu cuntzertu “Bisajos” de su musicista Gavino Murgia e cun sa partezipatzione de su mastru Luigi Lai cun sas launeddas suas.

“Chent’annos paris!” est un’occasione unica po esplorare sos segretos de sa vida longa sarda, imparande derettu dae sa tradissione de sa coghina e da sa sabidoria de chie at fattu de sa vida longa e de sa salude un’usantzia.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22