Su padel est un’isport chi est naschidu in Mèssicu in sos annos 70. In su 1969 in Acapulco su messicanu Enrique Corcuera, cherende cuncordare unu campu de paddle tennis in domo sua, aiat cuntzepidu s’idea de cunsiderare sos muros comente parte integrante de su campu de giogu. Corcuera posca aiat reguladu su giogu nou e l’aiat mutidu padel. Su padel est unu de sos isport prus populares in Amèrica Latina, mescamente in Argentina, mentras in Europa sa natzione in ue custu isport tenet apassionados est s’Ispagna, cun 4 milliones e mesu de praticantes amatoriales, ma est praticadu meda fintzas in Portogallu e Isvètzia.

A pagu a pagu est cumentzende a èssere praticadu in totu su mundu, fintzas in Sardigna. Pro nde ischire de prus amus dimandadu calicuna informatzione a s’allenadore Luca Ghiani

“Su padel — at naradu Luca — dae isport disconnotu est divènnidu unu de sos prus praticadu in custu momentu, chi cun probabilidade at a arribbare a èssere atzetadu fintzas comente disciplina olimpiònica.  Sa recherta semper prus manna est faghende a manera chi sos servìtzios e sas istruturas acapiadas a custa pràtica siat aumentende meda in totu su mundu.  A custu isport, difatis si podent acurtziare medas persones,  megiorende totu sos aspetos connètidos a sa pràtica chi  non recheret medas capatzidades atlèticas comente podet acontèssere in àteras disciplinas. In prus non bolet nemmancu  atretzaduras chi costant meda, ma podimus nàrrere chi est a sa portada de totus.
Colat a isport elitàriu pro more ca sunt artos meda sos costos pro afitare sos campos e pro  more chi rechedet medas letziones. In prus, pro chie cheret lòmpere a unu livellu bonu, serbit acostiare a s’isport fintzas una dieta echilibrada chi tèngiat contu de sas calorias”.

Pro serrare, Luca at naradu chi ocannu sa punna sua est de si megiorare de prus in custu isport fintzas comente allenadore, pro custu at a torrare a Ispagna pro imparare semper prus dinàmicas e metodologias de insegnamentu.
Esistint diversos tzentros acanta praticare custu isport e sa calidade issoro si mesurat segundu sos servìtzios chi ponet a disponimentu, chi si podent partzire pro livellos, su de base, chi donat servìtzios igiènicos e de una segreteria, a su segundu livellu, chi donat sa possibilidade de papare e servìtzios de recreu, e su tertzu livellu chi podet pònnere a disponimentu totu su chi pertocat su cuntestu agonìsticu.

Dinamo Sassari derretta dae Reggio Emilia, divenit prus diffitzile arribare intre sas primas.

Amargura pro sa Dinamo Sassari chi perdet contra su Reggio Emilia pustis de una partida chi pariat sutta de controllu. S’isquadra tattaresa est bistada in daenantis in sos puntos casi po tottu sa partida e a unu tzertu puntu at tentu fintzas unu vantazu mannu. In sos urtimos minudos peroe sos istranzos sunt resessidos a passare in daenantis e binchere.

Sa derretta pesat mescamente pro sa classifica. Si sa Dinamo epperet binchidu diat aere fattu unu passu importante meda pro si accostare a sas primas isquadras de su campionadu. Invetzes cun custu risurtadu sa carrela divenit prus cumplicada e sa distanztia dae sas primas de sa classifica creschet. Pro bona parte de sa partida s’isquadra de Tattari at giogadu bene. At acciappidu canisteddos cun fatzilidade e est resessida a fraigare unu vantaggiu bonu. Su pubbricu de su PalaSerradimigni at agguantadu s’isquadra isperande in d’unu sutzessu chi podiat battire cunfiantza pro sa fine de s’istajone.

In sos urtimos minutos peroe, sa situassione est cambiada. Reggio Emiliaat incumintzadu e recuberare puntu subra puntu mentres sa Dinamo at perdidu unu pagu de siguresa. Carchi assione no est andata bene e sos istranzos nde ant approfittadu pro si accostare semper de prus in sos puntos fintzas a binchere sos tattaresos in su finale.

Intre sos giogadores de sa Dinamo unu de sos menzus est bistadu Desure Buie chi at sinzadu puntos meda e d’est bistadu pro parizzu tempus su puntu de relata de s’isquadra in attaccu. Cando peroe est bistadu cambiadu pro si pasare un’appena su giogu de sa Dinamo at abbaccadu e s’isquadra at tentu problemas a acciappare solutziones novas. Una cosa positiva est arribada dae sa torrada in campu de Marshall pustis meda tempus de assentzia pro problemas fisigos. Su giogadore at incumintzadu bene sa partida sinzande duos tiros importantes dae attesu.

Dae s’attera parte Reggio Emilia at sighidu a bi creere fintzas a sa fine. Carchi giogadore suo at acciappidu canisteddos importantes in sos mamentos detzisivos e s’isquadra est resessida a binchere una partida chi pariat giai perdida. Pro sa Dinamo addurat duncas delusione meda. Pro meda tempus s’isquadra aiat mustradu de podere binchere ma in sos urtimos minutos est cambiadu tottu. Est una de cussas partidas chi dassant delusione pro itte su sutzessu fuit deabberu accanta.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22