Roberto Saviano, s’iscritore napoletanu chi  dae annos est cun s’iscorta pro more de ameletzos retzidos dae sos camorristas, invitadu in una puntada de su podcast Muschio Selvaggio, at  allegadu de su bandidu de Àrthana, a sa mata dae su 1997.

At fatu su giru de totu sos giornales sardos s’intervista de Roberto Saviano in su podcast de su programma Muschio Selvaggio, conduidu dae Fedez e Luis Sala, acanta at chistionadu de Attilio Cubeddu.
A pustis de una puntada dedicada a  sa màfia, Saviano at peri allegadu de sa delincuètzia isulana, mescamente de s’arthanesu Cubeddu, chi dae cando est istadu Matteo Messina Dinari, segundu su Ministeru de s’Internu resurtat su prus chircadu in Itàlia.

Custos sos faeddos de s’iscritore, registrados in sa puntada de Muschio Selvaggio: “B’at fintzas s’istòria de bandidu de s’Anònima sarda, Attilio Cubeddu. Penso chi apat leadu parte cun un’àteru bandidu sardu, Matteo Boe, a su ricatu de Farouk Kassam. Mi so interessadu a custu contu dae unu pagu de tempus e a su chi si narat est resèssidu a si nche fuire dae sa Sardigna e a s’atacare in Austràlia, in ue est faghende su pastore”.

“A diferèntzia de sos mafiosos, sos de s’Anònima Secuestros– at annantu s’iscritore — secuestraiat sas vìtimas issoro cun sa punna de non bìvere cumandados dae meres. Non teniat s’iscopu de s’arrichire. Eja, mi fatzo sa pilla ma còmporo una cuntzessionària, unu tzilleri, non chèrgio fundare un’assòtziu criminale chi tratat cocaina. Como s’istajone de sos secuestros est ismentigada. Est una puntada chi so istudiende meda de annos medas. Comente si siat tèngio s’impressione chi Cubeddu, a diferèntzia de sos mafiosos mannos, non siat custrintu a s’abarrare istichidu in domo sua pro totu custu tempus”.

“Attività realizzata col contributo della Regione Sardegna – IMPRENTAS 2022-2023. LR 22/2018, art. 22”

Sa Dea Mama: una de sas divinidades prus antigas de sa Sardigna.

Sa Dea Mama est una de sas friguras prus antigas e ammaghiantes de s’istoria de sa Sardigna. Si trattat de una divinidade feminina chi pro sas populassiones de sos tempos antigos mustraiat sa vida, sa naschida e sa saliosidade. Sos archeologos ant acciappidu medas istatueddas chi la mustrant in paritzos sitos de s’isulas, sinzu chi custa frigura teniat unu rolu importante meda in sa religione e sa cultura de sas comunidades antigas. Custos oggettos antigos sunt de mizza e mizza annos faghet, meda prima de sa tzivilidade nuragica.

Sas istatueddas de sa Dea Mama sunt casi semper pitticcas e fattas de terra cotta o in pedra. In casi tottus sas istatuas su corpus femininu est meda evidentziadu, cun tittas, bentre e costazos evidentziados. Custas formas non fuint unu particulare artisticu simple, ma teniant unu signifficu forte meda. Serbiant difattis a mustrare sa capatzidade de sa femina de dare sa vida. Pro sas populassiones antigas sa femina fuit bida comente una frigura sacra pro itte mustraiat sa naschida, sa creschida e s’andare a daenantis de sa comunidade.

In cussu tempus sa vida de sas pessonas fuit ligada a s’istrinta cun sa nadura. Sas comunidades biviant mescamente de laurantza e pesadura e dippendiant de su tottu dae sa saliosidade de sa terra.Si sos campos produiant pagu o si sos animales non proliffigaint, sa vida de sas biddas fuit in perigulu. Po custu motivu, sa saliosidade fuit cussiderada un’elementu de fundamentu e sa Dea Mama mustraiat propriu custa fortza de sa nadura capatze de ingendrare e nudrire sa vida.

Est probabbile chin sas istatueddas benzerent impittadas in su mentres de ritos religiosos o tzerimonias ligadas a sos mamentos prus importantes de sa vida de sa comunidade, comente sa semenadura, su regortu o sa naschida de sos pitzinnos. Pro mesu de custos ritos sas populassiones dimandaiant affianzu, bundantzia de sos regortos e primorosidade po sas biddas.

Sa Dea Mama fuit duncas bida comente una frigura amparadora chi garantiat s’ecchilibriu e su benessere. Intre sos oggettos prus connoschidos bi est sa Dea Mama de Turriga, un’istatuedda in terracotta de su terzu millenniu A.C. Sa frigura est bistada fatta sezzida cun sas manos supra de su bentre, unu gestu chi mustrat in manera crara su tema de sa maternidade e de s’ingendra de sa vida.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22