Una de sas produtziones “artìsticas” prus significativas de sa Sardigna prenuraghesa est rapresentada dae sas istatueddas de “dea mama”. Si tratat de isculturas de piticas (prus a mancu 10-15 cm de artària, ma bi nde at fintzas peri prus piticas e prus mannas) chi rapresentant figuras feminiles.

Su nùmene “dea mama” dipendet dae su cuntestu acanta sunt istadas agatas, semper in àmbitu funeràriu, cosa at ispintu sos istudiosos a pensare chi custas imàgines èsserent una rapresentatzione sacra de s’ispàtziu fìsicu e simbòlicu acanta su defuntu benit collocadu: sa “Terra”, cuntzepida comente  “generadora” de sa vida e duncas comente  “mama”, chi deviat retzire in sa bentre sua (sa tumba ipogèica) su mortu. Si tratat però semper de ipòtesis chi si faghent e non de cosas seguras.

Sa prus connota de custas deas mama est de seguru sa de Turriga.  Segundu sos istùdios apartenet a su Neolìticu reghente (intre su V e su de IV millènniu a.C.). Su corpus est istilizadu meda. S’ùnicu tretu somàticu est su nasu. Sa carena est a forma de trapètziu  bortuladu cun sinos a copedda e  presentat unu sinnu a forma de V a suta de su tzugru. S’istatuedda fiat  istada agatada pro cumbinatzione in su 1935 in su Comunu de Senorbì dae unu massaju chi l’at poderada pro paritzos annos comente supramòbile in sa geminera.  Totu custu finas a cando su mèigu de sa bidda  nche l’aiat intregada a su Museu Archeològicu de Casteddu. Giovanni Lilliu at iscritu chi custu repertu s’agataiat in una corte de pedras a probe de unu bidditzolu preistòricu. S’archeòlogu s’archeòlogu Piero Cao aiat publicadu sa foto in un’opuscolo istampadu a Viterbo, ma s’istatuedda at cumintzadu a èssere connota in su mundu de sos istùdios dae su 1949, cando a Venètzia si fiat organizadu una mustra de arte antiga e moderna de sa Sardigna, acanta fiant istadas espostas prus de 60 istatueddas, e in mesu a cussas peri sa de Turriga.

“Progetu finantziadu cun s’Avisu Pùblicu IMPRENTAS annualidade 2021-2022”

Sas vias de sa tramuda, a daenantis cun iscavos e balorizzatzione: risurtados novos in sos nuraghes de Tortulè e Triei.

Andant a daenantis cun resurtados importantes sos interventos de iscavu,accontzu e balorizzatzione de sas alas nuragicas intzididas in su disignu “Sas vias de sa tramuda” in Ozzastra. Duos in particulare sos logos interessados dae sos tribaglios: su nuraghe s’Ortali ’e su Monti in s’iscrocca de Tortulè, e su nuraghe Bau Nuraxi de Triei, ambos duos a su tzentru de avantzamentos importantes supra su pianu iscientificu e de su recreu pubbricu de su tempus benidore.

A s’Ortali ‘ e Su Monti, unu de sos sitos  appillados prus nodidos e bisitados de s’Ozzastra, est finida sa fase de iscavu archeologicu. Su cumplessu, chi accansat nuraghe,pobuladu, tzirculu megaliticu, domus de janas e tumbas de tzigantes, sighit a torrare notissias novas mancari sos istudios los fettant dae tempus meda. Sas scruccullas fattas dae pagu ant fattu iscoperrere atteras zuras de interessiu, amprariande sas connoschentzias supra su situ e arricchinde s’esperientzia culturale apparada a sos bisitadores.

S’interventu, fattu sutta s’affilamentu de sas Sovrintendentzias archeologicas, est bistada fatta mescamente po una turre accosta e s’antemurale de su nuraghe. In su mentres de sos tribaglios sunt bistados iscopertos po su prus, picculos de isterzos de attividades in domo, comente su tessinzu e s’ammaniada de sa cosa de pappare. Finida sa fase de iscavu, su disignu bintrat como in d’una fase nova chi prenettat interventos de accontzu, su faghere un’impiantu novu de sa lughe- pensadu fintzas po su sero, e sa creassione de unu caminu novu po bintrare a su monumentu. Si at a faghere puru s’azzorronamentu de su sistema de sas notissias e de sos poster, po rendere prus fatzile sa bisita e mezzorare sa cumpresa de unu situ de cumplessidade manna. Sa summa totale de sos tribaglios, partidos in su mese de aprile 2025 est de casi 200.000 euros.

Novidades importantes arribant puru dae su nuraghe Bau Nuraxi de Triei, inube in su mese de martu passadu sunt bistados cussinnados sos tribaglios de iscavu. Su situ, chi est mannu meda e de importantzia iscientifica, fuit bistadu scudrignadu solu in partzialidade in sos annos Ottanta. S’interventu de oe interessat in manera particulare sa zura chi andat a sa parte de su riu, una zura sinzada dae sa prena de su 2008 chi aiat fattu dannos a una parte de su cumplessu.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22