Domìniga su 2 de santugaine at a dirìgere una partida de Sèrie A (Sassuolo-Salernitana): si tratat de unu momentu istòricu pro su fùbbalu italianu.

Maria Sole Ferrieri Caputi at a èssere sa prima fèmina a dirìgere una partida de Sèrie A.  Su 2 de santugaine 2022, Sassuolo-Salernitana, a ora de is 15, b’at a èssere issa a dirìgere sa partida.

Ferrieri Caputi tenet 31 annos, est de Livorno, s’est iscrita a su cursu arbitrale paris a sas amigas de su litzeu. A pitzinnedda s’ìdolu suo fiat Roberto Baggio. Tenet duas làureas: una in Iscièntzias Polìticas e Relatziones Internatzionales e una in Sotziologia. Traballat a Bèrgamu comente chircadora.

A 17 annos at dirìgidu sa prima partida categoria Novìtzios ( pipios dae 10 a12 annos). A 25 at cumintzadu a arbitrare in Sèrie D e a 30 at esordidu in Sèrie C. Sa prima partida in sèrie B  l’at arbitrada in su santugaine de 2021. Immoe est arribbadu s’esòrdiu in A.

Sos dirigentes arbitrales chi l’ant bida crèschere l’aiant seberada  comente s’àrbitru fèmina prus adata a dirìgere una partida de òmines in sa màssima sèrie pro more de su caràtere forte suo. Su designadore Gianluca Rocchi at naradu: «Est unu bonu àrbitru, est pronta. Si l’est meritadu». A pustis de custu esòrdiu in su campionadu italianu de sèrie A, Maria Sole at a andare a Ìndia, arruolada dae sa FIFA tra sos àrbitros chi ant a dirìgere su Mundiale feminile Under 17. Posca at andare a Qatar pro su Mundiale (20 de santandria-18 de nadale).  Pro sos dirigentes de s’AIA – s’Assòtziu Italianu Àrbitros – est una giorronada istòrica- a pustis de chentu e deghe annos- una bortada istòrica pro totu  su fùbbalu italianu.

Ferrieri Caputi arribat a pustis de sa pioniera Bibiana Steinhaus – chi aiat cumentzasdu in Bundesliga giai giai su 2017 – e s’àrbitru frantzesa Stéphanie Frappart, chi aiat fatu s’imbucada sua in Ligue1 in su 2019 e chi – pro Maria Sole – est unu modellu de riferimentu.

“Progetto finanziato con l’Avviso Pubblico IMPRENTAS annualità 2021-2022”

Campionados italianos de segunda categoria, su Tc Casteddu est su menzus.

Sos campionados italianos de segunda categoria in Sardigna sunt incomintzados: b’at dòighi jogadores chi chertant tra issos, ma solu ses sunt sos postos po pòdere bìnchere. In su Tc Casteddu si respirat un’aèra de chertos, sena chi s’iscat comente nch’at a finire. Est istada una die de garas longas e de derby isulanos.

B’at istadu partidas chi ant dadu importu a un’agguantu mannu dae parte de sos tennistas sardos, capatzes a interessare meda a sas fainas insoro su pùblicu presente. De totus, ispicat meda safregura de su “maratoneta” de su tzìrculu casteddaju, bonu a mudare sas malas sortes de sas garas e a las tramudare in bonas, mescamente gràssias a su resinnu sou e a su caratere sou. Sos ogros de sa zente sunt abistos cara a ub’est issu.

B’at puru àteros jogadores sardos chi sunt bonos meda e chi sunt chertande contras a àteros istranzos chi arribant dae sa penìsula italiana. Non totus de custos sardos ant bìnchidu, ma fintzas addaghi si perdet non b’at de si disisperare, ca puru una pèrdida nos azuat a crèschere. Su tennis, chi est un’isport chi in Sardigna non si jogat meda, s’est isparghinde in s’ìsula, batinde chertos de importu mannu. A dies de oe, jogant a tennis in Sardigna zòvanos meda, si pensamos a cantos bi jogaiant carch’annu a oe. E chie bi jogat si depet mòvere a foras dae sa Sardigna, duncas cheret s’azudu de tzìrculos, allenadores e famìlias.

Cras, addaghi b’ant a èssere sos ùrtimos ses match de importu mannu,s’ant a conclùere sas cualificatziones. Po carchi jogadore custa at a èssere un’ocasione po crèschere e po si mezorare, po carch’àteru, invetze, at a èssere su concluu de unu sònniu, arribande a duos passos dae pòdere bìnchere, ma sena otènnere nudda. De bonu po su tennis sardu b’at a èssere su fatu chi est creschinde comente isport e chi est ammachiande a pitzinnos meda.

Attività realizzata col contributo della Regione Sardegna — IMPRENTAS 2024-2025. LR 22/2018, art. 22