S’eletzione de Umberto Bossi faghet pèrdere unu parlamentare a sa Sardigna. Oe su contègiu nou fatu dae su Viminale at ammìtidu in parlamentu su senatur lumbardu, chi in printzìpiu pariat èssere foras de s’assemblea. Bossi est in su Parlamentu italianu dae 35 annos. Ma totu custu at cumportadu unas cantas cunseguèntzias prus che totu a dannu de sa Sardigna, bidu chi s’eletzione de Bossi at fatu lassinare in giosso a Alessandra Todde, vitzeministru in su Mise.

Sa noa est istada fata ischire dae  su Dipartimentu pro sos afares internet e territoriales de su Ministeru de s’Internu.  Pagos minutos in antis, su vitzepresidente de su Senadu Roberto Calderoli aiat signaladu un’errore de càrculu chi, si curregidu, diat àere torradu a fàghere intrare in Parlamentu su “Senatur”.

Duncas sa Sardigna tenet una parlamentare de mancu. Cun su contègiu nou de sas ischedas eletorales fata dae  su Ministeru de s’Internu est istada evitada s’essida de su Parlamentu (a pustis de 35 annos) de su senadore de sa Lega Umberto Bossi. Bidu chi  su senatur fiat candidadu in su collègiu plurinominale de Varese, s’eletzione sua nche at bogadu sa vitze ministra nugoresa Alessandra Todde, chi diat èssere dèvida intrare etotu dae cuddu collègiu liberende su postu suo in su collègiu de sa Sardigna acanta fiat capolista.

In pagos faeddos ande  fàghere sas ispesas de s’eletzione de Bossi at a èssere sa collega pentastellata Susanna Cherchi, chi diat àere dèvidu pigare su postu lassadu lìberu dae Todde, e duncas abarrat foras dae  Montecitorio.

Giai lunis sero bi fiat istadu unu corfu de iscena in Sardigna, cun su sorpassu a manca de Romina Mura, deputada in essida de su Partidu Democràticu, dae banda de Francesca Ghirra, unu disafiu a su finale a favore de sa cussigera comunale esponente de s’alleàntzia tra Sinistra- Verdi.

Cosa chi podent capitare cando sos votos e son contègiios non sunt galu concruidos. Est istadu su Viminale etotu a comunicare chi  s’ufitzialidade subra de sos elettos s’at a tènnere petzi cun su timbru de s’ufìtziu eletorale de sa Cassatzione.

 “Progetto finanziato con l’Avviso Pubblico IMPRENTAS annualità 2021-2022″

In Roma, in sa Camera de is Deputados, ant cunsignadu is atestados de mèritu de su Prèmiu America Giovani 2022, donadu a su talentu universitàriu chi sa Fundatzione Itàlia Usa donat a is giòvanos neo laureados prus bravos de is vàrias universidades italianas e chi, ònnia annu, premiat 1000 talentos.

Intra is premiados fintzas Maria Ausilia Collu de s’Amministratzione de Baunei at afestadu a sa con-tzitadina cun una nota in is social.

In su messàgiu ant iscritu: “Le nostre congratulazioni a Maria Ausilia Collu, vincitrice del Premio America Giovani, ricevuto oggi alla Camera dei Deputati. Il premio le consentirà di accedere al master in Leadership per le relazioni internazionali e il made in Italy. Brava Maria Ausilia, siamo orgogliosi di te”

De sutalineare chi is giòvanos bravos de su Premiu America Giovani sunt seletzionados de sa Fundatzione Itàlia USA, intra sa banca datos de is universidades italianas, intra is neo laureados cun unu prano de istùdios chi pertocant is interessos de sa Fundatzione e in base a is diversos paràmetros indicativos de su talentu acadèmicu issoro, a comente, su puntègiu de laurea, s’edade chi tenent cando ant pigadu su tìtulu, sa mèdia de is esàmines, sa data de sa sessione de laurea, su curriculum studiorum e àteras valutatziones cumparativas.

S’assignatzione acontesset cun un’algoritmu complicadu e non sunt atzetadas candidaduras ne est possìbile inditare àteros istudiantes. Custu ca su prèmiu est meritocràticu, gasi bolent is valores de sa fundatzione, duncas solu is risultados otentos de is istudiantes decretant su prèmiu.

“Progetto finanziato con l’Avviso Pubblico IMPRENTAS annualità 2021-2022”