A sas 23, cun sa serrrada de sas votatziones pro sas eletziones polìticas, sos datos chi lompent narant chi est su partidu de Giòrgia Meloni su chi at pigadu prus votos.

Sa coalitzione de tzentrudereta, segundu sos datos, diat àere bintu sas eletziones polìticas 2022. Istende a sos votos iscrutinados finas a como, su partidu de Giorgia Meloni Fratelli d’Italia est su primu partidu cun su 26,46%, mentras sa Liga e Forza Italia otenent  pertzentuales medas prus bassas: 8,98% e 7,99%. Su totale de sa coalitzione duncas arribbat a su 44,35% e diat garantire sa majoria in Parlamentu ma non sos tres duos de sos sègios, comentepariat possìbile dae sos sondàgios. Duncas, Meloni at a èssere cun probabilidade sa pròssima presidente de su Cussìgiu, sa prima fèmina e capu de sa formatzione prus de dereta a su guvernu de s’Itàlia republicana.

Cunforma a sos ùrtimos iscrutìnios su tzentrumanca est a su 26,53%, cun su Partidu Democràticu suta a su 20% (19,39%) e pro immoe cun sa sola alleàntzia Verdi-Sinistra a superare su limenàrgiu de isbarramentu de su 3% (3,68%).

Su Movimentu Cinque Stella, como est a  su 14,81%, mentras Azione e Italia Viva est a su 7,75%. In sas imbenientes oras amus a tènnere sos iscrutìnios cumpletos cun sos datos definitivos.

S’afluèntzia natzionale s’est firmada suta a su 64%, 9 puntos prus pagu de su votu de su 2018. Si tratat de su mìnimu istòricu pro sas eletziones polìticas in Itàlia. In sas votatziones pretzedentes aiat botadu su 73,01% de sos chi nde tenent deretu.

S’ùnica regione acanta su tzentrudereta no est su primu partidu est sa Campània, in ue su M5S at pigadu su 34,9% e su tzentrudereta su 33,4%, a iscrutìniu belle finidu. Su tzentrumanca s’est firmadu a su 22%. Su tzentrudereta diat àere bintu fintzas in sas duas regiones chi dae semper apartenent a sa manca, est a nàrrere sa Toscana e s’Emilia Romagna. In Toscana su tzentrudereta at pigadu su 38,6% e su tzentrumanca su 34,67%, in Emìlia-Romagna su tzentrudereta at pigadu su 39,1% e su tzentrumanca su 35,9%.

“Progetto finanziato con l’Avviso Pubblico IMPRENTAS annualità 2021-2022”

Referendum supra sa zustissia, itte prevedit sa refforma supra sa cale ant a votare sos italianos.

Su 22 e 23 martu sos italianos ant essere giammados a votare pro detzidere si cambiare carchi parte de sa Costituzione in sa parte de su funtzionamentu de sa magistradura.Supra s’ischeda elettorale bi at essere una dimanda meda cumplicada pro itte bi sunt solu sos numeros de sos articulos de sa Costituzione chi ant essere cambiados, chena ispiegare in manera simple cale sunt sas novidades chi si prevedint.

Su referendum no est pro problemas medas chistionados de sa zustissia italiana, comente sos protzessos longos meda o sa mancantzia de pessonale in sos tribbunales. Su votu si cuntzentrat imbetzes supra s’ordiminzassione de sa magistradura e supra sas regulas de su tribagliu de sos magistrados. Sa refforma prevedit tres cambiamentos printzipales e importantes.

Bidimolos. Su primu est s’ispitzigu intre zuighes e pubbricos ministeros. Oe bintrant in sa magistradura cun su mattessi cuncursu e faghent parte de su mattessi assentu. Cun sa refforma sos duos caminos diant essere divididos in manera deffinitiva. Segundu chie agguantat su cambiamentu custa divisione diat faghere divennere su zuighe prus indipendente in su mamentu in su cale devet dezidere si una pessona est innozente o affartada. Chie est contrariu, invetzes, pensat chi su sistema de oe affiantzet giai ecchilibriu e chi ispitzigare de su tottu  sos duos rolos potat creare difficultades novas.

Su segundu puntu est pro su Cunsizzu Superiore de sa Magistradura, s’organu chi si occupat de sas carrieras de sos magistrados. Sa refforma prevedid de lu ispitzigare in duos: unu dedicadu a sos zuighes e unu a sos pubbricos ministeros. Sos partetzipantes diant essere seperados cun d’unu sorteamentu e non prus cun d’una elessione. S’urtimu cambiamentu est pro su sistema chi dezidit pro sas penalidades a sos magistrados. Sa refforma prevedit sa creassione de unu organismu novu chi si diat occupare propriu solu de custos protzedimentos.

Cun su referendum sos tzittadinos ant deppere seperare si mantennere sas regulas de como o faghere custos cambios in su funtzionamentu de sa magistradura italiana. In sas urtimas chidas custas votassiones ant tentu azzesu su cunfruntu politicu e sas animas de sos partidos.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22