Chenàbura arribbat Giorgia Meloni, de su Partidu Fratelli d’Italia, mèrcuris imbeniente su segretàriu de su Pd, Enrico Letta: sa campagna eletorale est oramai cumentzada e  fintzas sa Sardigna benit tocada dae sos giros traditzionales de sos candidados natzionales. Chenàbura Giorgia Meloni at a èssere in Casteddu: a sas 18 at a èssere in pratza de su Cramu pro unu comìtziu. Enrico Letta at a arribbare imbetzes sa chida imbeniente. S’organizatzione logìstica benit definida in custas dies, ma s’ischit giai chi su leader dem at a fàghere duas tapas in sa matessi die de mèrcuris, in antis a Casteddu e posca a Sàssari.

In s’ora su  cumpletat s’assetu organizativu de su Pd in Sardigna pro s’apuntamentu eletorale. Su segretàriu regionale Emanuele Cani at pedidu a sos cussigeris regionales Giuseppe Meloni e Rossella Pinna e a su cussigeri comunale de Casteddu Matteo Lecis-Cocco Ortu de coordinare sa campagna eletorale de sos democràticos, chi si presentant in s’Ìsula cun sos alleados de Articolo 1, Partito Socialista Italiano e Demos. mescamente Giuseppe Meloni s’at a ocupare de su coordinamentu polìticu, Rossella Pinna de su coordinamentu programàticu e Matteo Lecis-Cocco Ortu at a coordinare sa rete de sos voluntàrios democràticos e sas initziativas territoriales, paris cun sos tzìrculos e sas Federatziones provintziales.

Peri is capos de is àteras listas ant presentadu a sos eletores sos candidados issoro. Cras a sas 10.30 in pratza Galilei 13 a Casteddu, presentatzione de sas listas de sa ”Alleanza Verdi e Sinistra” pro s’eletzione de sa Càmera de sos Deputados e de su Senadu de sa Repùblica in sos duos collègios plurinominales de sa Sardigna.  A su progetu polìticu, a su cale aderint a livellu natzionale Sinistra Italiana, Europa Verde e Possìbile, pigat parte in Sardigna su Partidu Progressista a su cale faghet riferimentu su grupu in Cussìgiu regionale de sos “Progressistas”. Domìniga tocat a sos candidados de Italexit, su movimentu creadu dae Gianluigi Paragone. Sa cunferèntzia s’at a tènnere a su Caesar’s Hotel, in Via Darwin a Casteddu, a sas 11.

“Progetto finanziato con l’Avviso Pubblico IMPRENTAS annualità 2021-2022”

Su decretu Energia a unu passu dae su emmo  allisat sa carrela a s’imbestida de su bentu; Sardigna chentza amparu.

Su decretu Energia est accanta a s’approazione deffinitiva. Pustis de su via libera de su Senadu, su provvidimentu at arribare in pagu tempus a
sa Camera po s’urtimu passazzu de su parlamentu chi at a cussentire s’approazione. Unu camminu chi est faghinde preoccupare meda sa Sardigna
inube creschet sa timoria de un’accreschimentu chentza controllu de sos impiantos de su sole e de su bentu, chentza chi bi siant tutellas po s’iscrocca.

Su decretu, naschidu po apprettare sa colada energetica e minimare sa dipedentzia dae su fossile benit bidu commente un’istrumentu chi minimat su rolu de sas Regiones e de sos entes locales favoressinde Operadores Energeticos mannos natzionales e internatzionales. Sa Sardigna, gratzias a sas calidades de s’ambiente e de su tempus benit cussiderada una de sas iscroccas prus disizzadas po imbestimentos novos e propriu po custu arriscat de tennere sos problemas prus mannos.

Sas regulas novas prevedint protzeduras prus fatziles po s’autorissasione e una minimada de sos controllos locales. Custu diat podere cussentire sa fraigada de impiantos fintzas in logos cun balore mannu de sa bista de sa laurantza cun effettos devastantes supra s’iscrocca e sas comunidades.

In custu cuntestu si affortigat s’impignu de comitados tzivicos, amministradores locales e assotzios chi dimandant istrumentos de amparu prus balidos. A su tzentru de sa dibatta bi est sa proposta de una lezze regionale Pratobello chi puntat a introduire lacanas craras e criterios chi istringhent de prus po fraigare impiantos po su sole e su bentu in s’Isula.

In sas dies imbenientes cun s’accostiare de su votu a sa Camera si prevedint initziativas novas e protestas pubbricas. Su cunfrontu si giogat intre s’esigentzia natzionale de apprettare sa transizione energetica e sa dimanda de prevedire unu disignu chi tenzat contu de sa particularidade de sa Sardigna e de sa tutella de su patrimoniu naturale e culturale suo.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22