Giòbia su 18 de austu, data noa sostitutiva de cussa initziale de su 31 de trìulas, finas dae sas 10.00 de su mangianu, sas primas sostenidoras suas si sunt sèidas in su martzapè, cara a s’istàdiu Monteponi, a Igrèsias, pro pòdere intrare e arribbare suta de su palcu a assìstire a una data noa de su tuor “Ghettolimpo”. Semus faeddende de Mahmood, su cantante sardu-egitzianu intradu in su coro de medas pitzocos. S’eventu, aprontadu dae su comunu de Igrèsias, est resèssidu emda e at atzocadu gente dae sas tzitades e dae is biddas de totu sa Sardigna.

Su bentu forte, su chelu nùilu e sas lentinas de abba, non ant fatu tìmere a sos 7.000 ispetadores chi fiant resèssidos a “conchistare” sos billetes gratuito  postos a disponimentu in lìnia. Duos dj ant acollidu sa truma, mixende cantzones sena tempus finas a sas 21.31, oràriu acantu in fines est essidu Mahmood chi at comintzadu s’esibitzione sua cun petzos pagu connotos, e posca at caentadu s’istàdiu Monteponi cun sos branos suos prus famados… comente Soldi, Barrio, Brividi, custa ùrtima cantzone  at bintu Sanremo 2022 paris cun su collega e amigu suo Blanco. Bella e ispantosa sa presèntzia de su coro feminile Intrempas de Orosei chi at intonadu una versione originale de “Non potho reposare”, paris cun sa boghe sua solista.

Su pùblicu at cantadu totu sos petzos suos, acumpangende·los cun aplàusos e paràulas de istima in limba sarda chi s’artista allegat pro more de s’orìgine sarda de sa mama. A sa fine at cantadu Nanneddu Meu, e Non potho reposare, acumpangiadas peri dae su pùblicu. Grandu atesa massimamente pro sa cantzone chi l’at postu in s’iscaleri prus artu de su pòdiu de Sanremo in s’editzione de su 2019, est a nàrrere Soldi.  S’ispetàculu at superadu sas aspetativas de sos organizadores, cun grandu cuntentesa de su pùblicu e de s’artista sardu-egitzianu.

“Progetto finanziato con l’Avviso Pubblico IMPRENTAS annualità 2021-2022”

Sa fine drammatiga de su zovanu benturzu Arricelli, pustis de su bolu attrividu dae sa Sardigna a sa Sicilia, nos ammentat sos arriscos de sos movimentos de ispartinadura de sos zovanos alabros.

Su destinu sou, interrumpidu cando fit bolande supra su mare in mesu de Punta Raisi e San Vito lo Capo, nos ponet daenanti a sa debilesa de custas creaduras magniffigas, in d’unu mundu semper pius bortadu a sos interessios de sos
omines.

Arricelli fit unu de sos 15 benturzos de sa colonia noa de su Sarrabus- Gerrei, e sa perdida sua est una disgrassia non solu po sa comunidade iscentifica chi lu compudabat, ma puru po tottus sos chi appretziant e si affuscant de sa rimunida de sos animales arestes.

Bell’e chi non tottu est perdidu. In su mentres chi pranghimos sa perdida de Arricelli, semus animados dae sos sutzessos e dae sa resistentzia de sos atteros membros de sa colonia de Villasalto. Su benturzu Sannicolò sighit s’iscumbattamentu de sa Sardigna, ispinghindesi cun atza in medas regiones de s’isula, cun su bentu chi che lu diat leare fintzas in Corsica.

A sa mattessi manera, sos atteros benturzos commente Sinnai,Ballao,Gerrei,Armungia,Quirra e Muravera, mustrant unu adattamentu chi surprendet meda, addurante po su pius tempus in sa sura de sos Sette Frades, ma iscumbattande puru iscroccas pius attesu, ma torrande semper a sa sicuresa de sa gabbia Forestas. S’azzudu de sos pastores, commente sos frades Aledda, est importante meda po garantire unu approvistamentu de cosa de pappare po sos benturzos.

Su rolu insoro non solu assicurat chi custas creaduras ispantosas potant bivere, ma azzuat puru a su sutzessu totale de su disignu po conservare sos benturzos, apparande unu ispartimentu ecologicu de sas carasas chi faghet bene siat a s’ambiente siat a sa comunidade locale.

In su mentre chi pranghimos sa perdida de Arricelli, rennovamos s’impignu nostru po diffendere e preservare sas zenias minettadas, pro itte atteras disgrassias commente custa si potant iscansare e chi su chelu sigat a essere surcadu dae sas alas de custos alabros magnifficos.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22