Ogros abertos e conca a chelu pro pro non pèrdere su passàgiu de sos isteddos tramudantes. Notesta est sa note de Santu Larentu e ognunu podet espressare sos disìgios suos. Ma ite signìficat a beru? Sos chi nois mutimus isteddos tramudantes, in berteru sunt metèoras. Si tratat de bucones de s’isteddu coudu Swift Tuttle. Cada annu, tra su 9 e su 12 de austu, colende a presu de su Sole, bogat iscàndulas chi si podent bìere dae sa Terra. Sos astrònomos los mutint Persèides, de sa costellatzione de Perseu, de sa cale paret chi bèngiant.

Ma ite nch’intrat Santu Larentu? Segundu sa traditzione cristiana Santu Larentu fiat istadu brusiadu a biu cumandende s’imperadore romanu Valerianu, durante una persecutzione e su 10 austu s’ammentat su martìriu suo, acontèssidu in su 258 p.C. Semper sa traditzione cheret chi sas Persèides rapresentent sos tzitzones tentos in fogu de su fogorone chi aiat brusiadu a Santu Larentu, opuru sas làgrimas suas de dolore.

Sos disìgios e sos isteddos. Sa paràula disìgiu derivat de su latinu desiderium, overas «farta de isteddos». Dae s’antighidade su mundu de su chelu e de sos astros tenet unu significadu importante e influentzaiant sos sèberos de sa vida de ogna die. Sos corpos de su chelu fiant cunsiderados che divinidades, dae sos cales difatis at a derivare posca s’astrologia, e subra de s’osservatzione issoro si basaiant sas preditziones de su tempus benidore. Prus che totu sos navigadores e biagiadores s’afidaiant a sos isteddos comente  ghias durante sos biàgios issoro a de note. Dae inoghe derivat su creìngiu de osservare sos astros, posca serrare sos ogros e disigiare s’avenimentu de calicuna cosa.

“Progetto finanziato con l’Avviso Pubblico IMPRENTAS annualità 2021-2022”

Sa birra sarda sighit a si distinghere a livellu natzionale e europeu, accuccurrande una filera de riconnoschimentos de grandesa chi ponent in lughe s’estremadia de su prodottu isolanu e sa solidesa de sa filera regionale de sa birra. Custos premios cunfirmant su sutzessu creschente de sas favricas artigianales de sa birra in Sardigna e s’effettu de signifficu supra su mercadu regionale e addia.

Dae pagu tempus, sas favricas de birra isulanas ant brilladu in medas manifestatzione importantes, incluinde abbenimentos meda connoschidos commente su Vinitaly 2024 e su Bartzellona Beer Challenge, unu de sos cuncursos de sa birra pius de grandesa de Europa, addia a su Cuncursu Internatzionale de Lione.

In mesu de sos personaggios printzipales de custa serie de sutzessos, si est annoddittada sa favrica de birra Puddu de Santa Giusta,Aristanis, chi at conchistadu tres medallas (oro,arghentu e brunzu) a su Bartzellona Beer Challenge po sas variedades Porter,Saison e Coffee Porter, binchinde puru su titulu de menzus favrica de birra zovana de sa gara. Sa favrica de birra Battor Moros de Guspini, at binchidu duos oros po sas birras Puttu 16 Helles e Puttu 9 Vienna Lager, e sa favrica Artigiana Horo de Sedilo at retzidu una medalla de oro po sa Tifo Mourinho e una de arghentu. Puru sa favrica de birra Agricola Reforte de Benetutti at binchidu una medalla de brunzu cun sa birra Su Boboti, e sa favrica de Birra Keja de Bari Sardo at conchistadu una medalla de arghentu cun sa Calmedia, un’India Pale
Lager.

A su cuncursu internatzionale de Lione, sa favrica Birrificio “Isula” de Thiesi at binchidu medas medallas de oro po medas variedades, in mesu de sas cales sa Pale Ale, sa coffee stout e sa pils, addia una medalla de arghentu cun sa Session Ipa. In pius a su Vinitaly, su premiu “silver” a su design po sa classe birras, est bistadu dadu a sa Wine Explosion – IGA Mogorese a su Semidano favrica de birra Bam de Mogoro.

Su presidente e su direttore de Coldiretti Sardigna, Battista Cualbu e Luca Saba, ant evidentziadu s’importantzia de custos riconnoschimentos, chi premiant su tribagliu tostu de sas favricas de birra artigianales de sa Sardigna in s’agguantare tottu sa filera de sa birra regionale. Coldiretti Sardigna at fattu partire unu disignu ambitziosu meda po azzuare custa filera, faghinde partetzipare sos chi produene su ranu,s’orzu,malto e luppulu, paris cun sas favricas de birra e su Consorziu de sa Birra Italiana.

Custu disignu cheret favoressere una produssione de s’isula cumpleta, dae sas materias primas a su prodottu finidu, cun s’intentu de rispondere a tottu sas esigentzias de sa filera. Gratzias a custa initziativa, sunt arrivados finatziamentos importantes meda dae sa Regione, po agguantare sas favricas de birra a sos produttores de orzu, preparande su terrinu po accomettare sas porfias de su tempus benidore cun ressignu.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22