Fintzas in Sardigna totu prontu pro sas operatziones de allestimentu de sos sègios in bista de sas eletziones de domìnigu su 12 de làmpadas. Si votat de sas 7 a sas 23: 220 mìgia  tzitadinos sunt mutidos a sas urnas pro su rinnovu de sìndigos e Consìgios comunales in 65 tzentros, mentras totu su corpus eletorale de s’Ìsula s’at a espressare subra de sos 5 referendum subra de sa giustìtzia promòvidos dae Lega e Radicali. Cras s’11 de làmpadas, at a èssere die de mudìmene eletorale. Su 12 a note, a pustis de sa serrada de sos sègios at a comintzare s’iscrutìniu de sas ischedas subra de sos chimbe cuesitos de su referendum. S’ispòlliu pro sas Comunales at a cumentzaee  imbetzes de sas 14 de lunis 13.

A s’internu de sos sègios est racumandadu s’impreu de sa mascheredda siat pro sos eletores siat pro sos presidentes e iscrutadores. In duos Comunos (Aristanis, ùnicu cabulogu de provìntzia interessadu e Ceraxus, tzentru de belle trentamila abitantes) est prevìdidu su segundu turnu de ballotàgiu su 26 de làmpadas.

In totu sunt 110 sos candidados sìndigos, agigu 24 sas fèminas, su 21,8%. Sa pertzentuale feminile creschet, ma abarrat semper suta de su 50%, cunsiderende su nùmeru totale de candidados cussigeris: 1.803, sas fèminas sunt 747, su 42%. In totu sunt istadas presentadas 131 listas. Sunt 27 sos comunos monolista intre sos cales essint a pìgiu tzentros importantes comente  Carluforti e Altzaghena. Sos àteros sunt Castiadas, Nuradda, Pramentelu, Biddaramosa, Gelisuli, Lodine, Orune, Osini, Sòrgunu, Teti, Bidumajore, Miris, Mogorella, Nureci, Sèneghe, Siamanna, Tinnura, Tresnuraghes, Tzorfuliu, Anela, Calanzanus, Fiolinas, Pàdria, Cuzinas, Semèstene. In sos 27 at a serbire su crompimentu de su quorum de su 40% pro chi su votu siat bàlidu: in custu su casu su sìndigu diat pòdere èssere elègidu giai domìniga, a urnas galu abertas.

Sos comunos a sas urnas in sa Tzitade Metropolitana de Casteddu sunt Pula, Cuartùciu e Ceraxus. In Provìntzia de Nùgoro sunt mutidos a su votu sos comunos de Barì, Vitzi, Bolòtana, Gelisulu, Lanusè, Lodine, Lùvula, Onieri, Orune, Osini, Foghesu, Sòrgunu, Teti. In Provìntzia de Aristanis: Bidumajore, Ardaule, Boàtiri, Baulau, Gonnoscodina, Miris, Mogorella, Mragaxori, Nureci, Aristanis, Sagama, Sedilo, Sèneghe, Siamanna, Terrarba, Tinnura, Tresnuraghes, Uras, Tzorfuliu. In Provìntzia de Tàtari: Anela, Altzaghena, Badesi, Bono, Calanzanus, Èrula, Fiolinas, Santu Paulu Loeri, S’Ulumedu, Otieri, Pàdria, Cuzinas, Semèstene, Istintinu, Tissi, Turalva. In sa Provìntzia de su Sud Sardigna: Carluforti, Castiadas, Nuradda, Nuxis, Pramentelu, Portuscusi, Samassi, Santu Sperau, Santu Antiogu, Serri, Silìcua, Sriugus Donigalla, Biddaramosa, Bidda Sorris.

 “Progetto finanziato con l’Avviso Pubblico IMPRENTAS annualità 2021-2022”

Sardigna e Corsica: duas ìsulas sorres unidas dae s’istòria, sa natura e s’identidade

Divididas dae solu dòighi chilòmetros de mare, Sardigna e Corsica cumpartzint meda de prus de una parte de Mediterràneu. Custas duas ìsulas mannas , una italiana e s’àtera frantzesa, sunt ligadas dae raighinas antigas, paesàgios chi si assimizant e una identidade culturale forte chi affundat sas orìgines suas in unu passadu cumune.

In su cursu de sos sèculos, Sardigna e Corsica ant cumpartzidu eventos polìticos e dominatziones chi si assimizaiant. Ambas duas fiant bistadas
populadas dae nuràgicos e torreanos – tziviltades megalìticas chi ant fraigadu turres de pedra cun funtziones de defensa e de credu – e chi pustis ant connotu sa presentzia de sos Fenìtzios, de sos Romanos e de sos Pisanos.

Dae su puntu paesagìsticu, sas duas ìsulas s’assimìzant in manera ispantosa. Ambas duas oferint montes agrestes, costeras taghientes, buscos de elighes e suerzu, playas biancas e unu mare cristallinu. Sas Buccas de Bonifàtziu, bratzu de mare istrintu chi ddas dividit, est una de sas zuras marinas prus faschinosas e bentosas de su Mediterràneu, riccas de biodiversidade e amparada dae riservas naturales in ambas duas costeras.

Fintzas in sa cultura, sas affinitades sunt importantes. Sas duas ìsulas mantènent traditziones linguìsticas e populares fortes: su corsu e su sardu apartènent a sa matessi famìllia linguìstica romàntzia e presentant assimigliantzias in sa fònetica e su lessicu sorprendentes . Sa mùsica populare e sos cantos polifònicos testimònziant custu lìgamine, gai comente sas festas religiosas, sos costùmenes traditzionales e s’artesanadu, in ue su lignu, sa suerzu e sos tessidos sunt protagonistas cumunes.

Sos sardos e sos còrsos cumpartzint fintzas una trassa carateriale chi si reconoschet: orgòlliu, atzàpu a sa terra propria e ispìritu indipendente. Ambas duas populatziones tenent una istòria de resistèntzia culturale e de defensa longa de s’autonomia insoro, medas bortas in cuntierra cun sas autoridades tzentrales.

“Attività realizzata con il contributo della Regione Sardegna – IMPRENTAS 2024- 2025.LR22/2018, art.22”