Foghesu at otentu sa tzertificatzione ufitziale de tzitade cun sa prus arta cuntzentratzione de tzentenàrios de totu su mundu  in raportu a sa populatzione.

Chi s’Ogiastra, in Sardigna, siat una de sas chimbe àreas de su mundu chi tenent sas prus artas pertzentuales de persones sèneghes intre sos abitantes suos est cosa nòdida ma Foghesu est arribbadu a tènnere sa prus arta cuntzentratzione de tzentenàrios de totu su mundu in raportu a sa populatzione, e como at otentu sa tzertificatzione ufitziale chi lu faghet intrare pro deretu in su Guinness de sos primados.

Comente si leghet in su situ ufitziale de su Guinness world records, Foghesu at retzidu sa bìsita de sos cummissàrios de su libru de sos primados chi ant cunfirmadu su primadu de longevidade de sa populatzione locale dende a sa tzitadina su prèmiu pro sa majore cuntzentratzione de tzentenàrios a su mundu. Su primadu cunsignadu in abrile est istadu cumpletadu cando a Foghesu si sunt contados 8 tzentenàrios subra de una populatzione de in pensu 1.778 residentes. Una cuntzentratzione de tzentenàrios uguale a su 0,449%.  Un’iter aviadu in su mese làmpadas de s’annu coladu gràtzias a Salvatore Mura, istòricu de sa bidda  e autore de sa rechesta.

A rèndere s’istòria foghesina galu prus incredìbile est chi non si tratat de unu logu acanta si retirant sèneghes bìvidos aterue bidu chi  oto de sos tzitadinos tzentenàrios sunt “nativos e residentes”. Si tratat de Antonio Brundu, un’ex dipendente pùblicu chi est fintzas su prus betzu de su grupu cun 104 annos, sa sorre Maria  de 102 annos, Bonino Lai (103), Vittorio Spanu (102), Giovannina Mameli (101), Federica Melis , ex insegnante elementare chi su 28 de làmpadas at a lòmpere 101 annos, Concetta Melis, 101 annos, e in fines su prus giòvanu cun  100 annos fatos in su mese freàrgiu coladu, Vittorio Lai, ex massaju.

 “Progetto finanziato con l’Avviso Pubblico IMPRENTAS annualità 2021-2022”

Nùgoro, ghia de su limbàzu incluisivu in s’amministratzione pùbbriga

Nùgoro faghet unu passu istòrigu cara a s’inclusione e a sa paridade: sa Provìntzia de Nùgoro est divènnida su primu ènte pùbbrigu de sa Sardigna a adotare in manera formale s’impreu de su limbàzu de zenia incluisivu in sas normas e sos regolamentos internos suos.

Sa detzisione, approada a s’unanimidade dae su Cunsìzzu provintziale subra propòsta de sa cunsizzera Lisetta Bidoni e cun s’accotzu de su presidente Giuseppe Ciccolini, punnat a prettare discriminatziones grammatigas e culturales, donande prus visibilidade e reconnoschimentu non solu a sas fèminas, ma fintzas a sas personas LGBTIQ+ e a sas identidades de zenia non cufformes a su binàrismu de su connottu.

S’approatzione de sas normas e de su regolamentu cun limbàzu incluisivu est solu su primu passu: sa Provìntzia at annuntziadu chi s’intentu imbeniente est a ispainare s’impreu de su limbàzu de zenia a totu sos atos amministrativos e a sas comunicatziones istituzionales uffitziales. S’impreu de unu limbàzu incluisivu no est solu simbòligu: refletit e influentzat sas relatziones sotziales, sos appitzigos de podere e sas bogadas a campu in intro de una comunidade, dande unu contribbudu a minimare eleghias e prevensiones cuadas e a favoressere prus sensibilidade culturale e respetu pare-pare.

Cun custa iniziativa, Nùgoro si ponet commente abberipista in Sardigna e fortzis unu mòdellu de sighire pro àteros comunos e provìntzias italianas chi cherent sighire polìticas de sa limba e comunicativas incluisivas.

Est a bìdere comente s’adossione operativa s’at a tradùere in sos atos amministrativos benidores e in sa comunicatzione de donzi die cun sa tzittadinàntzia, ma sa mustra rapresentat unu sinnu beru de atentzione cara a sa diversidade e identidade istituzionale in una iscrocca in ue temas de zenia, deretos tziviles e incluisione sunt in su tzentru de meda de sas chistiones sotziales de oe.

Attività realizzata con il contributo della Regione Sardegna – IMPRENTAS 2024- 2025.LR22/2018, art.22”