Fiat su 1 de maju de su 1981. A unos cantos mìllios dae sa costa dae su portu, in sa retza de unu pischeretzu de Arbatassa nche fiat acabbadu un’iscualu biancu mannu a beru: 6 metros de longhia. Ma a banda custu fatu etzetzionale, sos avistamentos de iscualos biancos in Sardigna sunt raros a beru, mancari siat presentes siat in su Mediterràneu, siat in sas abbas de sa Sardigna.

Bastat a pensare chi, segundu fontes giornalìsticas, in Sardigna dae su 1879 a su 2001 su pischecane biancu est istadu abbistadu 15 bias ebbia. In particulare s’ammentant sos  duos esemplares de prus de sos 6 metros de longària atzapados a Capo Testa (1975) e Istintinu (1999). Àteras piscas fortunosas  si fiant tentas semper a Capo Testa (1971 e 1978, prus unu pischecane arenadu in su 1989), a Santa Caterina de Pittinuri (in s’aristanesu, 1976) e in sos mares de s’ìsula de Santu Pedru (torra Sulcis, in ue in su 1989 un’iscualu nche fiat acabbadu a intro de sa tonnara).

Tocat a nàrrere chi in Sardigna  non bi siant mai istados atacos registrados a s’òmine. Duncas, podide fàghere su bagnu in Sardigna o fàghere de su surf sena tènnere perunu tipu de timoria, sos abbistamentos sunt raros e a bias sunt fintzas su frutu de sa fantasia de calicunu piscadore o bagnante.

Alleghende de s’Itàlia, imbetzes, in sos ùrtimos annos si bi sunt istados numerosos abbistamentos, comente s’iscualu biancu abbistadu a Messina (o mègius in s’istrintu de Messina in su 2016) e a Siracusa (in su 2016), e su pischecane biancu de 6 metros piscadu a Brìndisi in Pùglia in su 2015.

Ma cantu est mannu s’iscualu biancu? Sos esemplares adultos de pischecane biancu sunt de norma longos  intre sos 4 e sos 6 metros (ma podent superare fintzas sos 7 metros, su prus mannu mai piscadu est cussu registradu in Senegàl  e teniat  8 metros), pro unu pesu cumprèndidu intre sos 1000 e sos 1900 chilos.

 “Progetto finanziato con l’Avviso Pubblico IMPRENTAS annualità 2021-2022”

Su fenomenu de sos mangones in s’istagnu de Molentargius: un’ispettaculu naturale in su coro de sa tzittade.

S’istagnu de Molentargius, intre Casteddu e Quartu S. Elena, offerret unu de sos ispettaculos prus ammaghiantes de sa Sardigna cun sa presentzia regulare de sos mangones arrubios. Custos puzzones galanos, chi faghent parte de sa zenia Phoenicopterus roseus, sunt attirados dae sas abbas calmas e salamattas de sa zura, chi offerrint cundissiones ideales po los faghere pappare e faghere sos nios. Su Parcu Naturale Regionale de Molentargius-Saline, chi est mannu casi 1.600 ettaros e cumprendet istagnos, abba e salinas istoricas, est bistadu fattu po tutelare custu eco-sistema unigu, reconnoschidu a livellu internatzionale dae su Protocollo de Ramsar.

Sos mangones arribant donz’annu dae zuras divressas de su Mediterraneu, comente Francia,Spagna e nord Africa, e acciappant in Molentargius unu furriadorzu seguru gratzias a sas abbas bassas, riccas de cosa de pappare e paza marina, e a sa trancuillidade de s’ambiente. Dae su 1993, sa zura est divennida fintzas unu logu po faghere sos nios: donzi beranu sas cropas, fraigant nios de fangu, ponent sos ovos e creschent sos puzzoneddos, dande vida a unu fenomenu de biodiversidade ispettaculare.

Su tempus massimu de appellida andat dae martu a triulas, cando sos puzzoneddos naschent cun pinnammene ferulattu e sos mannos si movent tottu imparis, pappande e comunicande intre issos, creande una bera “nue arrubia” chi si biet dae attesu meda. Pro diffendere sas niadas, su Parcu controllat su livellu de s’abba e alindat s’intrada a carchi zura, garantinde gai sa trancuillidade chi serbit a sos puzzones. Fintzas fora de s’istajone sessuale, sos mangones  addurant a s’ispissu in s’istagnu o in sas zuras umidas accanta, comente s’istagnu de Santa Gilla, offerrinde un’ispettaculu unigu con sos bolos elegantes insoro e accumpanzados dae atteras zenias de puzzones de s’abba, intre sos cales mengones,tzurullios, filippas e anadras.

Sa presentzia de sos mangones in Molentargius, ets unu esempru craru de bivere imparis intre natura e tzittade, mustrande comente un’eco-sistema delicadu potat esistire a pagos passos dae su tzentru de sa tzittade. Custu fenomenu naturale no est solu un’occasione po su birdwatching, ma fintzas un’indittu de sa puresa de sas abbas e de sa calidade de s’habitat, cuffirmande s’importantzia de tutelare e balorizzare sas zuras umidas sardas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22