S’àrea archeològica est posta una zona a mesu costa a sos pees de sos montes de sos Sete Frades, in su Sàrrabus, regione de sa Sardigna sud-orientale. Su cumplessu cumprendet sos restos de unu nuraghe polilobadu, in relatzione cun unu putzetu votivu e cun unu tèmpiu a putzu.

Cùcuru Nuraxi est su nùmene de sa punta de su montigru chi dòminat sa prana de su Campidanu. Subra de su cùcuru s’agatat su nuraghe bellu meda, de tipu cumplessu, chi oe in parte nd’est caladu.

Giai dae sos primos istùdios de su 1867 (fatos dae su Canònicu Spano), si fiat resèssidu a cumprèndere sa chi deviat èssere s’istrutura de su nuraghe. Ma, fiat istadu cun sos primos iscavos archeològicos, a sos cumintzos de su 1960, chi ddoe fiat istada una definitzione mègius de su cumplessu monumentale. S’edifìtziu, pesadu cun rocas mannas in arenària e puddinga, fiat formadu dae duas turres megalìticas, unidas dae una cortina. In intro ddoe fiant  a su mancu tres ambientes, de custos a su mancu unu costituiat sa càmera printzipale.

A fùrriu de su nuraghe s’isvilupaiat unu bidditzolu. Totu a inghìriu a custa  àrea fiant istados agatados medas  restos de tziviltade nuràgica, ma sa prus de importante est su putzu sacru. Costruidu cun blocos de arenària mannos, piticos e mèdios, su putzu teniat pro seguru una funtzione religiosa-cultuale. Dae s’iscala, de 17 iscaleris istrintos, s’imbucat a sa càmera a ogiva arta m. 5,30 cun diàmetru basale de m. 2,50.

A suta  su putzu calat pro m. 22 de profundidade e cun larghesa mèdia de m.1,50 chi si restringhet a profilu parabòlicu finas a 1,02 metros.

A sa buca su putzu est inghiriadu dae un’arcu tundu, isculpidu cun una forma a curnisa. In cara a su putzu sacru s’osservat unu putzetu votivu de m. 3 de profundidade, imbusciadu cun filas de pedras piticas, agatadu prenu de bucones de  tzeràmicas mèdiu-nuràgicas, de chinisu e de restos de cosa de papare.

“Progetto finanziato con l’Avviso Pubblico IMPRENTAS annualità 2021-2022”

Carburantes, prus controllos de sa Finantza po cansare aumentos chena zustificassione.

Pustis de s’aumentu novu de sos pretzios de s’energia, po more de sas gherras in Mediu Oriente, In Italia sunt bistados affortigados sos controllos supra sos carburantes. Sa Finantza at detzisu de affortigare sos controllos supra tottu sa retza de ispartidura de benzina e gasolio fintzas in Sardigna.

S’intentu est de controllare cun attentzione donzi mamentu de su camminu chi che leat su carburante finas a sos ispartidores. In custa manera si cheret evitare chi calincunu si approfittet de sa situassione internatzionale po accreschere sos pretzios in manera chi no est zusta. Sos controllos sunt po tottu sos carburantes e partint dae sas dittas chi important o ispartint benzina e gasolio e arribant fintzas a sos ispartidores. Sa Finantza est controllande documentos, fattura e pretzios po cumprendere sis sos accreschimentos sunt currettos.

In sos urtimos tempos su pretziu de sos carburantes est torradu a pigare po more de sa tesones internatzionales e de sos problemas de su mercadu de s’energia. Cando bi sunt crisis o gherras, difattis, su pretziu de su petroliu podet accreschere in presse meda e custu interessat sos pretzios de benzina e gasolio. Propriu pro custu motivu sas autoridades cherent evitare chi calincunu irfruttet sa situsassione po balanzare prus de su chi est netzessariu. Sos accreschimentos de sos pretzios, difattis, deppent dipendere solu dae s’andamentu de sos mercados internatzionales e non dae cumportamentos iscurrettos.

S’affortigamentu de sos controllos est bistadu detzisu dae su Ministeru de s’Accolomia e de sas Finantzias, chi sighit dae accanta sos pretzios de sos carburantes in Italia. S’intentu printzipale est de diffendere sos tzittadinos e garantire trasparentzia. In d’unu mamentu in su cale su pretziu de s’energia est meda istabbile, est importante controllare chi tottu su sistema funtzionet rispettande sas regulas. Sos controllos de sa Finantza ant a sighire in sas chidas imbenientes in totta Italia. Sos controllos ant a serbire po cumprendere si sos pretzios chi sunt faghinde sos ispartidores sunt beros o si bi sunt cosas chi no andant bene.

S’intentu finale est de garantire chi sos affinadores paghent unu pretziu zustu e chi su mercadu de sos carburantes adduret craru e controlladu, chena ispeculatziones e aumentos non zustifficados.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22