S’idrògenu intrat a su benidore energèticu fintzas de sa Sardigna. Agiuadu, comente  àteras fontes lìmpias, de su Pranu de Ripresa e Resilièntzia, at tentu su parre positivu de sa Regione pro impiantos de fraigare in sas àreas industriales serradas. Sas tapas imbenientes tapa sunt sos bandos pùblicos pro finantziare sos traballos. “Amus a predispònnere unu bandu pro sa presentada de sas manifestatziones de interessu pro s’atzessu a sos fundos pro sa produtzione de idrògenu birde, prodùidu cun fontes energèticas rennoaditzas” ispiegat s’Assessora a s’Indùstria, Anita Pili. Sa Regione at adotadu una deliberatzione respetende s’avisu chi su Ministeru de sa Transitzione ecològica at publicadu in ghennàrgiu pro sas Regiones. Su passàgiu a sa produtzione de idrògenu birde, in realidade, est sa punna de unu pianu prus articuladu, bidu su ligàmine istrintu cun sos pranos de decarbonizatzione de s’Ue. Si tratat de ricunvertire in sos vàrios Paisos, sistemas de alimentatzione energètica de sas fontes fòssiles a s’idrògenu chi non luat. Dae unos cantos mese in Itàlia s’est mòvida fintzas sa Regione Abrutzu.

Sa Regione- agiunghet s’assessora Pili- at identificadu s’idrògenu comente  vetore istratègicu in su Pranu energèticu ambientale regionale suo pro su 2015-2030 (Pears) e s’atzessu a su bandu diat ofèrrere s’oportunidade de aviare sa realizatzione de un’economia suportada dae custa fonte . Su cuadru regionale de àreas dismissas, in sa carta, favorit una sìmile programatzione ma est a bìdere in su cuncretu comente  s’at a articulare a pustis de s’emissione de sos bandos pùblicos. B’at medas sitos cun territòrios idòneos pro s’isvilupu de progetos in iscala locale e una tzerta densidade de impiantos de produtzione de energia elètrica. S’idrògenu birde diat dèvere sostituire cantidades mannas de ògiu combustìbile a su presente impreadu in sos giassos in atividade. Si faeddat de àmbitos territoriales “chi diant pòdere favorire sa sinergia intre sos vàrios setores energèticos, bilantziende s’impreu de energia elètrica e gas e favorire s’integratzione e s’isfrutamentu in loco de sa produtzione chi benit dae sas rennoaditzas” ispiegat ancora s’Assessora Pili. Sos impiantos noos, ultres a sos eletrolizadores — coro de su sistema de produtzione- ant a dèpere èssere progetados cun critèrios de acùmulu de s’energia prodùida e impiantos de immagasinamentu in favore de sos territòrios. Parte importante in s’iter progetuale e autorizativu est sa sostenibilidade ambientale. At a bisongiare averguare in cuncretu comente ant a èssere aplicados custos printzìpios chi non petzi in Sardigna sunt istados impreados pro meda tempus in modu istrumentale pro blocare progetos subra sas fontes alternativas. Giai  dae printzìpiu su protzessu industriale pro otènnere idrògenu birde tenet costos artos. In ogni manera su guvernu in s’avisu a sas Regiones at fissadu in manera giusta tempos istrintos pro sos impiantos industriales benidores: s’ant a dèpere concruire intro su 31 de mese de idas de su 2025.

 “Progetto finanziato con l’Avviso Pubblico IMPRENTAS annualità 2021-2022”

Esterzili, unu burgu sardu pitticcu, si istantariat bragosu in s’urtima sua opera de arte murale, frimmada dae s’artista Mauro Patta. Cust’opera no est solu un’ onore a sos chentenarjos chi ant surcadu sa terra de custa comunidade, ma est un’ affirmassione de cunfiantza in su tempus benidore chi devet ancora ocrire.

In d’una simana inue su passadu paret essere s’unica ghia, custa opera imbidat a abbaidare addia, a abbrazzare su crasa cun isperantzia e determinu.

Su betzu, retrattu cun sa mirada a s’adde chi si isterret in daenanti a issu, no est un’ommine agganciadu a su passadu, ma unu custode de su tempus benidore. Sa mirada sua bragosa non si perdet in sos ammentos, ma si imbolat assa parte de sas ingendras noas, cun s’isperantzia de una menzus vida po s’amada bidda sua. Intro de issu s’incarnant sos valores trasmittidos in sos seculos, ma puru sa voluntade de los trasmittere a sas ingendras de su tempus benidore, in manera chi potant fraigare unu tempus benidore frorente supra sa base de unu passadu riccu de sabidoria e usantzias.

“Crasa”, gai s’intitulat custa pintura a friscu de 35 metros quadrados, testimonza de un’epoca chi abbaidat a daenanti, chentza ismentigare sas raighinas suas. Esterzili, in su 2024, si faghet interprete de una contassia chi andat addia de su presente, abbratzande su crasa cun cunfiantza e isperantzia. Cut’opera no est solu un’innu a sos chentenarjos chi l’ant precedida, ma est unu cumbidu a tottu sas ingendras chi ant a bennere, po contivizare su giardinu insoro de isperantzias e ambitziones, in manera chi su tempus benidore potat essere a s’artesa de su passadu gloriosu de custa comunidade.

In d’unu mundu semper pius globbalizzadu e incastradu, est de fundamentu contare a pedras lebadas e de su presente, sa vida longa sarda, chi at fattu divennere famada custa regione in tottu su mundu.

Po mesu de s’arte de oe e de sa tecnologia, podimos trasmittire a su mundu intreu, sa bellesa e sa ricchesa de sa cultura de una comunidade chi at sappidu resistire a sas proas de su tempus. Sos chentenarjos de Esterzili non sunt solu testimonzos de su passadu,, ma sunt puru luminosas ghias po su tempus benidore, mustrande chi sa sa vida longa no est solu una chistione de annos, ma de fortza, sapidoria e amore po sa terra insoro.

Attività realizzata col contributo della Regione Sardegna — IMPRENTAS 2023-2024. LR 22/2018, art. 22