Sos efetos collaterales de sa gherra in Ucràina si faghent intèndere finas in Costa Smeralda. A pustis de s’embargu Ue a sos oligarcas russos fideles a Putin, sos milliardàrios chi ant bidu cungelados sos afares issoro, comintzant a litzenziare sos traballadores de sas propiedades de lussu de sa Sardigna.

   “Custu mangianu apo retzidu deghinas de lamentelas de traballadores  chi dae lunis sunt istados litzentziados dae sos meres de sas villas”, contat Mirko Idili, segretàriu territoriale de sa Cisl Gaddura.

A èssere litzentziados dae sos finantzieris e industriales propietàrios de deghinas de villas e immòbiles de sa Costa Smeralda sunt manutentores, giardineris, addetos a sa seguridade, amministradores. E cun sos litzentziàmentos issoro sunt arribbende fintzas annuddamentos de medas commissiones a sas   impresas ediles locales impinnadas in traballos de ricualificatzione e mantenidura de sas propiedades immobiliares de sos magnates russos. “Sa nostra est una realidade acanta  b’est una presèntzia manna meda de capitales e investimentos, suta forma de villas e barcas de lussu chi sunt de apartenent a sotziedades chi dipendent dae oligarcas, finantzieri e millionàrios russos”, sighit  Idili.

  In Gallura, segundu s’Osservatorio Sardegna turismo, colant sas vacàntzias prus de 40 mìgia russos, pro unu totale de 220 mìgia  presèntzias. “Su 2020 in Gallura est istadu s’annu nieddu pro s’ocupatzione, prus pagu de su 60% de assuntziones respetu a s’annu pretzedente, dèpidas a sa pandemia. S’arriscu chi fintzas pro su 2022 si potzat prefigurare un’istajone cun unu abbasciamentu grave de ocupados est cuncretu a beru – osservat Idili – In sas oras  imbenientes  amus a pedire un’addòbiu cun su sìndigu de Altzaghena, Roberto Ragnedda, e cun totu sas istitutziones cumpetentes pro more de fàghere valutatziones prus pretzisas e pònnere in atu atziones cunsighentes de amparu in s’interessu de custos babbos e mamas de famìlia chi dae una die a s’àtera sunt abbarrados che Annica cun sas cadiras”, concruit su segretàriu Cisl.

 “Progetto finanziato con l’Avviso Pubblico IMPRENTAS annualità 2021-2022”

Su Parcu naturale de Gutturu Mannu amplariat s’offerta culturale e turistica sua cun s’abbertura de s’Ecomuseu pare-pare istoricu e archeologicu, una base digitale nova chi permittit de iscoperrere, in manera simple e lestra, sos sitios printzipales de interessiu chi bi sunt in sa zura amparada. Non solu natura limpia, duncas, ma fintzas unu patrimoniu istoricu de balore mannu chi benit in finis postu in retza e rendidu dispostu cun d’unu simple click.

Pro mesu de s’Ecomuseu, sos bisitadores podent iscoperrere in manera digitale sas iscroccas de sos comunes de Pula, Villa San Pietro, Siliqua,Domus de Maria, Uta, Assemini, Santadi, Capoterra,Sarroch e Teulada,accostandesi a una jura digitale chi contat sa ricchesa archeologica istravanada de su Parcu. Sa digitalizzazione cumprida de sos temas apparat un’esperientzia chi faghet affundare e chi attraessat s’istoria e s’archeologia de s’iscrocca, fintzas po sos temas ambientales, isfruttande tottas sas potentzialidades de sa tennologia.

Su disignu est bistadu isviluppadu dae paritzos espertos  cun s’accottu iscientificu de sa Sovraintendentzia de Casteddu e Aristanis e s’azzudu de s’Archiviu de s’Istadu de Casteddu. S’initziativa naschet cun s’intentu de balorizzare una cosa a s’ispissu pagu connoschida de sos parcos naturales e chi, in su casu de Gutturu Mannu, est unu elementu chi annodittat: sa cuncentratzione manna de testimonias chi andant dae sa preistoria fintzas a s’edade moderna e de oe, cun casi 55 sitios tzensidos intro e a lacana de sa zura amparada.

Intre sos risurtados de su disignu, curadu dae sa sotziedade Telos, bi sunt una base web dedicada chi permittit de iscumbattare s’iscrocca po mesu de testos, figuras e cartas tematicas, e videos po tamburinare. Custos temas ant a essere disponibiles puru pro mesu de unu logu intzididu postu in s’Infopoint de Pantaleo, in su Comune de Santadi, una de sas intradas printzipales de su Parcu. Gratzias a custos istrumentos at a essere possibile bisitare dae calesisiat parte de su mundu, logos de importantzia manna commente nuraghes, tumbas de zigantes e domos antigas.

Attività realizzata col contributo della Regione Sardegna — IMPRENTAS 2025-2026. LR 22/2018, art. 22